前日先同亞嗲講緊, 今年應該都唔會整糕啦, 因為唔夠時間. 點知, 尋日係街市聽到人買蘿蔔黎整糕,我又身痕突然間想整, 所以就買左一條番黎整啦.
但係可能前日行街行得太耐, 今朝又早被人嘈醒, 之後又同兩隻野去整天疚, then再去街市, 所以又搞左成朝先番到屋企. 到我整糕時, 我覺得自己唔夠精神, 因為………成日出事囖. 我唔小心將成樽粉整掉左, 搞到跌左好多粉出黎, 個檯面污糟晒啦. 跟住過左一陣, 我係度整緊粉漿時, 小冰同我講野, 佢走左之後我睇下煲湯, 突然覺得條褲咁凍既, 原來係d粉漿整瀉晒我都唔知, 又抹一餐啦.
因為係突然間想整糕, 所以浸唔切冬菇, 所以呢底蘿蔔糕係無冬菇的. 呢次係今年cny既熱身, 今晚會開估睇下個實同林既程度得唔得. 但係我尋日落得太多胡椒粉同埋個磅又咁啱無晒電, 所以d粉我都係大約斷估咋………hahaha.
尋日又用部機黎刨絲,好好玩呀, 一野就變晒c啦, 爽! 以前真係刨到手都軟晒, 而家就舒服好多了! 所以有時有d工具真係一定要有架, 可以幫到自己好多!
**************************************************
尋晚食左啦, 今次個實既程度係..........perfect喎. 居然, 因為我之前都提過個磅壞左, 所以所有粉既份量我都係斷估的.係個味就真係甜左少少同辣左d(因為落多左胡椒粉呀).
尋晚係整黎做消夜, 我叫亞嗲叫工人煎幾年試下啦, 因為我都唔係太肚餓. 點知個死野叫工人煎成半底咁多, 我一見到話邊度食得晒呀? 亞嗲話:食得晒啦. 我食左2,3件就走番去睇電視啦, 到再賣廣告時出黎, 問個仔食左蘿蔔糕未, 佢話:都無晒啦. 我話:吓, 無晒??!! 我問亞嗲: 咁大碟蘿蔔糕你食晒唔留俾個仔呀? 亞嗲: 無啦, 都話食得晒架啦. (佢仲要完全唔覺得佢唔番俾個仔係無問題喎)
蘿蔔糕 好食丫 ^^
回覆刪除我買 左部機lu thank you 你
不過而家折左都要成 $690 丫
返去即刻試下整 芝麻糊
第一次 我唔知個蓋要 對正個位黎 按一下 芝麻飛到成牆都係 =.="
但第2次 關好蓋 最頂頂個膠蓋都有小小飛起
唔知係唔係因為用熱水 先會拎個蓋飛起呢
你有冇試過丫 ?
不過之後我好大力按住上面就好ok丫
真係好快就可以整到
係呢 你整豆漿有冇格渣嫁 ?
不客氣啦.
回覆刪除我都有呢個情況, 你見我入面其中一D片我係用D 濕毛巾COM住最頂的, 因為倒大滾水入去, D熱空氣係會澎帳的(冷縮熱帳嘛我諗), 所以會令到那個透明蓋谷起的, 你禁實佢我覺得唔好的, 怕佢入面D熱空氣迫爆, 到時唔知會點.
我見其他人話而家去到690蚊, 我諗佢加左價.
我整豆漿係無格渣的, 但係叫工人整就有叫佢格渣的. 其實兩種我都飲到, 當然格左就更好啦, 只係我懶同埋我又諗住d豆渣係好有營養的, 所以咪由佢囖.
若你都想格渣, 你可以買個豆漿袋黎格啦, 我前年買都係$17(係上海街買).
濕毛巾COM住 係咪就唔會彈出黎丫
回覆刪除同埋我想問下呢 你睇果汁有冇加水丫
因為我琴晚打 蕃石樓 只係加左好少好少水 唔知係呼冇咩水 所以難打d呢
[版主回覆01/11/2011 14:46:00]係呀, 用濕毛巾come住就唔會彈出黎的, 但係會彈左係塊毛巾到囖, 整完之後你要港番條毛巾囖. 你可以去搵番我那條片睇下啦, 你會有多d idea我係點的.
真係唔可以加太少水架, 我唔知你有幾少水, 但係見你寫好少好少, 我諗你真係加得太少啦, 咁樣可能會太乾個摩打好難轉動呀, 再嚴重d怕你會燒埋部機添呀.
以我既記憶, 整2個蘋果既話, 應該都有加半杯水(大約啦, 真係唔記得啦, 因為我每次都係求其倒水入去的), 我整2個蘋果, 整完出黎差唔多夠3杯架, 所以真係起碼要有半杯水啦, 唔係邊度有咁多野出黎飲喎. 同埋你落咁少水, 咁杰, 都唔好飲啦, 好似食糊仔咁.
你打完之後覺得杰, 你應該再加多d水入去, 較到你覺得合適的稀杰程度的. 加完水再打一打番勻佢就可以飲架啦.