尋日我同亞嗲又走去問d殯儀野諗住落訂啦, 一問問左差不多2粒鐘(因為關乎錢銀又無其他屋企人同亞嗲一齊做, 怕易生誤會, 所以d收費問得比較仔細, 盡量按原本問到既價錢做妥佢, 怕到時用多左錢人地以為我地落袋. 我好怕呢d野, 無野就無野, 有人有野講就多事.大家都知呢個世界上咩人都有, 有好多人更加係野就唔做, 但就好多野講的.我唔係話佢屋企人一定係咁, 只係……唔怕一萬啦, 多一事不如少一事啦, 盡量唔好俾機會佢發生啦.), 坐到我想死, 因為我病緊好倦又肚餓, 亞嗲問完又問, 有排都未做既又問定先!!
那個中介問亞嗲62火化完之後會唔會放係屋企, 亞嗲聽完話唔會啦, 等抽政府d位啦. 跟住人地話唔係呀, 唔係指骨灰盅, 係講緊屋企個神位呀. 我幫手解釋: 係放張相係屋企裝香個d呀. 亞嗲話: 哦, 個d呀. (咁就繼續講啦) 過左一輪, 又講番呢個問題, 亞嗲又話: 個灰位唔擺係屋企. 我話: 唔係講個骨灰盅呀, 係講個神位呀, 有張相係屋企裝香個d呀. 人地個agent個樣係 “頭先咪講左, 你明左啦, 而家又番轉頭唔明既?” 我同個agent講, 佢係咁架啦, 我番屋企會再解釋俾佢聽的. 得架啦, 講第2樣啦. (……… 對住d講極都唔明你講咩既人真係想死!! 最慘係只係d咁簡單既野, 而佢又講自己識拜神, 識擇日既人喎!! )
番到屋企食完飯, 亞嗲就打俾99, 按照人地教既叫99整個門口土地啦, 等62回魂個晚可以番屋企. 講得兩講, 99居然cup左亞嗲個電話, 原因係嚴亞嗲煩, 叫佢做咁多野. 亞嗲個刻係o晒咀架, 佢個表情係 “我做錯d咩呀?無啦啦做咩cup我線呀??!!!”我睇見佢個樣我即刻話: 抵你死啦, 你都有今日啦. 我上次打俾你亞媽叫佢落街行下曬下太陽, 講得兩講佢嚴我煩, 俾佢cup線, 今次輪都輪到你啦, 你受下啦.
跟住亞嗲就打俾其他人講俾佢地聽今日既新資料啦, 佢問屋企人a有關擺唔擺佢老豆神位既事, a 又係同佢一樣以為係講緊骨灰盅. 亞嗲聽到a咁講, 跟住………………… 佢居然又再次亂過, 又唔記得左係神位. 我即刻係電話傍更正佢啦. 好啦亞嗲終於明番啦, 但係a 依然都係唔明. 我話: 睇電視成日都有架啦, d人成日都係屋企對住張相裝香架啦. 跟住亞嗲照轉述俾a聽啦, a 今次終於明啦. 好啦, a明左啦, 但係就答亞嗲: 無呢d架喎.(指佢屋企不嬲都無) 我聽到就好敏話: 咁無咪就係問你地整唔整囖, 唔係個個屋企一定有架!! (大佬, 對住佢地真係好攞命!!) 我叫亞嗲同佢講, 唔係一定要整的, 唔整都得架. (亞嗲又衰既, 佢講野表達得好差, 等人地以為係一定有既野). 好啦, 又再講一d其他野, 點知, 轉頭又係度講番骨灰盅……… 即係a 又亂左啦, 又以為係骨灰盅. 我一聽到即刻雙手抱住個頭作 “想死狀”係度大叫……………… !!! 亞嗲一收線, 我即刻話: 唔駛問人都知你兩個一定係你亞媽生出黎架啦, 一樣咁死蠢的, 講9x次都唔明既!! 邊有人蠢得咁交關架. 亞嗲見到我個 “想死狀”自己都係度勁笑!!(之後, 我又要再講多一次俾佢聽咩係神位) 跟住亞嗲問我: 其實神位有咩用架? 我好大聲話: 我點知呀? 你估我係神婆呀? 我唔係讀神學架!!! 亞嗲聽完又係度勁笑, 笑到標眼水! 佢都知自己問d野白痴, 佢真係short架, 佢expect我咩都識得答佢的!! 佢仲要係成家都拜神架喎, 佢地個個都唔識, 仲要解極都唔明, 真係唔知佢地係咪真係拜神的!!
神位
亞嗲問我, 咁我地屋企擺唔擺呀? 我話: 你想擺你咪擺囖, 但係你唔好預我會整喎(我唔想有個壓力take個做一世既job). 你擺就你自己搞掂佢, 有咩要做要整就你自己整喎. 之後佢又同佢屋企人講電話啦, 講完之後又問我:咁即係我地擺唔擺呀? 我又再答佢: 你想擺你就擺啦. 總次唔好預我會幫你跟呀, 我咩都唔會做架. 亞嗲係度話: 無野要做架.有咩要做啫? 我話: 咁無野做咪無野做囖, 有野做咪你去做囖! 總之你走左(我意思係佢死鬼埋)我都唔會再擺的. 跟住亞嗲問我: 咩我走左呀? 我走去邊呀? 根住我好大聲話: 你死左呀! 我話: 你唔駛意旨推個莊俾我, 你自己決定, 唔好賴我. 你亞媽都唔擺你亞麻個位啦, 所以你擺唔擺都無問題架喎!!
