醃料:先落適量鹽, 胡椒粉, 撈勻後再加入蛋白撈勻, 放入雪櫃起碼半小時.
今日又去買餸, 又買左3斤梳羅魚同1斤紅衫魚滾湯. 再去到魚檔已經唔知買咩好, 又唔想食敏魚, 咁同亞嗲企係度諗左好耐, 見人地係度開緊一條班, 亞嗲話買佢啦. 我話: 點食呀? 亞嗲話蒸囖. 我話: 點蒸呀? (我總係覺得唔應該係蒸既, 但係又講唔出咩事. 亞嗲答我: 玩呀, 薑蔥蒸囖. 我無答佢. 問人呢條係咩斑, 人地話係 青斑. 跟住我先諗起, 人地咁樣切開係要黎炒架, 唔係要黎蒸架, 無人咁樣切黎蒸魚的. 我即時同亞嗲講: 你炒呀? (因為我懶唔想煮), 最後就決定整時菜炒斑球啦.
問人幾錢一兩啦, 6蚊喎. 咁我就估呢件野50蚊啦. 亞嗲就估呢件野60蚊. 最後埋單係84蚊. 即係成14兩(睇樣又唔覺佢咁重喎). (每次我都會當game咁玩, 睇下自己估唔估得中的, 當然今次輸晒啦, 因為差成幾兩咁多)
然後又到諗買咩菜黎炒呢?? 因為呢排d 菜心唔係好靚咁, 咁又無理由炒白菜個d架. 好彩亞嗲諗到炒西蘭花, ok 就買西蘭花啦. 就係咁, 先好辛苦咁買完第一碟餸!! 仲有2碟要諗呀!!! (仲有2包金菇要食埋佢)
最後, 今晚食:
西蘭花炒斑球 (食左啦, 都幾好味, 只係喊左少少.........因為我太耐無煮飯, 所以醃既時候落多左鹽, 鐘意d 魚身唔太林, 亦唔鞋口. 2個西蘭花原來炒起黎咁鬼大碟.)
蝦醬蒸半肥瘦 (工人出品)
蠔油鮑汁鮮冬菇金菇繪西生菜 (工人出品) (原本係炒翠肉瓜的, 因為又發現原來有成斤西生菜未食) (下次唔好落蠔油, 只落鮑汁便可啦, 而家2樣一齊落個味怪怪地)
湯: 紅衫魚湯 (工人出品)
(每碟餸都真係有血有汗呀!!)
而家仲未食得, 一陣亞嗲炒完先知好唔好食.
