尋晚再係網上search下仲有咩豬肉鬆可以整, 搵到咖喱味, 2隻野一聽到咖哩即係話: 吓!! 我無理佢地, 決定試一試, 再加埋小冰order既紫菜就變成上面呢一碟好靚既紫菜咖哩豬肉絲了(點解叫豬肉絲, 因為我覺得佢唔似鬆, 叫絲會match d).
食完出黎試食, 嘩, 呢個好味好多呀, 完全係有意外驚喜既, 今日呢個咖哩豬肉絲再加埋紫菜既香口, 真係似街買番黎個d呀, 小冰係咁食, 係咁食, 我要佢stop 留番d 俾亞嗲同大兵食. 個死野係就係收口呀, 但係原來佢又走去開尋晚那包五香豬肉絲黎食. 呢個咖哩味真係強烈推介, 一定要試下整呀!!
我將個食譜改左d野, 我轉用蒜鹽, 同埋老抽減左好多下, 但出黎既色水就係我最想要既色了, 尋日那個五香豬肉絲太深色了.
材料:
1. 瘦肉 170g
2. 糖 20g
3. 蒜鹽 5g
4. 咖哩粉 11g
5. 老抽 5g
6. 紫菜 一包細
做法:
1. 將燉完既瘦肉拆散晒佢, 我就用手撕幼條.
2. 將上述#2 - #5放晒入麵包兜內.
3. 將已撕幼的瘦肉絲放在其他材料上.
4. 開機, 選JAM, 然後禁START.
5. 部機會顯示為1:20 (即係製作時間為1小時20分鐘).
6. 夠鐘部機會有聲提你已完成, 熄機後, 將豬肉鬆倒出, 放涼.
7. 待豬肉絲完全放涼後, 可將紫菜剪碎, 再撈暈晒2樣野便可入樽了.
Tips:
1. 千奇唔好將D 紫菜放入部機到一齊攪, 否則D紫菜會由脆變成林左的. (我試過奶左野啦(有相為証), 好彩仲有半包紫菜淨, 再後加入去咋.)
最近睇到有人用麵包機整豬肉鬆, 一睇到雙眼即刻閃晒, 因為覺得好好玩, 從來無諗過麵包機可以做到呢樣野喎, 真神奇! 不過, 睇完都係個句, 搵日試下先, 無諗過呢一日係幾時喎.
到今朝起身開機睇野, 無啦啦又見到有人用麵包機整左, 仲要係用象印添, 就係咁..............係無預謀既情況下, 我豁左出去整左呢個豬肉鬆了. 豁出去既原因係, 整豬肉鬆之前係將D豬肉燉左瘦肉汁先, 用完就將呢D 無用既瘦肉要黎整豬肉鬆既, 真係物盡其用, 完全無浪費D食物, 諗到既人真係勁!
大兵同小冰都話好食, 亞嗲都話好食. 我就覺得中上啦, 梗係無街買個D咁好食啦(因為無落味精嘛, 咪無咁好食囉), 但係以唔駛炒黎講, 算係好滿意了. 我仲有另一份瘦肉未整, 小冰話想食紫菜豬肉鬆, 所以聽日那一機就試下整柴菜咖哩豬肉鬆啦.
材料: (我將原食譜改左極少, 因為將佢變晒做整數, 免煩!)
1. 瘦肉 250g
2. 糖 30g
3. 鹽 5g
4. 五香粉 5g
5. 老抽 12g
做法:
1. 將燉完既瘦肉拆散晒佢, 我就用手撕幼條.
2. 將上述#2 - #5放晒入麵包兜內.
3. 將已撕幼的瘦肉絲放在其他材料上.
4. 開機, 選JAM, 然後禁START.
5. 部機會顯示為1:20 (即係製作時間為1小時20分鐘).
6. 夠鐘部機會有聲提你已完成, 熄機後, 將豬肉鬆倒出, 放涼後入玻璃樽可存放1星期.
*今日我問亞嗲, 部麵包機係咪好抵呀? 可以整到咁多野食出黎, 亞嗲都話抵呀, 我一早都話抵架啦! (頂佢, 扮晒野!!)
由於我要玩用麵包機整豬肉鬆, 所以就即刻仆去街市買瘦肉番黎燉呢個瘦肉汁啦. 因為我之前個電除燉盅掉鬼左, 所以又即刻去家品店想個普通燉盅, 因為我想用LC煲黎燉, 慳番D火同快D 燉完嘛. 但係我去左2間家品店都搵唔到啱高度既燉盅, 所以就番屋企自己試下用個湯碗黎砌, 睇下砌唔砌到出黎, 點知又OK喎, 俾我搵到隻PERFECT既日本碗, 斜身既, 一流. 就係咁, 我就唔駛再落街買燉盅了.
由於個湯碗唔大, 所以我買左$50既瘦肉要分開2次黎燉(見2張燉完出黎既汁既相), 做法就依住上面D 相既次序去做便可. 先大火燉15分鐘, 然後轉中細火再燉1個鐘零45分鐘便可. 飲既時候可加鹽或唔加均可.
用LC煲除左慳火(即係慳電啦)之外, 仲因為佢能夠鎖水, 所以我D水由最初開始, 到燉完都唔駛加水的, 可以免除成日要睇火加水呢個麻煩.
呢$50瘦肉除左燉到上面呢2碗瘦肉汁之外, 仲有以下2碟豬肉鬆, 1碟係五香豬肉鬆, 另1碟係紫菜咖哩豬肉鬆, 用象印麵包機整的, 非常好玩呀! 又可以徹底用晒D食材, 又可以多一樣小食, 最麻煩就係要用手撕碎晒D肉, 否則, 真係PERFECT架. 等我下次試下改良下睇下得唔得先!
