今晚食咩餸 - 2011年9月4日

唔好以為有人黎食飯, 都係我地幾個人ONLY.  只係因為D野平又想食, 所以買下買下就買左咁多啦!! (其實我連聽日既餸同湯都一次過買埋, 拎到手都跛!!)

1. 果皮蒸鮑魚仔 - 工人 (d 鮑魚仔好爽脆, 好好味!)

2. 薑蔥炒蟹 - 工人 (今次d蟹無咁多肉)

3. 自家制燒肉 (個皮唔得, 但係D肉就好好味, D 肥肉係溶化的, 一D都唔溜) - 我

4. 紅酒燴牛尾 (只試少少, 其他留番聽晚食) - 我

5. 蝦仁炒蛋 - 工人 (我只係食左2啖咋, 所以無咩感覺)

6. 清蒸白花仔 - 工人 (掛住食其他餸, 無咩食呢碟)

7. 湯- 金銀菜豬骨湯 (今次買左D 燒豬骨 +  普通豬骨一齊煲, 香好多) - 工人 (d湯好正, 好香)

8. 豉油一碟 - 工人 (只係因為費事7碟餸, 所以加多碟豉油啫)

明天預告:

1. 青椒矮瓜釀鯪魚肉

2. 紅酒燴牛尾 (今日煮左等佢入味D)

3. 清蒸白花仔 (今日買左夠2餐)

4. 腐乳炒通菜

5. 湯- 蕃茄梳蘿魚湯

蘋果酥 - 個皮唔合格

個餡就好食, 我減左個食譜入面既糖, 所以唔會太甜, 剛剛好. 但係個皮呢............ 個口收得唔好, 收完都爆口, 同埋焗得唔夠脆, 下次再整既話, 要研究下點可以好D先.

紅酒燴牛尾

煮呢個餸只係得一個原因, 就係...........我想清左雪櫃枝紅酒佢. 枝紅酒係舊年3月係瑞士買番黎的, 貪佢細細枝, 一次用一枝唔駛開左之後走晒d味. 而家雪櫃都仍然好似有2枝紅酒係度. 下次又要再諗下點樣清埋佢先.

呢個餸係一本新買既食譜入面搵到既, 呢本食譜好正, 上星期三叫工人整左個粟米魚肚羹, 幾ok喎.  跟住今日lunch唔知食咩好, 又打開黎睇下有咩揀, 揀左個美極香蒜香草意粉,呢個意粉真係好有驚喜, 因為我係好憎美極個陣味的, 但係d 意粉煮出黎serve時聞到好香, 食落好正添. 連2隻野都話個意粉好好味. 而家將呢個意粉加左入佢地既lunch menu到replace其中一個佢地唔太鐘意食既, 又可以無咁悶啦. 呢個意粉個味係好西既, 配牛排最fit.

講番呢個燴牛尾, 係pk買左幾件牛尾已經要61蚊了, 呢度係1磅11安士度啦, 因為係37蚊一磅. 原食譜係要用蕃茄醬的, 但係我費事開一罐之後又放係雪櫃, 咁啱我係街市買既蕃茄又有多, 所以就用左3個黎代替佢.  個味係好西既, 即係有d似飲牛尾湯咁, 所以d 紅蘿蔔最好味, 蚊左2個幾鐘, 夠晒入味. 

亞嗲唔鐘意食, 因為好西, 佢係prefer食中既人黎的.  d 紅蘿蔔就差不多俾小冰食晒咁滯, 因為佢同我都係好鐘意食紅蘿蔔的.  叫大兵食, 佢又話d牛尾un, 但係我食係無問題喎. 聽晚再試下先, d牛尾個味就真係未夠入尾, 所以留番聽日食係明智之舉!