由於想食甜品, 所以係屋企搵左呢包存貨出黎, 好多好多豆, 我再另外加多少少花生落去添, 原因唔係我鐘意食花生所以加多d, 只係我煲湯時唔想要咁多花生, 所以每次都抽起少少, 等煲渣咋時落埋佢咋.
又係煲完都唔記得影相, 所以睇下今晚番去記唔記得補影番啦(因為未食晒).
材料:
1. 渣咋 1包(去雜貨舖買, 呢一包係$12)
2. 片糖 適量
3. 水 適量 (約10碗 - 12碗)
用具:
1. 高速煲 1個
2. 普通煲 1個 (唔要矮身煲, 怕佢滾潟)
做法:
1. 先將所有豆沖水洗淨.
2. 將水倒落高速煲, 將豆及片糖同下, 關蓋, 大火煲至雙白圈後轉細火煲8分鐘).
3. 煲完8分鐘, 自動排氣後, 將糖水倒入普通煲內, 開大火打開蓋再煲多起碼15分鐘至你喜歡的稀杰程度, 試味, 夠甜便可食用. (加花奶食也可)
tips:
1. 用高速煲係適合我呢d隨時抽起條筋想食既人, 唔駛浸幾個鐘頭豆, 即煮即食.
2. 你懶既, 可以唔用普通煲, 照用高速煲, 同樣地打開蓋水滾計再煲相同時間. 轉用普通煲既好處係, 普通煲底簿d, 所以滾得快d, 滾得大d, d水會收得快d, 即係慳火d.
3. 高速煲既亞姐教係就咁高速完排完氣就食得, 但係我嚴佢唔夠溶, 所以再加工繼續煲完先食.
