一d都唔白既白麵包

點解都係白麵包但仲post出黎?? 原因係我想數下我買左呢部機之後用左幾多次, 我唔post出黎既話根本無法可以準確計算到次數. 而家買左一個月多2日(2月28號買既), 已經用左超過30次, 情況都幾令人滿意!! 等test完exam完, 應該可以更加大展鴻圖的.

 

魚樂無窮

魚樂無窮, 去片.........

魚樂無窮 1

魚樂無窮 2

魚樂無窮 3

魚樂無窮 - 4 (餵魚情況 拍於4月11日)

呢個post之所以能夠出現真係要多謝晒小冰, 無佢既定唔會有呢個post.

事緣係我食完飯係度等佢做完功課諗住同佢溫書, 因為下星期就測驗啦. 點知日復日, 日日都做到成10點先做完, 對住佢真係想死!! 我一行開既話, 佢2隻野又會係度傾計, 所以我又要企係佢地面前, 咁我又做唔到我想做既野(如:睇電視). 係好悶既環境下, 我咪攞部相機出黎影低d魚, 諗住番工悶時都可以開黎睇下啦.

 

花奶方包

由於要清屋企既8罐花奶, 所以今日都繼續係花奶方包.

花奶白麵包

timer 包黎的.

跟機食譜白麵包 - 附食譜

同人約好一齊跟機食譜做一個白麵包比較下的, 所以你見到今次有好多相, 就係for大家比較下同一個食譜, 做出黎有無唔同的.

白麵包

材料:

1.水        166g (2/3 cup)

2.高粉      300g

3.砂糖      1.5 tb sp

4.鹽        1/2 tsp

5.牛油      1 tb sp (15g)

6.yeast     1 tsp

做法:

1. 將#1 - #6 所有材料順序放入機內.

2. 禁 select --> soft --> start

3.指定時間完成後長按start令佢熄機關電源, 將麵包取出放涼後便可切片享用.

柱候牛腩

因為要清屋企既野, 所以找了包牛腩黎蚊, 呢度係半包既份量. 第2晚就買多條白蘿蔔落d牛腩度, 變成蘿蔔炆牛腩.

同場加映方便宴, 因為d餸大部份都係凍藏野及罐頭, 原因又係........要清貨!

提子方包 - 附食譜

今日2隻野放假, 工人都係, 又因為測驗迫近, 今日又要帶小冰去比賽, 所以就唔想佢地花時間去查jam, 故此今日就整左個提子方包了. 最簡單方便但又好食既包. 唔知點解個包唔高, 不過算了, 我仲有好多野要做, 唔理佢咁多了, 過左測驗周先講啦.

提子方包 (Timer包)

材料:

1.水        190g

2.高粉      300g

3.肉桂粉   1/2 tsp

4.庶糖      1.5 tb sp

5.鹽        3 g

6.牛油      8g

7.yeast     3g

8.提子      60g

做法:

1. 將#1 - #8 所有材料順序放入機內.

2. 禁 select --> regular --> crust --> light --> 調較時間到指定出爐時間--> start

3.指定時間完成後長按start令佢熄機關電源, 將麵包取出放涼後便可切片享用.

矽膠模 - 戰利品

呢個打算用黎整蛋糕或者係馬豆糕, 紅豆糕, jelly之類既野.

呢個都係蛋糕, jelly, 糕類及布甸.

呢個想試下用佢黎整麵包, 唔知得唔得呢?? 又做下實驗先!

今日亞嗲放假, 所以同左亞嗲去街, 我地去左上海街, 食完野之後就各自搵食, 佢就去行深水埗同太子(金魚街), 我就繼續留守係我既玩具街度行, 行完互call集合. 呢個安排係我要求的, 因為我怕q左佢同我行得兩行(其實係佢話同我去上海街睇野既), 佢又催我走, 所以我就駛走佢, 叫佢自己行, 咁佢就唔駛煩住我, 而我又睇得自在d同…………買得開心d.

好期待咁去行玩具街, 但係睇晒都無咩新野, 所以就只係買左呢3個矽膠模, 覺得佢幾靚, 其實仲有一個我想買, 但係呢間無貨, 另一間舖頭有, 但係就貴左$65, 所以…… 唔買啦, 費事俾人搶錢. 而家等下睇下佢訂唔訂到番黎俾我, 咁就平好多. 隨緣啦, 買到就買, 買唔到就算啦.

