好耐無食通粉了, 突然好想食, 尋日叫工人整定晒D材料今日煮啦. 買材料時諗黎諗去都覺得點解咁少野買既.......(叫佢買冬瓜, 梅頭), 但係點諗都諗唔起仲要買D咩, 因為實在太耐無煮了.
今日諗諗下, 原來唔記得叫佢準備冬菇, 但係已經太遲了, 所以浸唔切啦. 番到黎唯有求其係雪櫃搵D 瑤柱, 又係個櫃揾到D 紫菜(正), 所以掉晒落去一齊煮. 出黎都好好味呀....... 呢個係懶人既食譜之一, 因為唔駛煮, 掉晒D野落去搞掂.
尋晚 比平時夜左少少食飯, 7點半度先開飯. 咁食完都成 8點 3了. 因為老公未試過d 蘿蔔糕, 所以叫工人9點半食消夜上蕃薯糖水時, 每人煎一件(因為剛放低飯碗之嘛)蘿蔔糕等佢試下啦.
好啦, 到9點幾食消夜啦, 2隻野食完件蘿蔔糕之後, 仲話再食. 咁由佢啦, 叫佢地自己叫工人煎啦, 食幾多煎幾多. 數完一輪, 2隻野每一話要添 3件(我工人切到都幾厚下的), 加埋我老公一件, 咁即係total 7件啦. 過左一陣, 我入廚房, 工人同我講話煎晒全部了, 因為餘下的都係 8件, 所以費事淨番一件啦.
再諗一諗, 底蘿蔔糕係新開既, 咁即係一個消夜就食晒一底四方形的蘿蔔糕, 真係跨張!!! 記住喎, 係仲有連埋蔔著糖水一齊食的喎, 我都唔明點解 2隻野可以食到咁多野的. 8點3先放低筷子, 9點半就每一食起碼1/3底糕+糖水........ 但係又唔見佢地肥同高左喎!!!
今日係年初一, 一路已經好小心啦, 費事做野出錯俾人鬧啦.
一路都無野, 點知..........到差唔多出門口, 咁我咪問我老公, 仲有無野要係房攞呀, 佢話無, 咁我咪鎖房門囖, 費事一陣唔記得鎖, 但係我地又遲過工人番黎啦.
一鎖度門, clark 一聲響, 我突然記得..........我無鎖匙呀!!!! 我換手袋時好似無ling過條key 放入個出街袋度. 我即刻問我老公有無鎖匙啦, 佢答我無呀, 只係得大門key (因為佢懶, 所以只帶大門2條key, 將房門那條放低係房入面). 一聽到佢咁答我........................................................... 即刻好愁啦. 又要搵人開鎖, 又破財啦!!
出門口後, 我老公行去睇下邊間開鎖佬有開, 當然係無啦. 我記番起幾年前個舊工人反鎖左我個細既(當時未夠一歲, 仲要係無開燈)係房, 我那次夜晚8點幾落街搵開鎖佬(我老公當時出左街)上黎開門. 我記得佢係要整爛個鎖換個新的.
所以我就叫我老公我地自己整爛佢便可啦, 今日初一, 搵到人同我地開, 都被人禁住搶啦, 無1000蚊都落唔到樓.
我地預左今晚訓廳(因為今日初一唔可以鑿野, 要等初二開左年先得喎. 都算啦.......訓廳就訓廳啦, 好過無啦啦side 1000蚊呀.
後來佢姐夫話可以試下用地鐵飛黎開, 有d人得既. then 我記番起我表弟以前都試過係得架, 我親眼見過幾次的.
到睇完戲食完飯番黎屋企, 當然買埋最緊要既地鐵飛番黎啦. 我老公試左一陣都唔得, 眼見張飛都俾佢搞到爛啦. 又灣左又曲晒. 我見佢整極都唔得(其實當時已經諗住.........整爛把鎖佢), 咁我咪攞張飛黎試下整囖. 試左 2分鐘度, clark一聲, 開到呀)))))))))))))))))))))))))))))) 我當時就即刻大叫 - 開到啦))))))))))))))))))) 好彩啦, 唔駛搵人開鎖啦.
後來我開番度門之後, 個感覺係好耐無見過我間房. 我再試多次用張飛黎開度門, 好快又得左. 後來我教我d 細路啦, 傍下身都好呀, 但係我已經再開唔到了. 我即刻放番條key 入個出街袋度.........
經過今次, 我會放一套spare key 係亞e 屋企啦, 起碼有咩萬一都唔駛怕呀!!!
今日係2010年虎年既年初一, 第一餐飯要食齋喎, 所以.......... 真係好有難度. 因為平時餐餐都有肉既我, 要全部齋.......... 仲要有湯.......... 我都真係第一次煲齋湯.
尋日整蘿蔔糕時用整左d 白蘿蔔, 所以就煲南北杏密棗陳皮紅蘿蔔, 青蘿蔔, 白蘿蔔湯.
