Happypiano168: 4月 2013

2013年4月29日星期一

君怡酒店下午茶自助餐

呢個BUFFET最想講既野係……………………………..我同亞嗲又再次大家不約而同地諗埋同一樣野. EASTER假期前兩三日, 我突然間好想食自助餐, 所以就諗住放假去食啦, 但係因為好Q多野做, 所以一路都未得閒去睇下食邊間. UNTIL 到放假前一日中午, 亞嗲WHATSAPP我, 而係我未睇到佢SENT左咩俾我時, 我其實係到打緊野想WHATSAPP佢,
我想講既係, 打算聽日食LUNCH BUFFET或TEA BUFFT (原因係我想要好休閒既感覺, 可以慢慢食(其實識我既人都知我一向食野夠晒慢的), 好HEA, 好HEA唔駛再趕頭趕命!! 就係我差唔多打完之制, …………………. 我電話響, 原來係亞嗲打黎.
我問佢: 做咩呀? 嗲: 你睇唔到我既WHATSAPP咩? 我: 無喎 (心諗, 好費神咁打緊字俾你嘛, 點睇到啫).
做咩呀? 嗲: 聽日去食BUFFET好嗎? 我: 吓, 你話食咩話?
嗲: BUFFET呀, 好耐無去食嘛, 所以想去食.
我: ………… 嗲: 點呀? 你唔想去呀? 我: 唔係……….. 你收線先啦, 你睇下我打緊D咩俾你, 你睇完先再講啦.

最後, 當亞嗲收到WHATSAPP之後話, 你又係想去食呀?
我: 係呀!!! 點解我同你係差唔多同一時間大家都講呢樣野俾對方聽既??!!!

黎到我上網去開飯睇下有邊間可以去啦, 點知............打親去都話FULL晒,又難怪既咁遲先話去食. 終於俾我搵到呢間仲有位, 都諗住.......咁都有位都唔會好得去邊, 但我真係想去食自助餐(我想要HEA!!), 所以都照殺. 2點半開始, 我成12點頭先BOOK到位咋.

出奇地, 呢一餐食得開心喎, 可能無期望就唔會有失望. 環境好, 因為唔迫, 亦唔太多人, 大約7成滿啦, 無大陸人, 所以無人搶野食, 全部係都好休閒咁係到食野, 唔嘈吵, 幾靜下. 去到食緊先知道原來2個大人就1個小童免費. 突左出黎既大兵都有8折定85折, 真係超抵. 4個人先至4XX蚊咋, 非常抵坐.

基於咁平既關係, 所以食物種類唔多, 但我覺得fair. d野食基本上係唔差架, ok好味的, 只係平凡d咁囉, 但係cwb茶餐聽都要60, 70蚊一個人既日子, 可以100蚊鬆d食到自助餐我覺得佢係物有所值啦.

2013年4月18日星期四

今晚食咩餸 - 2013年4月17日

由於唔知煮咩餸好, 正當我極頭痛之際, 突然間諗起..................好耐無食芽菜仔, 但又唔想淨係炒芽菜仔, 咁搵咩黎炒佢好呢??? 登登登登, 俾我諗到用午餐肉炒, 既可以清一罐午餐肉又可以唔係齋炒芽菜仔啦!

做人真係矛盾, 又要係未清晒倉之前買定, 但係買得多又要想清左D貨佢, 搵黎搞!

** 唔記得左講, 呢碟菜應該無記錯係小冰炒的.

順興滷水鵝@西灣河

由於特然間....................身痕, 所以想食呢間野既滷水鵝, 好耐無食了, 佢開開開時日日排長龍的.

特登叫我媽幫我去買, 一打開已經聞到香味, 再咬一啖, 嘩好味呀! 佢個質感係鬆軟, 入味但又唔係得個咸字, 又唔 UN, 所以俾個LIKE佢. 筲箕灣街市那一檔相對地差過佢好多. 咪睇佢細細盒, 小冰講我先知成9X蚊, 真係幾貴, 下次都係買滷水鴨好了, 否則唔可以食密D.

2013年4月15日星期一

今晚食咩餸 - 2013年4月14日 (九唔搭八又一餐!!!)

盒酸齋其實都係無預謀地買的, 原來係行去買砵仔糕食, 點知就路經呢間齋舖, 所以就諗住買酸齋做餸啦. 我同小冰一人揀一樣, 其他既咩都唔要, 正!!

搭車番屋企時都未諗到食咩, 入左街市之後無啦啦買左椰菜, 諗住用黎炒鴨胸啦. 點知, 行唔夠兩步突然間覺得我都係唔想食飯, 所以改行煮意粉.
咁諗住屋企咩料都齊晒, 所以就小冰大步大步咁行番屋企啦.

