幾個月前見到人地買左呢個磅, 當時都覺得幾靚, 但係.........算屋企那一個用得就算了, 唔買. 格左幾日又見到另有人一齊訂番黎, 再忍, 唔買.
跟住就再無見過呢個磅既消息了, 但係, 反而我就開心囉囉"戀"成日都諗起個磅, 仲越諗覺得越靚添. 跟住就開始後悔做咩上次唔買!!
係5月頭, 自己死死氣想係日本網到訂, 但係.......全部日文, 又唔識睇, 又唔知費用點計, 好煩, 所以又諗住搵代購訂啦, 但係又唔知點間可靠, 跟住公司又多野做, 所以又放棄了.
出奇地, 過左幾日, 我又見到有人講呢個磅, 今次仲要有人話係可以係網上有得訂, 咁我咪去問下幾錢囖, 320蚊都可以啦, 因為我唔得閒再去研究, 所以就即日落訂了. 以往我一定睇住呢10日黎倒數的, 但係真係好多野做, 所以時間過得好快, 賣家通知我貨到左約我交收. 終於上星期取了貨. 其實紅色係靚好多的, 但係無奈地我唔鐘意紅色, 所以無買到囉(現在又有少少後悔點解唔買紅色).
部機好輕, 敏感度好高, 真係少少野都即刻跳的. 只係叫做用過一次, 未真正玩過佢既0.1g (因為初頭唔識用, 量完先發覺唔見有小數點既!! 何其白痴呢!!).
呢個磅收到之後先發現仲有另一個好處係佢可以轉ml或者g的. 同埋, 可以轉去量水或者係量奶(見上面d相), 因為奶既密度同水唔同嘛.
塊綠色膠可以除出黎的, 不過唔知除出黎做咩, 所以.........即係除得都無作為啦.