初一菜單 - 全齋宴
1. 包蘿萬有湯
2. 發財知足炆 don't 沽 (工人整既)
3. 生財
4. 節瓜生根豆卜冬菇炆芋絲
登登登登, 2010年虎年既蘿蔔糕正式登場. 由於太多野做, 今年只係整左 3底咋. 年糕同椰汁鯉魚年糕都唔夠時間整了!!
***************************************************************
今日係2月18日, 剛剛第一次食呢d蘿蔔糕, 好味呀, 係林左少少.
**********************************************************************
尋晚2月18日晚又煎蘿蔔糕做消夜, 今次開另一底, 個斬硬度係好perfect喎. 最奇既係我落粉每一底都係一樣的, 咁why呢? 我估可能係d 蘿蔔出水既程度唔同既問題, 因為我記得有一底係特別多水架. 我諗係呢個原因啩.
呢d 真係比我前幾日食既 x 心 蘿蔔糕差唔多, 所以我今次好滿意.
上次整左薑蔥煀, 後來再問那舊同事, 佢講多一個全雞既做法俾我聽.
見今日團年有隻雞會好d, 所以就試下佢講既呢個整法啦.
剛剛食左團年飯啦, 隻雞個味........ 幾好味, 但係無咩特別, 似貴妃雞咁上下. 今次都隻雞唔夠上次整齊呀.
* 我依然無法一次過就整得熟晒隻雞......... 我再問下我舊同事先.
團年飯預告
舊年第一次整完豬手, 由於聽日食齋, 所以今日又整多餐豬手啦.
雖然剛剛炆好就即刻食, 但係都幾好味喎, 夠晒林, 老公都話幾好食. 呢度一隻豬手, 食剩 1/3度啦. 因為d細路唔食的.
團年飯菜單
南乳花生炆豬手
蒸筍殼魚
紅棗杞子雞
蒸桂花魚
南杏北杏密棗西洋菜陳腎豬骨湯
用緊同類型既機, 若無一個cup 好蓋才可以開動機器的安全制設計既話, 請留意以下事件.
昨晚整腰果露. 煲好晒d 腰果之後發覺個煲 燶左d同埋無咩水淨番係度.
咁唯有先將d腰果同水倒左入部機先, 再煲多次水啦. 煲好之後, 倒入機, 發現d 水點到d 燶既地方, d 燶會跟埋d 水一齊的.
所以想將之前的腰果水同新既水由機倒番晒出黎. 但係因為係機既水好熱, 我又怕熱的, 所以唔夠力開到個壺出黎. 咁自然就用個身借下力啦, 就係咁........... 突然間 我全身濕晒.... 當時個腦一片空白都唔知發生咩事. 定落黎先知道係因為工人插左插蘇, 我個身 high 到其中一個制, 所以部機開動了, 令到所有既水飛晒出黎.
由於我今次整既係腰果露, 所以入面個d全部都係大滾水黎的. 我又著左件v 領既衫, 咁d 大滾水飛左去我個面, 口, 手再由個v 領直入我個身度.
我去廁所換衫時先見到全部紅晒, 到個時先識得痛. 那種痛係好興的痛(灼傷), 即刻call 老公番黎.
好彩我屋企有紫雲膏, 先沖一沖個傷口, 即刻查左先. 到我老公番黎, 佢話佢姐夫話用孖精 (燒酒) 不停咁沖會可以將d 熱吸番出黎喎. 沖個時係舒服左d. 但係沖完之後又痛番.
今朝起身, 好彩已紅大部份無咁痛了, 只淨番對手 同口 都仲有痛.
總結: 要養成一個習慣, 放好晒所有材料先插插蘇, 這樣可減低意外的發生.
先記下想整既食譜, 遲d 慢慢試.
材料:
1. 蓮子 (去皮及去心)
2. 桂圓肉(龍眼干)
3. 紅早 (去核)
4. 碎冰糖
5. 水
做法:
1. 先將蓮子去皮去心後洗淨, 備用.
2. 將紅早去桃後洗淨, 備用.
3. 桂圓洗淨, 備用.
4. 將上述 #1, #2 及#3項一同用水(#5) 浸半小時浸半小時.
5. 連同浸 #4 再加冰糖, 所有材料連浸的水一同煲 15分鐘 - 20分鐘.
6. 煲完後, 將所有水連材料倒入機內打2分多鐘便可.
今朝一回到公司, 睇到老細發給我的電郵, 叫我3月出trip.............唉...............簡直係晴天picnic!!!
個心係千萬個唔想去, 但係職責上我必須要去.
日期仲要撞正係個大既去interview之前一, 兩wk...........原本想係呢段時間幫佢加操的, 但係而家做唔到不特意, 應該個屋企無我係度會亂晒龍tim!!!
我仲未覆我老細, 因為我真係需要時間去消化呢件事!! 唉.......唉.........唉!!!
********************************************************
覆左我老細啦, 但係覆左之後佢又呢樣又嗰樣, 好叉煩. 我又要因為呢個歐洲 trip買過d 衫同鞋. 因為那邊好凍嘛, 我老細又一定唔俾著羽絨去, 話唔 formal 喎. 所以我係年三十晚要去撲鞋, 否則, 就一定要著對boot去了, 但係我老細又話 boot 唔formal 喎!!! 去一個trip 無allowance 仲要自己貼錢買好多野!!!
