今晚訓唔著覺, 應該都係因為以下呢件事所致! 我諗訓唔著既唔止我一個!!!
呢排公司都好忙, 今日亦唔例外! 搞呢搞路, 試野, 無啦啦係3點幾4點時收到女同事話我知, 另一個同事Y要在下星期一動手術將一隻眼監生電盲佢(我同事係用"電"呢個字, 我唔知係咪即係LASER). 一聽到個下真係呆左, 雖然女同事都話Y有壞消息, 但係點壞消息極都唔會諗到要盲左一隻眼!!!
雖然Y對眼不嬲唔好, 前幾個月有一隻眼因為眼底無啦啦生左條血管出黎, 搞到充血, 醫生要佢打針, 足足打左4支, 到今年2月打埋第4支之後, 醫生話可以停, 血管無再充血了. 跟住只係定期叫佢去覆診. Y 話俾我知唔駛再打針, 我聽到都好開心, 因為我怕痛嘛, 我聽到都覺得好痛, 所以都希望Y快D無事唔駛再打. 呢D支打一支要8000蚊, 都算了, 初頭話打3支為一個療程, 打打下又話, 若控制唔到都要繼續打, 打到隻眼有改善先可以停(大佬, 咁即係好似無止境咁打, 痛都痛死啦!) 今日就係覆診之嘛, 呢排都無聽到佢話眼隻再有咩事.
我聽完女同事講, 重覆再講佢要整盲一隻眼, 我雖然明知個答案, 但我都照樣問女同事, 我地有咩可以幫到佢呀? 女同事好無奈兼夾已經喊左出黎答我: 無呀!!! 跟住我又再半自言自語咁問女同事: 點解會咁架? 明明好地地無野架, 點解突然間要整盲佢呀?!! 跟住女同事答: 醫生話, 若而家唔電盲呢隻眼, 怕過多年幾會野埋另一隻眼, 到時2隻眼都會盲的!! 我聽完之後更加"憾"入更不能相信既情況. 我又再半自言自語咁問女同事: 點解呀? 點解個天要咁對Y呀? Y 從來都無害人, 佢永遠只有幫人, 係一個YES MAN, 點解要佢受呢D苦呀?!! 女同事聽完都無言無答我(佢仲係默默咁飲泣緊).
跟住, 我同女同事講, 我話: 不如我同我老細講Y既情況呀, 叫佢唔好迫佢做咁多野要咁快交呀? (因為呢排公司又有事發生, 所有野幾單大野一齊堆埋黎, 所以Y 都真係做到隻野咁, 佢同我地熟個D同事面前都有"呻"話好多野做, 又趕!) 女同事話: Y 一陣番黎開會, 都會同你老細講的. 我: 但係我................ 我無野可以幫到Y, 我只係諗到我幫手同老細講, 希望多個人同老細講個情況, 老細可以體諒下. 雖然我唔知Y想唔想我知呢件事, 但係........點都好, 我想幫Y做D野, ALTHOUGH 其實我幫唔到佢D咩. 但係心裏叫做好過一點. 女同事答我: 你咪講囉, 反正佢(老細)一陣都會知的. 我: 咁不如你又打俾另一個老細(另一單野), 叫佢唔好催Y 交貨呀? 女同事答: 好呀, 我打俾佢呀.
跟住, 咁橋, 我老細叫我, 問我係咪頭先有野搵佢. 我話係, 不過(呢個時候我已經喊左出黎)我想講另一樣野先. 老細話: 好呀. 跟住我就一路喊(唔係勁喊, 只係忍唔住喊左出黎啫)一路同我老細講Y既情況. 老細話: 我知佢要做手術呀, 我剛剛先同佢講完電話. 我: 佢要做那個手術就係要整盲隻眼呀! 老細: 我呢邊無咩野催佢呀, 催佢既係另一個老細叫佢交既貨. 我試下打去同那邊講睇下可唔可以拖下. 我點頭示意好呀!
