全蛋麵 - 象印 + 壓麵機 - 附食譜

一路都想整全蛋麵, 前日叫亞嗲買埋鴨蛋, 所以今日就可以開工大吉啦.

跟住人地個食譜整, 好低能咁以為唔可以用麵包機黎攪(因為人地個食譜係寫住手搓咁咪跟住佢講既做囖), 後來自己都係搞唔掂搓粉, 所以又將所有野掉番晒入麵包機...... 最後一路睇住佢攪一路加水入去直至覺得ok為止.

用壓麵機一個人既話真係幾有難度, 除非係用電動既壓麵機, 否則真係要有人幫手先得, 尋日就叫左小冰幫手, 所以就快左好多.

食譜話d麵要陸4分鐘, 但係我一向唔鐘意食林既麵, 所以我陸左3分鐘就撈起佢了(因為我係整湯麵, 所以之後再放入熱湯內, 又會再陸多一陣的, 所以一定無問題). 其實陸3分鐘我撈起時都見佢已經係熟晒了, 下次再試陸短d時間先. 

食既話, 呢d全蛋麵真係好食過之前整個d烏冬同河粉, 因為個d係無咩味的(我指麵既本身), 呢d麵多左d蛋香, 所以好d. 我到開工整既時候先發覺原來佢要用食用"簡"水, 但係我無, 猶疑左2分鐘, 都係唔理佢死, 照整啦, 最多無咁好味啫. 因為我一心想整全蛋麵, 所以我唔會放過佢的.

d麵食落係軟身d既, 比起平時食既幼麵無咁實的(唔係話佢硬), 好難形容, 自家制即食既麵係鬆軟d, 我諗對於d胃唔好既人真係最好(但係唔係話佢林, 一d都唔林, 但係就會比出面既麵無咁實, 所以應該易d消化咁解).

亞嗲仲未食過呀, 番左d食唔晒又未煮既放係雪櫃睇下佢今晚食唔食啦.

全蛋麵食譜:

1. 中粉      300g

2. 鴨蛋      2隻 (原食譜係3隻雞蛋)

3. 鹽        1.5 tsp

4. 水        3 tb sp (原食譜係3tb sp) + 9g (視乎情況遂少加水)

5. 食用"簡"水 0.5tsp (原食譜有的)

6. 高粉      n咁多

做法:

1. 將麵粉, 鹽 放入麵包兜內, 中間開洞, 加入鴨蛋.

2. 按dough/pasta制, 開機搓粉.

3. 部機開始郁時遂少加入水, 可能一次過落晒d水, 否則可能過濕.

4. 聽到機發出beep beep聲後即禁start制再攪多5分鐘.

5. 用保鮮袋裝好, 放係雪櫃雪佢20分鐘(靜止).

6. 20分鐘之後將麵團分開幾份.

7. 每份再撤上乾粉(即高粉), 然後放入壓麵機.

8. 先較1度, 將麵團過機2次.

9. 然後將佢兩邊對摺, 較去3度, 再將麵團過機2次.

10. 又將佢2邊對摺, 較去5度, 再過機2次.

11. 將已壓偏的麵團2邊都撤滿乾粉.

12. 將一個盤放很多高粉在內, 然後放入切條機那邊的底下用黎裝住切完出黎的麵條.

13. 放入切麵機內切出你想要既粗幼.

13. 當麵條出黎時, 將盤內的乾粉整在麵條身上, 令他們不痴住其他的麵條.

14. 將多餘的乾粉"鄧"番出黎.

15. 煲滾水, 放少許油, 鹽, 將麵條放入煲內煮3分鐘, 用筷子整散麵條夠鐘便可撈起, 過冷河.

16. 想放湯, 炒黎, 伴醬食均可.

原食譜係呢度: www.wretch.cc/blog/kekekelly/13779290