佢自己就梗係話好食啦, 但我就覺得..............一般啦!! 個樣就幾好既.
2012年4月27日 星期五
2012年4月23日 星期一
今晚食咩餸 - 2012年4月22日
由起身做野做到3點幾先得閒落街買餸(中間已經煲左1煲湯同1煲涼茶, 又洗左一機衫, 又摺晒之前乾左既衫, 做完晒咁多樣野都已經半死了!!!)
落到去街市都唔知買咩餸好, 原因係唔想搞咁多野, 洗咁多野, 所以行左好耐先買到蝦同埋魚, 條魚個名好搞野, 叫做"了哥", 係個老板仔話好食, 所以$7/兩都買黎試下啦, 反正紅衫都3, 4蚊兩(SHORT既!!). SO FAR 條魚又OK喎, D 皮好有骨膠原FEEL 添, D肉亦有魚味, 肉質唔係太林(即係唔削). 但係............我都係鐘意食芝麻斑多D, 諗起都好味!
由於唔想洗菜, 因為太花時間, 所以主供瓜類, 諗左好耐先諗到買翠肉瓜, 因為咩鬼野瓜都貴(發顛!!). 最後就煮左呢個好耐都無煮既餸了.
1. 清蒸了哥(真係清蒸, 因為連薑都唔記得落, 但係因為條魚夠新鮮, 所以一D都唔鯹!)
2. 白灼蝦 (呢到10兩, 夠晒"稱"呀)
3. 翠肉瓜炒雪耳雲耳
2012年4月22日 星期日
今晚食咩餸 - 2012年4月21日
又係一個懶字(其實我已經好倦了, 次次星期六帶完小冰學野番到屋企都頂唔住要訓陣晏先), 所以就好簡單咁煲粥同食糉, 係一個街市度買到D迷你糉, 買左5隻之後收到個衰嗲既電話話唔番黎食飯, 咁諗住3個人食3隻啦, 點知, 最後都要蒸埋個2隻先搞得掂!!!
1. 豬潤粥
2. 咸肉糉
2012年4月21日 星期六
今晚食咩餸 - 2012年4月20日
終於都等到星期五啦(唔到星期五, 點可以到星期日呢, 一個禮拜係得星期日可以訓晏D咋!!), 逢星期五, 我都係通粉多, 一係通粉, 呢排就煮下意粉咁(又係因為要清貨囉). 雖然今次都係美極炒意粉, 但係..........我又貪得意加多D野落去, 效果都OK呀. D 豬排, 由於真係太倦了, 懶得整, 所以就買D 已經醃好左既黑椒豬排番黎切條就唔駛做咁多野了!
亞嗲好鐘意食呀, 大兵都係, 今次又輪到小冰一般了(佢2個永遠都係相反架!!), 我自己就覺得幾好食.
2012年4月20日 星期五
2012年4月19日 星期四
眉豆花生木瓜排骨湯
呢個湯好好飲的, 所以都應該幾快又ENCORE的, 之前都煲左, 只係無影相. 除左大兵, 我地3個都好鐘意飲呢個湯呀!
材料:
1. 木瓜 1個 (約2斤重)
2. 眉豆 4兩
3. 花生 3兩(因為我唔鐘意太多花生的)
4. 蜜棗 5粒
5. 排骨 隨意
6. 水 12碗
1. 先將眉豆及花生洗淨, 浸佢起碼15分鐘.
2. 排骨洗淨出水備用.
3. 木瓜去皮去籽切大件備用.
4. 將所料連水落高速煲, COME蓋, 大火煲滾佢, 見2個白圈後轉細火煲30分鐘. 排氣後, 打開蓋再大火煲多10-15分鐘落鹽便可飲用.
TIPS:
1. D 豆可以唔落咁多, 但係一黎豆類係有益, 二黎多D豆D湯會溶D的. 所以我鐘意落多少少.
2. 其實我都係買左4兩花生, 只係我抽起一D, 唔落咁多. 然後將呢D多左出黎既花生掉埋落去煲渣喳的, 咁樣就兩全其美啦, D湯又唔會太多花生, D渣喳又有D花生食下.
