今晚食咩餸 - 2012年2月27日

 

又係另一個禮拜既開始, 所以都係蒸肉餅為主啦. 無計啦, 無左工人, 蒸肉餅可以做少好多野嘛, 唔想再係到切片, 切條, 放工番到黎咩都要快, 因為慣左早食飯, 而家最快都要比有工人時遲左半個鐘頭啦, 所以有時都要肚餓住等!!

亞嗲話今晚d餸無咩好影啦, 我話, 錯, 因為有梅菜蒸肉餅, d 梅菜係我自己加工的, 所以係非一般既梅菜肉餅.  亞嗲食左都一路食一路話好食!

1. 梅菜蒸肉餅
2. 腐乳炒生菜
湯: 南北杏密棗日月魚紅蘿蔔粟米排骨湯

試新既麵粉

最左邊既係中粉, 其他2包係高粉.

個包因為頂頂, 所以痴住左個蓋, 所以無左一忽.

用緊象印既人就可以睇到個高度係幾高, 幾乎係僅僅夠位用手揪住個兜咋.

係bk見人話呢隻粉好, 所以又買黎試下啦, 個包裝真係幾靚. 第一轉包整出黎我係到鬼叫, 因為...............個包頂到上頂呀which 係從來都未試過的.  所以你見到張相, 個麵包頂係無左一忽, 因為痴住左係個蓋到(見最下那幅相).  拎左個包出黎, 我係咁轉佢黎睇, 360度咁睇, 又係到聞下佢, 亞嗲話我痴線既咩, 駛唔駛咁跨張呀??!! 我都費事理佢, 無答佢.  我心諗, 難得有野玩, 當然係..............玩下先啦, 唔係我做人仲有咩意思呢??!!  

第2日早餐食左, d 包係軟d架, 所有材料無變, 只係轉左隻麵粉, 但係出黎係軟d的.  都幾好食, 係唯一既缺點係佢d粉太白, 一定係漂過, 仲要漂得好乾淨添!!  

再過2日我整第2轉包, 特登減少d水黎試, 出黎就無咁高了, 但係都比平時高少少. 個包出爐時, 我覺得個心係有d 空心feel的, 係得個皮硬d(其實唔係硬, 只係對個包心入面比佢係硬啫).  

下次仲買唔買呢隻好呢?? 呢隻就16蚊一包(1kg), 泰國粉就12蚊一包(都係一kg), 韓國粉就貴泰國粉1/3價錢, ummmmmmmm 我諗我會用番泰國粉了, 原因係............. 泰國粉都ok無問題, 所以費事買貴d啦, 試下新野無所胃, 但長遠計都係以成本計算為大前提.  

呢隻韓國粉同時都有低粉同中粉賣的, 我買左一包中粉, 諗住用黎整麵用, 唔駛買white wing咁貴, 中粉賣$13/kg, 我覺得佢係特登賣貴d d 高粉, 因為佢知多人買, 所以只係抬高 高粉既價錢.