難得可以係坐緊測驗監既時候有得睇演唱會, 仲要係期待左成2年既草蜢演唱會. 因為上次睇完係超好睇, 一睇完已經即刻想再睇多場, 所以我亞姨同我一路都好期待可以再睇. (因為而家我會買飛睇既演唱會真係唔多).
我姨上星期六晚第一場已經睇左, 佢個晚睇到11點9先散場. 佢係超想睇的, 但係佢睇完居然話唔係唔好睇, 但係…………..佢唔會好似上次咁想睇多一場囖. 我當時唔知佢講咩, 直到尋晚我明白晒了. 因為我都有同感, 話今次既演唱會好睇…………..又真係唔係100% 認同, 話佢唔好睇, 但係又未至於, 因為見佢地3個由8點8開場係咁又唱又跳足3個鐘都仲可以係11點5時仲跳到發顛咁, 真係不得不寫個服字, 4x歲人啦, 可以仲跳到咁, 真係好難.
唔鐘意今次既演唱會主要原因係佢地最得超多人地既歌, 唱左成個幾鐘頭人地既歌……………… 唉………………… 我當時只係覺得好似同草蜢去左karaoke咁, 只係佢地搶晒d 咪自己係度不停唱歌咁. 講真, 佢地亦未夠功力可以唱得好聽過晒d 原唱者, 所以………………… 係咁多首別人的歌當中, 係某2, 3首超hit既歌時先有d high既感覺, 因為係萬人大合唱. 如愛情陷阱呢d 超hit既舊歌.
唉, 我買草蜢演唱會飛就梗係想聽番佢地自己既歌啦, 唱人地d 歌唱3幾首就ok啦, 今次真係太多太多太多了. 我係10點時係咁打咸露. 知佢地都又唱又跳真係好辛苦同好努力, 但係都真係唔好意思, 我同亞嗲都覺得……….唔係我地想要既野.
好啦, 等等等, 終於等到又再唱番佢地自己既歌時, 但係又全部都係快歌(第一part已經係咁啦), 想靜靜地好用心咁去聽下一首慢歌都無. 佢地even 將原本唔係快既歌都變左快歌黎唱…………….即係首首歌合埋一齊唱雞尾歌, 聽歌聽到咁趕已經完全無晒意思了. (當然都總比佢地唱其他人既歌好d的)
原來以為係軟硬做嘉賓, 點知當亞嗲起身去廁所時, 聽到張學友把聲, 所以立即坐番低睇下係咪張學友, 點知真係喎, 真係好surprise 啦. 呢一刻係成個演唱會既高潮(其實我地2個都唔係張學友fans, 但係…………..真係因為成個篇排都唔係我地鐘意既野, 所以到見到張學友有左個希望). 張學友好搞野的, 好好笑. 我未睇過佢既concert, 下次都要留意下去聽下先.
寫呢篇野, 係希望………………… 草蜢會睇到, 希望佢知道我地買飛入場既人最想最想聽既係佢地自己既歌. 而家唯有又再等佢地下一次既演唱會啦, 不過又唔知要等到幾時了!!
最後想講既係我地超唔好彩, 坐正係個喇叭前面, 大聲到我真係好驚我會心藏病即場死鬼左. 我有時要用手按住個心頭, 因為個心跳得好西利. 亞嗲就一早已經用tissue塞住對耳仔, 但係佢都依然覺得好大聲. 我就無塞耳仔, 所以有時真係有出現wung wung聲架. 好彩無帶2隻野去, 否則一定要早走. 因我都真係驚我對耳膜聽聽下頂唔住會穿左, 因為真係超大聲呀)))))))))))
大聲到我地2個有時會感覺到個頭有風吹埋黎的, 應該係d 聲音勁得滯有震動. 其實根本都唔需要整到咁鬼死大聲啦.........咁搞法, 真係有心藏病既人真係千其唔好去, 否則真係難保唔會出事. 成個場有4隻呢d近觀眾既喇叭, 希望個場可以留意下將那4個喇叭較番細聲少少啦. 亞嗲叫我記低個坐位#, 下次係呢d位千奇唔好買喎!! 呢樣野亦同時係令個concert 失色既地方, 因為我一路睇一路覺得好辛苦(個心同對耳), 我遇到一d 高音時, 我真係無法唔用對手禁住對耳仔, 因為真係超攞命的呀!!
p.s. 買左劉華12月既飛………………. 而家已經唔鐘意劉華了, 但係唔去睇又好似唔知點咁, 算啦, 就帶2隻野去睇一次啦. 希望唔好好似今次咁失望啦.
