今日亞嗲放假, 佢身痕走左去買蝦整蒜蓉蒸蝦, 我係一路都唔知的. 到我放工, 我身痕, 所以走左去永安行下啦, 點知就俾亞嗲係咁催我番屋企, 又話要等埋我先煮飯. 我話唔駛啦, 你地食先啦, 我想行街. 佢係都話唔得, 佢整左碟餸, 整個成個鐘頭架, 所以一定要整完即刻上檯食先得架. 我係咁問佢咩黎, 佢又唔肯講. 跟住我估係蝦(因為咁橋我都想食蝦), 佢先話係, 但係都唔肯講係整咩蝦.
番到屋企我去沖涼佢先叫工人蒸碟蝦, 所以係食緊飯既時候先上檯, 睇個樣就好似幾得下咁. 食下先..............咦, 真係幾好味喎, 同係街食既差唔多喎(一陣講點解). d 蒜蓉好食過d蝦, 因為係半生熟架, d蒜因為未熟得晒, 所以仲有d辣辣地既, 平時好少食到呢種味, 所以好鐘意食, 我一個人食左成7, 8隻. 食完晒d蝦之後, 我係個碟度夾d 蒜蓉黎撈飯食, 因為真係好好味. 佢之所以似酒樓整原因係...............佢夠多油, 屋企餸平時係唔會落咁多油的, 當然佢而家都比酒樓少油, 但係以我煮既話, 唔會落而家咁多囖.
亞嗲話佢整左成個鐘喎, 又投訴把把刀都唔利搞到佢整咁耐. 我話, 你唔識磨左佢先切既咩?!! 跟住又話好彩屋企有成個蒜頭係度, 因為佢無買番黎, 否則又要落街買過. 我話: 你切左一個蒜頭呀? 佢話:係呀. 我話: 死蠢, 點解你唔用我部機黎打d蒜頭呀, 咪唔駛切得咁辛苦啦, 禁幾下制就爛晒啦. 個日先剛剛俾完你睇我打d 黑椒! 跟住佢話: 係喎! 我: 自己攞黎辛苦! 佢好唔gur啦, 跟住就話: 人地整左野俾你食, 點該講咩呀? 我: 下次再整過. (激到亞嗲死死下!)
