由於之前買左2, 3pack 燒豬骨番黎, 咁好正常地, 佢一定係阻住晒我雪櫃d位啦, 加上亞嗲個舊同事又俾左d菜乾我地, 舊既未清晒, 新既又黎, 所以就執行一次大規模既遞界出境大行動.
d 湯煲出黎夠晒味, 好正. 最衰既係我懶, 無將面頭d 油整走佢, 所以d湯熱到煲炸, 等好耐都仲出晒煙!!
材料:
1. 白菜乾 適量
2. 新鮮白菜 2斤 (我次次煲最少都落斤半)
3. 南北杏 適量
4. 蜜棗, 4粒
5. 燒豬骨 3條 (今次我用左4條)
6. 豬骨 隨意
7. 水 12碗(只適用於高速煲做法)
做法:
1. 先將南北杏浸15分鐘. 將蜜棗頭尾十字花咁剪開.
2. 將菜乾剪左個尾, 浸30分鐘後洗淨備用.
3. 將白菜洗淨備用.
4. 煲一小煲水將所有豬骨出水, 為左d湯無咁肥膩, 所以d骨可以出耐少少水.
5. 用高速煲煲12碗水, 將所有材料同放入高速煲內, 雙白圈計高速30分鐘. 排晒氣後, 打開蓋用最大火再煲10分鐘. 落鹽便可上檯.