呢間公司出親trip都好變態的呀, 我試過 要度晨 5點起身, 因為5點幾要係酒店lobby 度上公司車了.
又試過 4 日內來回澳洲. 星期一仲番緊工, 4點零5點坐車去機場, 係機場食飯, 然後上機. 搭10個鐘頭機(全程訓唔著)去到係澳洲零晨4, 5點. 再搭的士去機場, 因為無book房 (要中午12點先放房的, 只係人地酒店有多餘房就可以提早俾我地check in), 所以係酒店lobby 等房. 逐間逐間咁等, 到我有房時(最後一間)都已經7點了. 上到去放低野, 只能訓15分鐘 就要係lobby 集合食早餐開工了. 每朝都係7點9, 8點 集合食早餐, 做完成日同埋佢地一齊食飯, 然後又話去 check email, 搞完晒都已經10點幾11點了. 番到房仲要沖涼整埋d 手尾先可以訓.
今次去歐洲仲要有時差, lunch 同dinner仲要同埋d 客一齊食飯.............唉........... 我番到黎實得番半條人命啦........訓覺係我既第一生命呀!!!
成世人都無諗過整牛展的, 唔係唔食, 只係..... 又唔係特別鐘意食咁啦.
因為上次原本整牛腩, 點知發雞盲無睇清楚, 買左舊牛展番黎. 都買左番黎落, 局住要整啦. 其實都買左成個幾月了, 一路都逃避, 因為.........唔知點整嘛.
後來個同事話卥水咪得law, 咁我咪暫且記住先啦.
今朝起身, 見到個天色就唔開胃, 最憎落雨的, 諗左個幾鐘, 最後都係決定唔出街, 所以咪係屋企摷下有咩餸好煮啦.
好快諗到 彊蔥雞, 卥水牛展同銀川菜, 煲個冬瓜湯, 又一餐了. 只係叫工人買一隻冰鮮雞, 買1蚊蔥, 買2斤冬瓜就搞掂.
整完出黎........嘩.........真係超簡單, 超容易, 最啱超懶一族. 個味仲好正tim. d 卥水汁係人地自己diy整的, 唔係李x記個d, 真係香d架喎.
又一次証明..........好多餸無想像中咁覆雜難食的. 我地成日都以為, 以為, 以為only.
唔知係咪叫工人切得太簿, 煮完出黎卷埋晒的. 我見出面街賣的係一塊塊平晒的.
上個wk 買左d 新既矽膠模, 因為要prove 佢好唔好用, 所以雖然今日都少倦, 但係都整埋個muffin 黎試下d 新模啦.
上次用呢d 模黎整海棉蛋糕, 但係......... 唔可以完整咁出到晒個樣的. 所以今多次機會佢.
今次叫做有個型, 但係入面d 樣(見下圖)係睇唔到的, 所以決定放棄了. 同一樣既muffin, 我上面既心型模(係另一模頭買的)係唔會痴住架, 但係下面那3個大模全部都有d 痴住個面的.
呢間舖頭(佢自己既專門店)係上環既維德廣場的, 雖然而家有65折, 但係整唔到個樣出黎, 唔駛$ 都無用, 一場歡喜一埸空. 唔再買佢既矽膠模啦. 呢個牌子係 le 字頭的. 你地真係想要試下, 都係買一個試左先好再買了. 否則好似我咁......... side 錢又side 心機.
今次又用左另一個食譜, 又睇下出黎效果點.
今次d色水好d, 唔會太黑又唔太白了. 聞到都好香. 今晚煎黎做消夜(話消夜, 其實都係9點幾就食的)或聽朝用黎做早餐.
********************************************
試左了, 今次又唔夠喊tim.......可能係上次既陰影....... 但係今次個質感都好ok, 唔太林了. 下次根番呢個食譜改少少粉既數量便可.
成日都覺得今晚係 fri night, 個心仍住聽日就係 sat 咁.
好想快d 到sat可以再玩呢部機. 呢2日都係全靠呢條片, 當我唔開心時睇呢個新玩具條片就可以令我笑番.
上次雪完之後 d 蘿蔔糕都係林左d. 所以今次要加 d粉去試.
下個 sat 就係年三十, 係正式整幾底蘿蔔糕既大日子, 所以今個星期六既實驗要成功呀!!
yeah!!! 又可以玩呢個玩具啦..............
講真, 除左整蘿蔔糕, 我都唔知呢部機仲有咩更好既用途. 好彩佢有埋個攪伴器那個壺(我諗係咁叫啩). 我遲d 可以用佢黎整我既另一至愛----> 磨菇湯(其實我唔識整架, 到時上網搵下食譜問下人啦). 雖然empress 那一部都一樣整到, 但係我唔鐘意d 油既野同唔油既野用埋同一個壺. 所以那部都係專心用黎整果汁/甜品好d.
