自家制加料梅菜 - fissler 平底镬

指定要買呢隻梅菜, 因為我鐘意食菜多d, 所以買梅菜王而唔係買梅菜芯.

切開左d梅菜, 將個頭唔要, 攤開晒佢. 目的係將d沙唔駛藏係d莖同葉入面, 咁就會洗得乾淨d. 攤開晒之後就用水先沖下佢, 然後再用水浸佢等d沙再出埋黎. 我食完lunch 番黎(30分鐘到啦)轉水, 跟住再逐條用水沖下佢, 再用水浸洗下佢, 見d水再無沙就ok了. 唔浸太耐既原因係唔想d梅菜浸到無晒味.


梅菜洗乾淨晒之後, 就好似拎毛巾咁拎乾d水(見下圖). 

梅菜拎乾水後切粒, 大約係咁既大小啦. 

呢到係一包梅菜切好晒既樣. (切到手都軟晒!!) 

然後燒暖隻fissler平底镬(只限於好厚底既镬先可以咁做), 然後白镬(即係唔駛落油), 將梅菜倒入镬內, 不停兜炒,當你炒到覺得d梅菜乾身, 咁你就可以落紹酒炒幾炒之後, 再落d 沙糖落去. 份量係幾多無所胃的, 隨個人喜好, 但係當然唔可以超級多啦, 即係半杯都叫做超級多(以半包梅菜計).  由於我唔會好快食晒, 所以最後只係炒左大約一半既份量算了, 淨番既就放係冰格用晒呢d後先再炒埋佢.


炒完晒之後就係咁既樣, 灘凍晒之後先放入個樽, 放係雪櫃用幾多拎幾多.  我通常用黎蒸豬肉的.