上天堂事宜
亞嗲係度同99講話回魂夜會叫屋企人b買野上去放係度俾62食啦. 我99又係度話唔駛整呢d野啦, 因為62入左99個教, 係會上天堂的, 已經係地獄度除左62個名喎. 又話第時佢走左唔駛整呢d野架啦, 因為佢會上天堂的. 亞嗲收左線之後同我講番, 我聽完即刻話: 嘩, 你亞媽講到佢好似識人係上面(天堂)做咁喎, 好肯定喎. 你亞媽成日拜神會上天堂我都叫做可以信的, 但係你老豆真係唔拜神架喎, 咁真係所胃入左教就得架啦? 平時唔駛拜架? 若係咁, 就咩教都唔怕入晒佢先啦, 實無衰. 亞嗲又係度勁笑啦!!
99係度發皮四
繼上面提到99cup亞嗲線之外, 佢又係度富富氣氣咁既聲(因為叫佢做野所以又唔likely啦(無計, 咁62係同佢住所以d野一定要係99屋企做)), 亞嗲係一見到99來電顯示就怕又俾佢cup線, 叫大兵聽喎. 我話, 你咪白痴啦, 大兵聽完你亞媽咪又係叫你聽. 亞嗲頂佢唔順係度gut99話: 都話叫你個邊整架啦, 係你個邊無期咋, 唔係我迫你做我呢一邊架. 亞嗲又同屋企人a 係度呻, 話99麻煩多多野講, 屋企人a話, 佢係咁盟塞的. 我聽完之後話: 你終於知道你亞媽有幾難頂咩? 你唔係咩都話佢啱既咩? 你以前成日都以為我針對佢, 成日都因為佢而同我嘈的. 好啦, 而家你知啦, 抵你死啦! 你記住呀, 你亞媽永遠都唔會錯架, 錯既永遠都係你呀(以前佢永遠都係咁樣講, 佢亞媽無錯的, 要我就佢亞媽)! 慢慢受啦你!
擇日的笑話
62離世個晚, 亞嗲已經同佢亞媽佢地講, 佢會擇日搞身後事(好怪喎, 亞嗲那邊hum家拜神, 但係其他人又會聽亞嗲點由得佢去擇日喎 (平時都係咁的)). 咁亞嗲番到屋企都真係坐言起行, 即刻攞本野黎睇, 好啦擇左個日子話好日啦. 第2朝去99度時已經同99及其他屋企人講要呢一日. 咁去到問殯儀野時問人地呢一日仲有無位, 人地話呢日full晒啦. 亞嗲話仲有無辦法搞到呢日呀? 人地話: 無啦, 個爐無晒位啦, 況且呢一日都唔係好日黎的, 唔要都無所胃啦. 亞嗲話: 唔係喎, 我睇過呢日係好日喎. 人地俾埋本通勝指埋俾亞嗲睇: 邊個話好日架? 你睇下, 呢度寫明架, 係重喪喎!! 即係大吉利是要辦兩次喪事架喎! 亞嗲未太相信, 仲問人地那本通勝係邊本黎添. 人地話: 呢本係廣經堂(咁上下個名啦唔記得啦)黎的, 最正宗架啦. 跟住亞嗲睇見真係寫住廣經堂先信佢原本擇個日係唔好日. 我後來走左就同亞嗲講: 我都話架啦, 你擇既未必啱架啦, 好彩人地full左啫, 唔係你唔知揀左個日就大镬了!!
揀棺木/壽衣
約左遲d去揀棺木, 我叫亞嗲叫晒佢屋企人去啦, 亞嗲又話唔駛啦, 我揀得架啦. 我話: 梗係唔好啦, 你係應該要叫聲佢地去揀架, 佢地唔去就係棄權將來無得嘈. 好彩, 亞嗲最後都聽我話, 逐個逐個咁打電話叫佢地一齊去揀. 尋晚99 cup亞嗲線後, 我問亞嗲, 你有無叫你亞媽去揀呀? 亞嗲話無呀, 叫佢去咪仲麻煩! 我話你唔叫佢去, 佢係現場先見到一陣唔高興大鬧靈堂咪死! 亞嗲話:唔會既. 我話: 你係先好講! 跟住我諗諗下話: 你話你無咩親戚架何? 亞嗲話: 係呀, 好少架咋. 我話: 咁咪即係我既親戚朋友仲多過你全家既親戚? 佢話: 有可能架. 我話: 咁你亞媽真係係靈堂發顛咁我點算呀?? 亞嗲係度奸笑. 我話: 咁我駛唔駛阻止佢地黎呀? 唔係出醜既咪係我啦!! 亞嗲無出聲(佢個表情係話: 你諗你啦!).
捍衛仙人既利益 = 唔尊重99
當亞嗲好驚99既來電時我同亞嗲講, 點解你地咩都唔敢出聲既啫? 咩都唔敢反(反對)你亞媽, 咁怕佢做咩呀? 亞嗲話: 唔係怕佢, 係尊重佢. 我話:尊重都要分輕重架, 而家係做緊正經野呀? 唔可以俾佢亂黎的. 唔可以因為佢既求其而令到你老豆無啦啦受罪架. 亞嗲係度up左幾次, 早知由得佢亞媽搞好過, 唔駛而家成日俾佢話俾佢鬧俾佢cup線. 我話, 你而家要分清楚, 係你亞媽是非不分, 係佢懶呀, 係佢亂鬧人亂發皮氣, 唔係你做錯野呀! 被佢鬧唔緊要, 但係都要鬧得有道理先得架! 你話所有野要佢做, 所有野要佢出錢, 咁都仲叫做有得嘈下啫, 而家唔係喎, 全部野都有人做(我地都係唔識, 去問人點做咋, 問左番黎話俾所有人聽), 有人俾錢, 只係因為那個係一定要係佢屋企搞, 所以先叫佢整啫, 咁都發難渣, 想點呀??!!
沒有留言:
張貼留言