豉油雞 - 附食譜

下面呢一張就係我用手機補飛的(就係怕左亞嗲成日都影到最重要既野好細, 佢成日都係咁的. 激死!!

上面那張相係亞嗲用相機影的.

一路直到尋日夜晚都仲係諗唔到今個禮拜整咩好的, 臨到要寫定今朝叫工人買咩既時候, 突然間諗到豉油雞, ok 就去馬啦.

今朝工人買完番黎洗好晒我都仲未知道要點樣整, 因為我未去搵食譜嘛. 就係趕住打麻雀之際好趕咁決定用亞蘇那一個食譜啦, 因為所有材料我屋企有齊, 而其他有些食譜我有些材料係無的, 所以無法做到啦.

我係打麻雀之前較好個汁, 到煮既時候就叫工人付責去煮熟佢(因為我仲打緊麻雀嘛). 然後就由我斬雞. 咁就搞掂啦. 個味都ok喎, 我個姨丈(佢做飲食的)佢都話整得唔錯. 所以都叫做成功啦.

p.s. 特別一提的是個皮係做得幾好, 原因唔知係咩喎. 未至於係脆皮, 但係就唔林的, 個質感幾好喎.

食譜

材料:

1. 雞 一隻

汁 (個份量我都係求其的, 因為老抽咁啱得番大半碗咋, 所以我以老抽既份量黎做個基數):

1. 薑 3片

2. 老抽   大半碗 (老抽與生抽的比例是 1 : 1)

3. 生抽   大半碗 (老抽與生抽的比例是 1 : 1)

4. 片糖   3/4片 (要自己調較個甜味)

5. 水       適量 (大約水與老抽的比例是 2 :1 或 1.5 :1)

6. 玫瑰露酒   2湯匙

做法:

1. 先將雞洗淨, 去頸, 備用.

2. 將雞放入大滾水 "陸一陸"佢, 連個雞入面都要 "陸一陸"佢, 記住係全隻雞都要 "陸"下佢.

3. 放涼. (我因為怕d 肉變壞, 所以用風扇吹住佢. 又由於我一路打緊麻雀, 所以唔記得左, 一路吹到煮之前才關風扇. )

4. 先將個汁的 #1 - #5 煲滾佢, 我自己就想d 薑出味d, 所以我會在個汁滾左之後, 較細火(剛剛夠滾起個汁便可)等佢煲一陣, 令d 薑出味d.

5. 當個汁ok左之後(要試味呀), 便落玫瑰露酒落去, 滾起後較番細火(我諗咁樣會d肉無咁易鞋), 便可以將雞放入汁內, 每邊煮佢5分鐘. 我叫工人一路煮時, 一路用spoon 將d 汁 "筆"個隻雞身上面, 等佢d 色靚d, "暈秦" d. 如是者每邊都係咁做, 工人total 用左 30分鐘整好(即係上下左右前後, 每部份用左5分鐘).

6. 整好左之後放涼, 然後才斬雞.

7. 上檯時將餘下的汁翻熱, 淋少少汁上面便可.

後記: 第2晚食, d汁好好味呀, 格左夜, 隻雞腳係最好入架, 因為入晒味又唔鞋.