正式迎戰 - 蘿蔔糕 - 附食譜

經過兩次既試食, 覺得呢個食譜滿意啦, 可以打出黎啦.  之前兩次都係參考人地個食譜而改變出黎的, 點知……………離奇既事就係咁樣發生啦.

事關我係一路整一路睇住人地個食譜黎整的,加上我只係整約2斤既蘿蔔, 所以d粉既份量一定要計過出黎. 所以我係有將d粉同調味料既份量寫低的. 到尋日有個fd問我攞個食譜, 咁我咪放工番屋企搵番張紙出黎啦, 因為突然好驚唔見左張紙咁我試左2次既心血又無晒啦.

尋晚搵到張紙, 成個人定晒, 但係當我睇番原食譜時,發覺點解人地少左一種粉既?? 咁我又睇番我寫低既份量, 點解我又係無個種粉既? 但係我明明記得我一定係有落到的. 我當時既情況係我睇住張原食譜既材料, 跟住黎加加減減的(即係原食譜係有粟粉我先會用佢啦).  我仲記得粟粉既份量係同澄麵一樣咁多既添. 算, 我去原食譜既blog度再睇下係咪印漏左出黎啦(其實都無咩呢個可能的, 因為我係成篇copy出黎print的), 當然, 人地個blog亦都真係無粟粉呢樣野寫係度啦.

咁究竟點解會多左粟粉出黎既呢?? 我諗左成晚都唔明. 但係突然間打呢篇野時我諗得番出黎喎(仲唔係邪??) 原來我當日睇住個原食譜時, 我見到佢得粘米粉同澄麵, 我記得我之前(at least 舊年啦)我係有落埋粟粉的(因為我嚴佢爭左少少, 有少少削既感覺, 我唔知係咪我落得蘿蔔多定點), 所以最後我都決定加埋粟粉落去.  但係……落幾多好呢?? 諗左一陣都無頭緒, 最後就決定跟澄麵既份量啦(都係試架咋), 諗住仲有時間, 試左唔啱再改啦.  點知出黎又ok喎, 都唔係太信, 所以試多一底想reconfirm啦, 試埋第2底覺得真係我想要既野啦, 所以今次先post個食譜出黎. 整蘿蔔糕真係有血有汗呀!! 食既人真係要細味一下先好吞呀!

今次一次過整左5份以下既份量, 由於d糕盤細d, 所以有成8底, 而家只係蒸左6底(因為個高速煲要俾亞嗲用黎煲湯), 仲有一底蒸緊, 一底最細既未蒸, 都唔知幾點先有得訓!! (我對腳而家都仲軟緊呀, 因為連續企係度整左2個半鐘, 仲要有工人幫頭幫尾喎)............最後蒸到12點05分, 救命呀!!

材料:

1.白蘿蔔             2斤 (1100g – 1300g, 不能少於1100g)

2.粘米粉             140g (過篩)

3.澄麵               14g (過篩)

4.粟粉               14g (過篩)

配料:

1.冬菇               隨意 (切粒)

2.臘腸               隨意 (切粒)

3.蝦米               隨意 (洗淨, 格水備用)

調味料:

1.雞粉               1 tsp

2.胡椒粉             1/3 tsp

3.片糖               1/8片

4.鹽                 1/2 tsp

做法:

1. 蘿蔔刨絲, 蘿蔔水留起備用.

2. 冬菇浸軟後洗淨渣乾水切粒, 以少許生抽及糖調味備用.

3. 蝦米浸完後格水備用.

4. 臘腸切粒備用.

5. 燒熱隻镬, 白镬放臘腸粒炒, 之後加冬菇同炒, 最後加埋d 蝦米一齊炒, 見d冬菇熟同埋有晒香味就可以裝起佢備用.

6. 將3種粉加入蘿蔔水內開成粉漿(無晒粉粒呀).

7. 用一個煲細細火加入蘿蔔絲(唔要水)炒至半熟. 加入調味料後再兜炒至蘿白絲變透明.

8. 將#6的粉漿再搞勻後倒入去蘿蔔絲中炒勻(此時要更加注意個火同埋要不停手咁炒免燶), 等到見到d 粉漿水收到淨番好少(唔係乾晒喎)時就熄火.

9.將蘿蔔糕漿倒入糕盤內, 放入高速煲見雙圈計高速佢10分鐘, 排氣後便可取出, 待涼後放入雪櫃, 第2日先可以食.

Tips:

1. 蘿蔔既份量一定不能少過1100g.

2. 我試過幾次買蘿蔔時都被人呃“稱”, 最介意既唔係佢呃我1蚊幾毫, 而係佢搞到我既份量可能出錯. 所以我而家買完番黎會cut左個頭再自己 “稱”過, 要個準確既份量. 因為連埋個頭同被人呃左個d, 分分鐘爭成100g都唔出奇.

3. 炒蘿蔔絲時一定要小心個火力, 不能炒燶.

4. 加左粉漿後更加要小心火力, 因為你一停手分分鐘就出事的.

5. 若真係燶左(因為我第2個round時試過), 就唔好將燶個部份整出黎, 由得佢唔好要啦, 免你整散左佢連其他無燶既都撈埋一齊仲大镬, 到時成底糕都唔要得的.

6.d糕整完要第2日先可以食, 咁先夠入味架.

謝謝閱畢本文, 謹祝新年進步, 心想事成!