番到屋企先發現, 原來無呢樣個樣, 所以就打電話俾亞嗲叫佢買番黎啦. 所以最後, 晚餐就變左意粉加酸齋了, 食起黎又真係幾九唔搭八的呀!!

2013年4月6日星期六

我們應該感恩!

尋晚聽到新聞話香港有個細路女懷疑染上H7N9, 雖然都覺得慘, 但之後聽到高永文話若真係確診既話就會進行殺禽行動. 一聽到呢句我當堂心諗: 又要殺晒全部雞呀? 次次有咩事第一時間就係大屠殺!! 我明, 我理解咁樣係一個好既方法去減低傳播既機會, 只係, 雞都有生命的, 一次又一次既大屠殺, 其實我地真係殺生太多了!! 呢個情況我明白係唔可以婦人之仁, 只係……………我都有人性嘛, 難免覺得好慘!!

今日好緊張的要去睇報紙, 好開心見到那細路女無事, 更開心既係唔駛大屠殺啦!! 希望香港呢塊福地今次可以置身於事外, 無任何人會染病啦!! 今日唔駛殺雞, 好感恩!!

2013年4月5日星期五

今晚食咩餸 - 2013年4月4日 XO醬炒飯

由於懶, 所以就盡情地懶, 只係整炒飯就算了, 正宗大镬飯是也!!

2013年4月2日星期二

今晚食咩餸 - 2013年4月1日

由於個冰箱俾亞嗲搞到差唔多爆, 所以就好似8號風球打到黎咁, 想清D野佢啦, 費事一陣2隻野關唔實度門D野溶晒, 到時就大镬了。

呢盒帶子由農曆新年前到而家都未郁過, 原因好簡單, 就係唔知點煮, 怕浪費左D野嘛!!! 但迫到埋身時都無計, 一盒有成30粒, 所以分好3份, 今次先煮一份試下先。

一路都諗住上網摷食譜, 點知, me me mor mor 搞到完全無時間去摷, 無辦法啦, 咁唯有駛出我既強項……………膽粗粗亂黎啦。記象中係街食過係有D咩就試下用黎煮啦,加D乾蔥, 蒜頭, 薑呢D野黎炒. 煮完出黎又出奇地OK喎, 幾野味喎。下次可以繼續呢個方法再煮埋其他2份帶了LU。

今日無啦啦買左兩隻新鮮雞, 煲湯兩隻又多得滯, 但係若留番第二日先煲又好似好白痴咁, 新鮮雞都變左冰鮮雞啦!! 最後就將D多肉既用黎蒸, 餘下一隻有多既雞就用黎煲湯, 所以D湯更鮮甜啦!! Yummy!!

下面兩張相就係今日D帶子未變身前既樣啦! 煮完都縮左起碼1/3水呀!!

復活節假期

一年之中, 唯有係復活節假期先至係真正既假期, 唔駛好似CNY咁又要執呢樣個樣, 買呢樣個樣, 準備呢樣個樣!! 又唔駛好似中秋, 做冬等等要食飯!! 又唔駛好似聖誕咁要去玩!! 難得可以完全唔駛同人接觸, 可以靜靜地係屋企休息下, 又或者係一家四口鐘意去邊就邊(當然啦, 因為95%去邊到都係我話事的, 亞嗲從來都無所胃(定係無好提意呢??)!

今個復活節我同亞嗲全程都係分房訓, 原因係亞嗲都繼續要番工, 所以我就叫佢去小冰張床訓, 咁樣可以俾我訓晏D, 唔駛佢嘈醒我. 而小冰就好開心咁搬家, 將佢D枕頭呀, 被呀, D公仔呀搬晒過黎.

第一晚成鬼日被佢踢到我, 所以醒左幾次, 又見佢”負”晒D被, 所以又成鬼日要同佢被番好. 第二朝起身時鬧鬼佢啦, 叫佢訓得好D, 咪成鬼日踢人啦.

第二晚又係咁. 到第三晚訓之前, 開始慣左要被佢踢啦. 點知嗰晚個死野仲狼死, 訓訓下想訓上我塊面度, 我即刻推鬼開佢啦. 係佢想訓上黎我塊面既時候我係醒左, 所以睇得好清楚佢係訓緊的, 而當我推開佢之後, 佢仍然係訓緊, 成個過程完全無醒過, 變態的佢就訓到死豬咁, 難為我就眼光光訓唔著!! 第二朝又鬧個死野啦, 佢一聽到就笑到停唔到口!! 哼!!