香蕉蛋糕 @ 象印麵包機 (全自動整蛋糕)

\

繼提子蛋糕之後, 又一新作, 香蕉蛋糕, 呢個香蕉蛋糕真係得黎不易呀, 因為我要每日不停口咁鬧人, 先可以留到d 好熟既香蕉出黎整蛋糕咋, 我足足買左3梳香蕉, total 都有成15-16隻的, 因為亞嗲同大兵日日都揀最熟個d黎食, 咁我永遠都無熟香蕉黎整啦, 頂佢!! 

今次用番上次既食譜, 但係就改良版, 效果幾好, 無咁肥(其實都成手油呀!!!), 又唔太甜, 而家係少甜版. 但係我嚴d 蕉味未夠濃, 我見原食譜得100g, 我唔夠膽加太多, 所以加到去150g咋, 出黎係有蕉味, 但係可以更濃law, 下次又再加重d料先.

今次個蛋糕焗完出黎係唔能夠倒到出黎的, 上次係幾容易就倒得到出黎架, 今次完全唔得, 要用野整佢先可以出黎, 可能係因為減左牛油份量既關係啦. 今次個蛋糕真係無上次咁heavy啦, 小冰今朝食完一件仲問可唔可以食多件添.  另外又帶左一件放學做tea. 

都係嗰句啦, 以做咁少野黎講,個蛋糕算係咁了, 起碼我唔駛做餐死, 又唔駛洗餐死就有得食呀! 所以我係滿意收晒貨的. 而家又好似買左樣新玩具咁, 又研究下佢仲有咩玩先(即係仲有咩蛋糕可以整).  一定要改良既係, 而家整出黎既份量太少, 切晒4邊燶既皮得番5件咋, 3個人食都唔夠分. 所以下次要加大個份量先.  同埋下次我會加番少少鹽的.

材料:
1. 牛奶 30g
2. 蛋 2隻 or 100g (打散佢)
3. 糖 70g (比原食譜減左10g的)
4. 無鹽牛油 70g (比原食譜減左100g的)
5. 低筋粉 180g
6. 泡打粉 7g
7. 香蕉 150g (壓成茸)

做法:
1. 將牛油從雪櫃取出, 放一陣, 見佢開始溶, 然後將牛油切成小粒(最大係1cm既立方體咁大)備用. 
2. 將所有液體+糖放入麵包兜內.
3. 將牛油放入麵包兜內.
4. 將所有粉過篩, 然後放入麵包兜內.
5. 選cake mode, 揀light crust, 然後禁start.
6. 幾分鐘後, 佢會beep beep聲, 你就用把膠刀將則邊d粉篤番晒落去堆麵團到. 再加埋d 香蕉茸然後再禁多次start, 跟住1小時25分鐘後個蛋糕就可以出爐了.