2012年4月18日 星期三
2012年4月17日 星期二
香蕉蛋糕 @ 象印麵包機 (全自動整蛋糕) 改良版食譜
今次改左, 唔用牛油, 用橄欖油, 出黎係無咁heavy喎, 都ok幾好, 但小冰就唔鐘意, 我諗係無咁香. 不過用橄欖油就一定會健康好多喎!!
今次呢個係改良版既香蕉蛋糕, 為左將來唔駛通波仔而又可以繼續食想食既野, 所以轉左用橄欖油黎整呢個蛋糕, 我預左個蛋糕會鬆d 同無咁香, 但係出黎既效果又ok喎, 同用牛油整分別唔太大, 咁我情願用橄欖油了, 食多d都唔怕嘛.
香蕉蛋糕食譜
材料:
1. 牛奶 30g
2. 蛋 2隻 or 100g
3. 糖 70g
4. 橄欖油 70g
5. 鹽 3g
6. 低筋粉 180g
7. 泡打粉 7g
8. 香蕉 180g (壓成茸, 我鐘意勁香蕉味, 所以最少都要有150g)
做法:
1. 將 #1 - #5 放入麵包兜內.
2. 將粉過篩, 然後放入麵包兜內.
5. 選cake mode, 揀light crust, 然後禁start.
6. 幾分鐘後, 佢會beep beep聲, 你就用把膠刀將則邊d粉篤番晒落去堆麵團到. 再加埋d 香蕉茸然後再禁多次start, 跟住1小時25分鐘後個蛋糕就可以出爐了.
2012年4月13日 星期五
超級無敵車仔麵@西灣河 + 太安樓渣喳- 好味!
自從上次食完味精車仔麵後, 突然又想再食(因為上次真係唔掂!!) 遇啱2隻野出左街食飯, 所以我就唔煮飯啦, 所以去左買車仔麵做dinner.
咪以為我自己作個名出黎呀, 呢間野個名真係叫做超級無敵車仔麵架, 之前亞蘇係有線個節目介紹過之後我地先去食過的. 跟住先發現, 原來我識人一路都有幫襯佢的, 由佢係街邊車仔檔食到入左太安樓. 一路排隊(呢間野通常都要排隊的), 一路係到諗要咩餸呢, 最慘係個死人亞嗲話求其咩都得叫我幫佢叫埋, 即係變左我一個人要叫2碗既餸. 為左想食多d唔同既野, 所以2碗既餸係完全唔一樣啦, 我地慣左係share 夾人地一d黎食的. 最後就揀左豬紅, 豬大腸, 同埋豬皮俾亞嗲. 而我就要左魷魚, 冬菇同埋韮菜餃, 我不嬲都好鐘意食佢既冬菇的, 又林又滑. 所有餸都ok好食的, 下次又試下第2d餸先, 因為佢有成2x 樣餸架, 所以揀到我死死下!!
已經忘記左太安樓渣喳啦, 因為有時行過都唔見佢開檔, 都有幾年無食過了. 係無聊行入去食牛雜經過見到佢開左, 所以就打俾亞嗲問佢食唔食啦, 亞嗲當然死唔蝕底咁話食啦, 所以就買左一人一碗大既拎走. 佢找番錢俾我時我以為佢找錯, 我再睇下個價錢牌先知道佢一碗大既加到成$17, oh...........$17 一碗街邊檔渣喳??!!! 真係從來都無諗會貴左咁多(以前唔係咁貴的). d野再係咁貴, 我諗要買定d 陰司紙係身先夠錢了!! 呢2碗渣喳買左$34, 上面嗰2碗車仔麵買左$44, 咁你話d 渣喳貴唔貴呢?!! 個size 係普通既外賣碗咋, 唔好以為好大個碗!! 雖然佢係貴左好多, 但係依然都係咁好食, 咁多料. 唉, 下次又要死死氣再去買黎食啦, 鬼叫我鐘意食咩, 我2x年前已經食佢了!
最緊要講既係太安樓牛雜, 我既至愛, 尋日行左去整左碟牛肺同牛肚黎食, 嘩d 牛肺真係正到無朋友呀! d 牛肚就嚴佢未夠林. 但係$10 一碟仔, 真係抵食呀!! 我下次叫亞嗲買一盒番屋企做餸就可以影到相放係blog了.
