今日若然唔係要帶亞女出去, 我一定會玩呢部機玩足一日啫. 我可以同大乒係屋企各有各做自己野2個鐘係完全無出過聲, 好靜, 我最鐘意呢 d feel, 因為咁樣先至emjoy到同relax到. 無左小冰係度唔駛成日俾人又叫又問又煩!!
原本都係諗住整番上次那隻粉啦, 我指個size, 但係見d意粉好似切唔斷咁(洗機時見到的), 所以為安全起見, 我都係切粗條好d, 起碼唔駛再做好多工夫先. 第一次出品, 揀個穩陣d好.
好啦, 到差唔多整左2/3既時候, 我突然又覺得d 粉好似厚左少少(其實都唔係真係厚, 只係上兩次既陰影, 所以有d 驚). 於是, 我又所有整好晒既麵條, 又再次壓偏過再從新切過, 為既只係.................我想做好d (若我讀書時係咁就好了!!)
又由於我以為已經成8點(其實係6點幾咋), 我唔想咁夜食飯, 所以就叫工人拎d 切好既粉入去陸左佢先, 咁樣會快好多. 點知, 條粉腸陸完之後全部裝晒係一個湯碗度, 所以 "澤"到d 麵死死下, 痴到好實, 最後我又要慢慢將佢地分番開晒佢.
亞嗲話d粉好食喎, 但係我就唔覺有咩野, 係真係新鮮同乾淨又無化學野囖(因為我用whitewings黎整, 所以呢度d粉都用左1x蚊麵粉成本的, 同買真係差唔多). 不過佢一話上次d烏冬好食d(個質感, 其實食譜係一樣的), 今次個d好似河粉, 佢一講河粉, 我先發覺, 真係好似喎.................... 係比街個d 河粉再簿身d. ok, 咁又唔同, 佢似河粉既話, 感覺上好似又識整多一樣野咁, hahaha (亞q 精神即係我既精神).
佢地3隻野一致都係話鐘意食上次d烏冬多d(其實真係切出黎唔同, 其他所有整麵團同煮既汁都係一模一樣的). 而我自己就.............無咩太大感覺, 因為我既focus 係玩部機.
今次呢度係上次整烏冬既1.5倍份量, 但係我就真係無上次咁倦到死死下(唔好忘記, 我整呢d河粉之前, 已經玩左一輪部機了, 所以要計, 今次係整多左更多野的).
部機若得一個人整既話會有少少難度(一定慢), 但係若2個人整呢, 就真係快左3倍, 係真係可以好快好快. 頭先初頭就大乒幫我手攪, 後尾就到小冰幫手.
我想下次整全蛋麵呀, 不過衰嗲又話唔好整, 佢話係街都有得買啦, 要整d街買唔到架嘛. 我話, 咁咩粉麵都係係街買到架啦, 廢話!!
食譜: (唔記得講呢個份量用象印係......奶野的, d粉多得滯, 所以下次都係整番少d好了)
1. 高粉 65g
2. 中粉 390g
3. 水 大約200 至210g (視乎情況執生)
4. 鹽 6g
5. 乾粉 n 咁多(即係高粉)
做法:
1. 將所有材粉加入麵包機內, 揀 pasta 那個mode, 禁start.
2. 部機會先攪 8分鐘, 發出嘟嘟聲, 再即刻禁start, 佢會再攪多5分鐘的. (係呢d時間入面, 睇下會唔會唔夠水, 若是, 可以係呢個時候加少少水入去, 再唔夠先再加)
3. 整好麵團之後, 用保鮮袋裝好放入雪櫃30分鐘.
4. 30分鐘後將麵團從雪櫃取出.
5. 撤d 乾麵粉係檯面, 然後將麵團沾些乾粉. 跟住將個粉團分細幾份.
6. 將壓麵機較至 1度, 將麵團放入壓麵機內壓偏. 然後係另一邊接回壓偋左的麵團.
7. 將機較至 2度, 將#6的麵團再入機內再壓.............如是者一路壓至6度.
8. 然後放至粗身那一邊的切麵器切, 麵一出黎時緊記要將乾粉係咁撈入去, 以免麵條會痴埋晒一堆.
9. 之後既做法, 請參照 烏冬那一篇post.
** 我必須要聲明, 我係整麵既超新手, 所以上面既食譜做法唔一定係正確, 但係我係真係咁樣做而整到出黎啦. 所以................唔好"叉能廚:我, 因為我都唔太識, 只係.....整到出黎食得落口咁話啦.
沒有留言:
張貼留言