呢個係酒店既自助早餐, 豐富過尋晚既團餐好多. 但係就怪D 係個好大既HALL入面食自助餐. 呢餐食得好飽.
呢度就係雪嶽山公園, 可能入面有尊佛像, 所以叫做寺啩.
呢尊就係雪嶽山入面既釋迦牟尼佛, 係個山上面有咁大尊佛都真係幾勁.
呢度就係雪嶽山公園入面既河, d水都幾急架.
呢d就係整芝士既材料(相入面既唔係我, 係d團友黎的)
呢d就係整芝士要用既其他工具.
呢度就係鳳凰城渡假村.................個廳, 呢間係有3房2廁一廚2廳的, 地方夠晒大. 右下角組色那一包就係整芝士整得最醜樣那一組既獎品.
開放式廚房
呢間係有床既房, 另外2間細呢間少少, 係無床既, 因為根番傳統韓式訓"塔塔米"(訓地下). 訓地下呢家咁正既野當然係留番俾2隻野嘆下啦.
進入第2日既行程啦, 由於行程少, 所以morning call 係7點45分, 8點半先落去食早餐, 9點15分先開車. 未上車已經落緊雨,但就唔係太大雨.
到左雪嶽山公園啦, 但係d雨越落越大, 要開 “姐”先頂得住, 雪嶽山既風景幾靚, 最靚係d樹, 係d 好似羅漢松個d樹黎, 所以個樹既形態係好靚. 叫做好好彩, 當個導遊係雪嶽山解散時, 行左無耐, d雨開始細左好多, 後來仲停左一陣添.我地行去影相, 見到一尊好大既釋迦牟尼佛像, 比香港天壇大佛那一尊細, 但係都真係好大尊佛像呀, 同埋係呢個佛教唔係咁多人信既國家, 所以都有點出人意外. 我地係佛像影完相再行前d, 個度有條橋, 條橋既左手邊有條河, 但係d水流都幾急下的, 所以都幾靚, 我地係條橋上面背住條河影左d相. 再同圍影下相跟住掉頭慢慢行番去旅遊巴集合啦, 行左5份3既路程又試落雨啦, 走鬼呀…… 越落越大, 好彩我地都無咩dup濕到個身.
跟住下一站係去整芝士,落車時d雨又停左啦, 好彩. 入到去好多綠色既地種左d野, 原來係紅蘿蔔黎的. 入左間屋入面, 放左好多張檯的, 有個
“亞朱媽”(韓文意思係太太咁解)教我地點樣去整芝士,仲話黎個比賽, 那一組整得最靚既就有獎品. 整就一d都唔難, 但係整完出黎都唔似芝士的, 肉豆腐多d. 各組都整好晒之後由導遊同 “亞朱媽”去評選, 突然間導遊話改一改要求, 要整得最醜樣既先會嬴. 2位評判一次通過, 我地個組大熱勝出……………… 即係我地個組整得最核突…… 我地既獎品係一大包粟米片, 都幾好食的. 特別提一提既係, 整完芝士之後, 每組有一兜粟米片同一枝紅酒的. 亦備有一碟士多啤梨醬俾我地用粟米片點黎食的. 導遊話d士多啤梨醬係 “亞朱媽”自己整喎, 見佢個色就覺得唔好食, 因為唔係好紅的, 淡淡紅色. 但係食落就覺得好味, 因為無平時食開個d jam 咁甜, 最衰唔記得問個導遊有無得買啦.
整完芝士, 我地就去左餵羊, 有10零廿隻度啦, 無想像中咁白, 可能因為落左雨, d泥整到佢地個身上面啩. 2隻野好開心咁去餵羊啦, 咁我幫佢地影相. 個女係度投訴話d羊好鬼大力喎. 我話, 你就一就番佢個頭就ok啦, 到我自己餵時發覺d羊真係好死大力喎, 我都俾佢扯一扯, 當然無咩危險性的, 只要唔好用佢鬥力便可. 左右2邊都有羊可以餵, 餵餵下, 左邊山上面有幾隻羊衝落黎想食野, 好搞笑.又見到有d羊好罷皇的, 推開第2隻羊黎食野. 導遊話原本綁住係出面的那一隻大羊係可以俾小朋友坐上去影相的, 但係因為之前落過雨, 隻羊個身濕, 所以無得影. 咁樣玩都玩左成半粒鐘呀, d細路就梗係覺得唔夠喉啦.
韓國團離不開燒烤, 火鍋, 跟住再輪番到燒烤, 所以今日既lunch就係燒烤啦. 初頭以為又係煙到死死下既鐵版燒烤啦, 但係導遊話韓國都興濕烤架. 所以燒烤其實又係好似打邊爐咁, 一镬熟. 真係悶爆!! 今餐d食物都ok既, 可以試下烏冬(尋晚試左麵), 佢既魷魚幾好食喎, 幾有鮮味. 今日我又再食多左少少泡菜啦, yummy.
導遊成日都同我地講, 佢唔會問我地d野食好唔好味, 只會問我地飽唔飽呀. 佢話跟團既餐係差唔多咁樣, 所以但求食飽就好啦. 其實佢咁樣同d團友洗腦都好既, 無咁多期望就無咁失望. 其實d野唔係好難食既, 只係……… 悶d law, 好好味就一定唔係.
食飽後又上車, 今回係番酒店自由活動. 今日我地住既酒店係鳳凰城渡假城,呢間既外型比尋日那一間靚. 入到房, 所有野都新淨d, 間房好大, 3房2廳2廁1廚… 我地有成3,4個鐘頭時間, 有d團友去搭覽車(自費, 好似係大約港幣70一個人啩, 一定唔駛100蚊一個), 而我地就最精彩, 就係…………… 2隻野係房做公文既功課, 亞嗲訓覺, 我就睇書, 好relax, 好耐無時間咁悠閒係度追小說了. 仲有1個鐘頭夠鐘食晚飯, 我地落左去行下, 原本諗住同佢地打bowling, 點知佢話亞女太細唔俾玩, 咁費時又話大細超一個有得玩一個無, 所以索性全部人都唔玩law. 係個mall 仔度, 行下玩具店, 後來去到一間機舖, 俾佢地打左幾舖機頂下癮啦(因為佢地打機好屎, 所以好快玩完).
到晚餐啦, 晚餐係食………火鍋 (again & again). 都係咁上下既野啦, 無咩特別, 食飽就算啦. 汽水就2000won一枝, 即係14蚊港幣. 番到酒店又去便利店買野飲, 佢地通常我都要佢地買奶飲.
