尋日工人問我買定咩餸星期六煮........諗左成粒鐘都唔知煮咩好, 但又懶, 唔想自己洗洗切切, 所以就叫工人買左隻冰鮮雞番黎先, 叫佢洗好晒擺係雪櫃, 今日先諗煮咩雞.個腦入面都想試下煮沙薑雞, 以為屋企既食譜入面有, 點知, 搵唔啱心水, 所以要上網搵啦, 都搵左好耐先搵到合心水既食譜. (又因為要教亞仔數學, 所以又無咩時間可以搵, 但係又好趕住要CONFIRM因為醃要時間嘛!)
材料:
1. 鮮光雞 1隻
2. 薑 5片
3. 葱 5條(切段)
4. 紹酒 1湯匙
醃料:
1. 沙薑粉 2.5茶匙
2. 鹽 2茶匙
3. 薑汁 適量
4. 紹酒 適量
調味料(拌勻):
1. 水 2杯
2. 生抽 1湯匙
3. 冰糖 非常細粒(半茶匙份量)
4.八角 2粒
5.沙薑粉 大半包 (食完之後覺得下次可以加呢樣野)
生粉獻(拌勻):
1. 水 1.5湯匙
2. 生粉 2茶匙
做法:
1. 雞洗淨,抹乾水分,用醃料塗勻雞身內外醃最少30分鍾
2. 下適量生油在熱鑊中,下薑葱爆香,將光雞兩边略煎,贊紹酒,注入調味料加蓋煮25分鐘至雞熟透,略凍後斬件上碟
3. 將煮雞汁液埋獻,澆在雞件上即成
*水滾後火唔好太猛, 否則d肉會好鞋的. 我用慢火煮, 煮完之後d肉都仲好滑.
材料:
1. 鮮光雞 1隻
2. 薑 5片
3. 葱 5條(切段)
4. 紹酒 1湯匙
醃料:
1. 沙薑粉 2.5茶匙
2. 鹽 2茶匙
3. 薑汁 適量
4. 紹酒 適量
做法:
1.以錫紙將雞包好(我將個面向上).
2. 預熱光波爐, 將雞放在低架以225度烤. 聞到香味取出. 若唔夠色水但肯定雞已熟的話, 就除去鍚紙將雞放回光波爐再烤多一陣, 見好就收.
3. 雞要放涼後才可以斬件. (見到我呢隻烤雞無左d 皮啦, 因為我係仲熱既時候斬的)
一心諗住整呢個沙薑雞啦, 但係坐低後又見到另一個沙薑雞既食譜, 但係係烤既, 身痕既我又點忍得手, 所以又玩野, 決定一雞兩煮, 一邊烤, 另一邊就煮. 睇下邊邊好食D. 做人最開心既莫過於想做就去做!
** 2種雞都係由同一隻雞而來的, 用同一種野去醃, 醃左相同既時間, 只係一邊用黎煮, 一邊用黎烤咋.
***********************************************
食左啦, 我地個個都係覺得烤既好食d, 因為香口得黎係無熱氣feel的. 光波爐可以整到個皮有少少脆(唔好意思, 雖然個光波爐我買左約3年, 但係........ 我工人用佢仲多過我好多. 所以我整到佢少少脆皮都算係咁啦). 好搞笑, 亞嗲初頭以為係炸子雞黎的, 我話咩炸子雞呀, 係沙薑雞呀!! (激死!!)
另外那一碟沙薑雞..........覺得唔夠重沙薑味. 佢唔係唔好食, 但又唔係好好食, 無咩特別咁囖.
好耐無斬雞, 所以把刀磨得唔夠利, 所以斬到我隻野咁, 亦斬得唔靚, 斬完雞之後手都軟晒!