2012年4月11日 星期三
cuisintec 一人前煲 - 幾鬼靚喎!!!
煎牛排用佢又得!
打邊爐用佢都得!
蒸餸用佢都無難到喎!
呢個煲係睇爽報見佢$138, 所以買黎俾亞嗲的, 未見實物都覺得好抵啦, 最初驚亞嗲又話我買埋d無胃野, 所以咪問下佢有無用先買囖, 又出奇地, 亞嗲都話好喎, 咁就即刻上網訂啦.
到攞貨番黎即刻開黎睇, 嘩, $138真係抵到爛, d料靚, 真係完全唔止$138呢個價錢的, 連亞嗲見到都話好靚(d料), 仲話好抵添. 又可以煎野, 又可以蒸野, 又可以打邊爐, 一物幾用都係$138, 抵到爛啦!
2012年4月10日 星期二
小菜王@深水埗 - ok, 算係好食既大排檔
由於一路都好想試呢一間大排檔, 所以死都要去食下(原本係尋日去完深圳時食的, 但係因為係深水埗食腸粉食到飽到嘔咁滯, 所以咪唔食囖). 今日去完珀麗灣特登搭車去食的, 我叫左亞嗲同2隻野去行下玩具街, 我就坐係到叫餸. 呢間野好跨張, 居然可以開到幾間舖咁犀利, 每間舖仲一d都唔細, 可以有1x張檯架. 佢既價錢係一般價錢, 但若以深水埗區黎計就係貴左d.
個墨魚咀幾得意, 口感幾好, 但係耐左就林鬼左. 碟霸皇雞就very 一般啦. 個椒鹽九肚魚就真係好食, 最好食係呢碟, 外脆內軟. 個勝瓜浸雙滑, 因為平時唔見有呢個餸, 所以見到就試下囖, 但係呢碟就比較清淡d, 所以佢地都係一般.
d野係ok好食的, 但係就唔值得all the way 搭車黎食囖.
挪亞方舟
亞嗲好耐無係紅日放假同我地出街, 所以今日特登放一日, 加埋前2日我知道去挪亞方舟有半價優惠, 而大兵聽到又話想去, 所以就成行啦.
我地係中環搭船入去, 落左船即刻醫左肚先, 我鐘意係去到個到係個到食野, 試下第2d區既食肆, 唔駛成日都係屋企附近食, 悶爆. 由於人生路不熟(雖然幾年前都去過一次), 所以都係求其揀左一間咋, 點知.......................好有意外驚喜喎, d 野全部都係好食既, 而價錢又大眾化. 連小冰最初話唔肚餓, 後尾都自己一個人食晒一碟雜排意粉. 下次再黎既話都會再食呢間.
食飽飯就行去挪亞啦(原本佢地話去沙灘睇下, 但我話去左挪亞先啦, 唔知有幾大, 唔知要睇幾耐呀, 因為個時都已經1點幾了, 人地6點關門呀!). 去到門口排隊買飛, 頂佢, 排左起碼20分鐘, 講緊係有太陽曬住既20分鐘呀!! 我已經排緊第4個, 都要排20分鐘, 真係火都黎!
入到去, 都ok既(以半價黎計, 若原價既話, 我情願去海洋公園啦, 多野玩好多), 叫做去下, 行下啦. 入面有2套戲睇, 好搞笑...............搞笑在每套戲都係5 - 10分鐘, 快過打針, 當你睇到好投入時就做完, but..............都ok既.
行完晒番到屋企, 2隻野睇番張map先發現我地有d地方係無去到, 我話, 鬼叫你當時唔睇而家先黎睇呀, 無用啦. (我心諗, 都唔會再去啦, 去一次ok了. 佢唔係話好差, 只係唔值俾130蚊囖.)
我今次同上次都係一樣, 好鐘意珀麗灣, 可惜既係我地要番工番學, 否則之前都已經買左呢到住, 因為我地好鐘意呢到既環境, 好多植物, 綠化, 好舒服, 空氣又好, 又無咁多人.
訂閱：
文章 (Atom)