同場我覺得i x cake 呢間舖有部份野貴過人地都有成1x%的. 而慢x 同樣亦都係, 當然啦, 佢呢2間舖係家族式經營的, 價錢當然會mark 一樣啦, 所以咪同樣比人地貴好多囖.

尋日有想過買個"筆"豆腐花既剷,因為我買左包石膏粉想玩下, 但係見成13蚊一個, 所以算了, 唔side錢買啦, 我用屋企d 鐵匙更好了, 因為我都唔會成日整的.

 

清湯腩王

迷你雞蛋仔模

呢個迷你雞蛋仔模買左年幾啦, 一路都唔記得左同佢影相, 今日上網有人提起想睇下咩樣, 咁我先私起心肝call齊佢地2件出黎(雞蛋仔模同格仔餅模)影番張靚相留念!!

記得之前第一次整時個食譜唔鐘意, 後來搵到另一個整出黎先叫做似似地樣. 都有一排無整啦, 遲d再搵佢地出黎玩番轉先.

 

迷你格仔餅模

呢個迷你格仔餅模買左年幾啦, 一路都唔記得左同佢影相, 今日上網有人提起想睇下咩樣, 咁我先的起心肝call齊佢地2件出黎(雞蛋仔模同格仔餅模)影番張靚相留念!!

記得之前第一次整時個食譜唔鐘意, 後來搵到另一個食譜整出黎先叫做似似地樣. 都有一排無整啦, 遲d再搵佢地出黎玩番轉先.

 

綠茶蜜糖包 - 尖頭包

今次又到番轉頭去試綠茶啦, 上次係唔夠甜, 所以今次用蜜糖黎整. 個包出黎唔知點解變左好尖……成個禿頭佬咁, 我都見唔到真身, 我只係見到張相咋, 因為係工人將d包出爐的, 相我都係叫工人影低的. 

個包今次個味好過上次, 因為有d甜味, 但係個味真係無咩特別咁, 所以用晒d綠茶粉後(仲有一包未開), 我可以……斬攪唔買了.

食譜:

綠茶蜜糖方包 (Timer包)

材料:

1.水        160g (今次d包有一邊好似唔夠鬆, 下次試下加番多少少水先)

2.高粉      300g

3.綠茶粉    10g

4.蜜糖      50g

5.鹽        3 g

6.牛油      8g

7.yeast     3g

做法:

1. 將#1 - #7 所有材料順序放入機內.

2. 禁 select --> regular --> crust --> light --> 調較時間到指定出爐時間--> start

3.指定時間完成後長按start令佢熄機關電源, 將麵包取出放涼後便可切片享用.

 

等放學

今日個電話又響, 唉!!! 又係我老豆打黎, 又問我去唔去澳門, 我前晚已經推左佢唔去啦, 但係佢仍死心不息, 又再打黎問咁xx月xx日去你ok嗎? (我真係唔想再收佢電話, 所以我好直接咁推佢) 我話, 你同xxx個去嘛, 我唔去啦, 你自己同xxx去啦.(佢係最初問我時係完全無講過有其他人去既, 係好彩我聽佢講野知道應該仲有其他人去, 所以我搵人收風. 其實唔係我講佢都唔打算話俾我聽係同埋其他人去的, 雖然我都識佢地, 仲好熟添, 但係… 咁你都應該話聲我聽有咩人去呀, 我放假我都想靜下啦, 你又叫埋一大班人, 基本上我而家聽到任何聲我都會覺得嘈覺得敏, 若我應承左佢去, 買晒飛我先知, 我就奶晒野啦!!!).

跟住佢係度轉話題, 個話題好搞野的.

佢問: 大兵係邊間學校, 佢話係xxx邊一間呀? 我聽到R晒頭

我話: 邊個講佢係XXX個度番學呀? 

佢話: 你個仔自己講既.

我話: 有無可能番緊學那一個人會講錯呢?

佢話: 咁係你個仔自己講架喎. 

我話: 唔係喺XXX呀, 係XXX呀, 佢間學校附近有咩咩咩架.

佢話: 係XXX後面呀?

我話: 係呀. 

佢話: 佢放學放幾多點呀?

我話: 唔定架喎, 佢日日都遲放架啦.

佢話: 咁大約幾多點呀?

