今晚食咩餸 - 2011年12月31日除夕晚餐

今晚係除夕, 所以又有藉口唔煮飯啦, 尋日已經決定左叫PIZZA食, 問埋我細佬黎唔黎, 最後就我地一家+埋我媽同我細佬食, 跟住再加包我之前買左既煙三文魚同埋拍黃瓜, 最後........我一個人食到死死下先叫做食得7788咋. 個晚我食完個肚好漲, 好辛苦, 可能又飲左罐幾汽水啦.  我細佬仲要話: 點解次次食飯, 你都係食到最尾那一個既!! 頂佢, 唔係我食埋佢, 咪又淨番係到第2日要食格夜野囉, 衰人!!!!!!!!!!!!!

今晚食咩餸 - 2011年12月30日

 

1. 蕃茄煮蛋
2. 冬菇蒸肉餅
3. 花膠螺頭(格夜湯渣)
湯: 南北杏密早陳皮西洋菜豬骨湯

今晚食咩餸 - 2011年12月30日 lunch

尋晚食剩左d 菜心, 又食剩左d 矮瓜, 由於決定左今日死都唔會落街, 打開雪櫃見到有盒豆腐,  所以就咁樣蒸左佢黎食啦, 跟住又見仲有d 拍黃瓜, 所以又清埋佢啦.

今晚食咩餸 - 2011年12月29日

1. 金菇肥牛卷(芝麻汁)
2. 醬爆矮瓜冬菇肉絲
3. 炒菜心
湯: 淮山杞子花膠雙螺頭湯

因為仲有一d 肥牛係到, 所以.........再encore個肥牛卷啦, 由於打邊爐個日買左支芝麻醬覺得好味, 所以今日就轉左個汁, 試下用芝麻醬, 2隻野初頭聽到都叫唔好的, 我15/16左一排, 最後都係想試下新野, 所以都係煮番芝麻汁.  2隻野試完都話好味, 好彩無聽佢地講啫.  燒汁同芝麻汁都一樣好味, 因為係2種好唔同既味黎的, 所以無一種汁可以代替另一種的.

話時話, 今晚個矮瓜個汁真係幾好味喎, 唔係第一次煮, 但係..........有意外既驚喜.

點解會煲呢個湯, 原因就係: 想清貨囉, 一個湯可以清幾樣野呀, 正!  d 雪藏螺頭好鬼阻住個freezer, 有感冒又唔飲得, 夏天又唔飲得, 所以真係好難可以煲.  

今晚食咩餸 - 2011年12月28日

 

我呢d懶人, 一早係放假前已經準備好d存貨留番閉關時用的, 放左幾日假, 即係已經煮左幾日飯, 所以都開始想吞pop了, 於是就煲啖湯, 蒸臘鴨臘腸, 炒條菜便算. 但由於係下午時身痕, 整左d 拍黃瓜, 所以就多一碟冷盤食啦.

今晚食咩餸 - 2011年12月28日 lunch

食番格夜餸咋.

打完一次邊爐既剩餘物資有幾多.........................嚇死你呀!!! 睇下我點樣消滅佢地啦.

25號打邊爐食剩左: 魚皮餃, 鮮冬菇, 鯪魚肉, 鱔片, 脆肉鯇, 桶蠔, 金菇, 腐皮, 肥牛, 粉絲, 牛丸, 魚蛋(2種), 墨魚丸. 見到有咁多野係到, 真係想死ing....... 無辦法啦, 都要清左佢的, 越快越好啦.

自己加左料既鯪魚肉.
 

消滅日記簿:

1. 煮粉絲做午餐 (上面個碗係我既, 左下那一碗係小冰既, 右下那一碗最大碗既係大兵既), 係咪好大碗呢?? 我煮完見到大兵個碗都驚驚地, 因為我係咁塞晒D野落去佢嗰碗到.

最後既結果係: 得我嗰碗係食剩少少囉.

跟手晚餐再黎: 金菇肥牛卷(燒汁), 蘿白炒魚鬆, 豉汁蒸白鱔, 芫茜皮蛋脆肉鯇湯

 

仲未清晒d野架, 再黎: 金菇肥牛卷(芝麻汁)

仲有: 羅宋湯底既多丸麵

黎到呢到, 除左d 丸之外, 其他所有野都俾我ko晒啦. 我都算係咁啦, 清到咁多!!

今晚食咩餸 - 2011年12月25日 聖誕餐

聖誕節, 唔想煮, 所以就買壽司食, 點知...................出事, 唔夠食呀. 可能買既時候剛剛食完lunch, 仲飽, 所以亞嗲問我時我話夠啦. 點知到我坐低食時已經得番少過10件, 最後當然係唔夠飽啦, 唯有食杯麵啦, 好彩剛剛有4個杯麵咋, 唔係都唔知點算.

今晚食咩餸 - 2011年12月24日 平安夜

羅宋湯 (呢個係fissler 10升既高速煲黎的, 咁你可以想像下煲湯有幾大煲)

黑椒牛排

黑椒火雞

蒜蓉西蘭花

煙三文魚

原材料係呢到搵到: