突然間想食呢種包做早餐~~~~~ 奶醬包, 正!!

行行下價真棧, 突然間想食奶醬包, 所以就買左樽花生醬(平時我係唔食花生醬的), 跟住夜d再買埋錬奶, 就調配左上面呢盒混醬了, 原因係我咁樣整好晒方便食早餐時佢地可以最快最方便整到自己既早餐, 唔駛太杰, 又唔會太稀.

大兵話最衰無多士爐啦, 否則就可以食奶醬多. 我話, 要整我梗係有架餐餐啦, 但係食得多咪生多d 非滋囖, 到時佢又係到鬼叫啦!! 

下面就係我今次第一次買既花生醬, 之前未食過呢個牌子的, 買黎試下咋, 今次既混醬用左一罐練奶+半罐花生醬而成, 今朝食左好好味呀, 一早食d甜野, 個人都開心d!!

大兵小冰同我3個食左呢d 奶醬包2日, 都話好食呀, 我諗呢個真係一個好煮意!!

菜乾蠔豉豬骨粥

 

d 蠔係雪櫃拎出黎的, 所以有d 白色野, 唔係發mo呀!

因為懶, 唔想做咁多野, 所以又係突然間諗到整呢個粥的, 懶真係可以令人用盡你既小宇宙的呀!!

南北杏蜜棗日月魚粟米紅蘿蔔排骨湯 - 附食譜

上面呢d就係日月魚

由於想飲紅蘿蔔粟米湯,  所以就星期六買晒野準備係星期日煲啦. 到星期日朝早, 因為煲菜乾蠔豉豬骨粥, 所以係雪櫃摷d蠔豉既時候見到包日月魚, 所以又進行清貨大行動, 掉埋落去煲湯啦.  

星期一晚飲d湯, 今次啖湯好好飲, 佢既好飲係...........各種味都平衡, 無一樣搶, 係樣樣味都有, 所以好好飲.

材料:
1. 紅蘿蔔 2斤至2斤半
2. 粟米 5條(由於今次d粟米較細條, $10/5條, 所以用晒佢啦, 平時普通大小既就用2-3條)
3. 南北杏 適量
4. 蜜棗 5粒
5. 日月魚 適量 (今次用左9粒)
6. 煲湯排骨/豬骨 適量
7. 果皮 1角

做法:
1. 將豬骨飛水, 日月魚浸軟, 然後飛水備用.
2. 將南北杏密棗浸半軟後洗淨. 密棗頭同底都剪十字. 果皮浸軟後去左白色野.
3. 紅蘿蔔去皮洗淨, 切件.
4. 粟米去皮洗淨, 切開幾件.
5. 放12碗水入高速煲, 將上面所有材料放下, 煲滾後高速30分鐘. 排氣後, 打開蓋再用大火煲多10至12分鐘, 落鹽便可飲用.