我話: 放X點X啦, 但係通常都係X 點先出到黎的.

佢話: 咁即係X點至X多點放學啦. 等我去門口等下佢放學先.

我話: 嗰個時間你都唔得閒啦.

佢話: 得啦, 我可以去到的, 睇下佢點放學.

我話: 咁SO FAR 佢都OK既, 佢放學咪就係一LOOK葛咁行囖.

佢話: 我以前試過係小學等佢放學, 見佢同個同學一齊傾計一路行咁啦. 但到過馬路時佢就唔傾, 睇車過馬路既. (呢樣野我係從來無聽過的, 而我亦從來都無係小學時靜雞雞等大兵放學的, 原因係……… 佢俾到安全感我, 我覺得佢OK, 無群D咩人).

而家去到呢間學校都讀左6個月, SO FAR到而家我都無話覺得佢間學枚既學生好差, 而佢又真係無咩群人的, 因為佢一放學就打俾我, 然後就番屋企或者去學野, 所以我都叫做有D信心既. 只係…… 我無諗過我老豆會話走去等佢放學啫!! 其實佢又要怕佢學壞, 但係佢自己又走去左部差不多2K既手提電話俾佢WHICH 我係真係唔讚成的, 因為一黎我唔想我老豆駛錢, 二黎, 我亦唔想佢KEEP一部成2K既電話, 因為佢真係好Q唔小心既, 一陣唔見左就SIDE晒D錢.  三黎, 我亦都想佢撲素D, 少左引起人注意既機會, 咁樣麻煩亦應該會少D. 但係我費事出聲, 因為一黎我阻唔到我老豆的(因為佢係唔會理我講咩既, 佢只做佢鐘意做既野); 二黎, 我出聲就變左我壞我仔大事(我唔俾我老豆買咁佢就無新手機啦). 所以我出聲既話我就夾係中間吃力不討好!!

紅莓方包 - 附食譜

前兩日已經想食紅莓包, 但係轉頭又唔記得左整左白麵包. 終於尋晚記得啦, 所以今朝就有新鮮紅莓包做早餐. 好味道, 紅莓好味過提子好多, 無咁甜呀!

紅莓方包 (Timer包)

材料:

1.水        190g

2.高粉      300g

3.庶糖      1.5 tb sp (22.5g)

4.鹽        3 g

5.牛油      8g

6.yeast    3g

7.紅莓     50g

做法:

1. 將#1 - #7 所有材料順序放入機內.

2. 禁 select --> regular --> crust --> light --> 調較時間到指定出爐時間--> start

3.指定時間完成後長按start令佢熄機關電源, 將麵包取出放涼後便可切片享用.

 

庶糖

我幾鐘意呢隻庶糖, 覺得佢幾香, 用左都應該有大半年啦, 通常我整蛋糕同麵包先會用佢, 今日剛剛特價所以買左4包番黎.

蕃薯方包 又名藍藥水包

呢轉包係我聲控工人整的, 所以可以係傍晚6點幾出爐.  好玩呀, 今次係玩蕃薯, d色係蕃薯既天然色黎的, 無任何人工成份.

我原本以為會成個包都係紫色的, 好似個士多啤梨包咁, 但原來d 蕃薯沉晒底喎, 出黎有d似藍藥水咁.  anyway, 幾得意呀, 好玩, 我頭先食左一塊係唔夠甜, 我expect佢好似煨蕃薯個d咁甜架.

個包應該係唔夠水, 所以好矮.  下次我自己整先.

材料:

1. 水           90g  (應該可以再加多少少 (所以而家個包咁矮), 下次我再試過)

2. 花奶       100g

3. 高粉       300g

4. 庶糖       2 tb sp

5. 鹽           3 g

6. 牛油       8g

7. yeast       3g

8. 蕃薯       200g (先去皮洗淨, 蒸熟, 壓成茸)

做法:

1. 將#1 - #7 所有材料順序放入機內.

2. 禁 select --> regular --> crust --> light --> start

3. 聽到嘟嘟聲後將蕃薯茸逐少放入機內. (呢個做法可能係令佢沉底既原因, 下次我試下放係麵粉既面頭先)

4. 聽到完成的嘟嘟聲後 (3小時30分) 完成後長按start令佢熄機關電源, 將麵包取出放涼後便可切片享用.