跟住我同老細係到講Y做完手術之後都唔番得黎住, 係呢段時間佢既工作點安排(因為公司呢排真係唔可以停係到, 所以同老細傾左起碼知道D野點行), 大約咁講左之後我就番番自己個位.
女同事係放工之前話Y 再打過俾佢, 話星期二做完手術之後會番黎做埋D野. 跟住女同事鬧佢(佢地好熟, 係廿幾三十年既同事了), 話叫佢千期唔好番黎, 係屋企休息起碼14日先好番黎呀. 好彩, Y聽完都話: 咁好啦. 唉...........Y 就係一個咁既人, 永遠只係為人諗, 從來都唔理自己, 所以就搞到對眼上次做完手術, 打完針之後無好好休息, 而家就出事了!! 我聽完女同事咁講, 我即刻話: 鬧爆佢啦, 佢番到黎都唔會俾佢入門口呀!! 鬧佢就啱了!!
女同事話會再打俾Y(因女同事有事趕住走), 我叫佢同Y講完電話打俾我, 等我唔駛擔心. 但係一路都收唔到電話. 我唔敢打俾女同事, 怕佢屋企本身有事要辦, 費事阻住佢啦. 諗住聽朝一早打俾佢問下情況. (我最擔心係唔知Y 自己能唔能夠接受呢件事, 我地外人, 我聽到都難以接受啦, 點左好多次點解啦!!)
老細講左話睇下星期二睇下去唔去醫院探Y, 若Y唔想我地去既(病人唔想見人係正常的), 咁送個果藍去啦. 我話, OK, 我會同女同事安排睇下點樣做係Y 最舒服既方法(可能佢真係咩都唔想我地做.........唔知呀, 總之, Y 想點就點啦, 我地閒人真係無所胃, 就佢囉).
Y真係一個好好先生黎架, 對公司, 忠心, 成日為公司擔心搞到自己都訓唔著. 對朋友, 我聽佢講佢都幫左好多人. 亦知道佢曾經借左成10萬俾一個EX同事, 那人無還到錢俾Y. Y 可以算, 唔去追佢. 而那EX同事之前係成日扮野扮有錢人的, 又老作自己係瑞士出世喎!! 可惜既係, 佢係我面前UP咩我都無反應的, 因為我唔係物質主義者, 人地有錢無錢對我黎講都係一視同仁, 唔會因為你有錢而對住你四萬咁口囉! 我個時成日聽佢係到老吹, 我只係覺得佢浪費自己時間, 同埋............我聽到好悶! 不過, 我無駁佢半句, 因為...........你鐘意點就點啦, 影響唔到我既, 我唔會浪費自己時間同人教女的(佢細我2, 3年咁上下啦).
我諗住叫女同事, 聽日同Y講, 搵個出名既眼科私家醫生再問多次係咪真係一定要做手術, 免得萬一政府那邊出錯既話, 就番唔到轉頭了!!
Y 做了大半世好人, 到了仲有3個月就退休先黎整單咁既野! 點解唔可以俾佢有D好日子過下呢??!! 做好人唔係應該有好報的嗎?? 我老公話, 可能係上一世作既孽, 所以今世黎還. 我答: 咁仲還唔夠嗎??!! (因為仲有其他不幸既事以前發生的, 我不說太多了)
我真係好想問個天, 點解唔係鼓勵人做好事, 今世做左咁多好事, 可以念在佢都幫過好多人而放過佢啦! 上天唔係有憐憫之心嗎?!! 觀音娘娘唔係慈悲為懷嗎? 點解唔幫下Y呢??!! 點解唔可以寬恕佢呢?!!
希望呢個世界有奇蹟, 希望呢個奇蹟係聽日, 最遲後日就即刻出現, 可以及時救得番Y隻眼啦! 星期一就做手術啦!!
打完晒出黎, 我自己舒服左D, 希望聽日收到消息話醫院搞錯報告, 原來唔係Y需要做手術啦! 我好亞Q, 但係只有咁諗我先至可以開心D!!! 所有大過0既都係有機會發生的呀!
