自家制鹹金桔 -新鮮版 (附制作方法)

不經不覺浸左鹹金桔都有5年啦, 你而家見到既係4年貨仔(見頁底那幅圖), 但係事實上第一次浸那一樽因為製作失敗, 所以掉左啦. 係第2次浸成功, 所以先可以留到而家.

今年由於係屋企見到d桔仔總係覺得怪怪(因為個有喜慶既感覺, 覺得不適合), 所以就趁放假將d桔仔剪晒佢落黎, 整理佢用黎浸新既鹹金桔啦. 諗起有野玩, 我又好開心啦.

今年盆桔好靚, d桔亦好大粒, 又夠多, 所以收镬都好豐富. 尋晚放工特登走去買個大樽番黎, 個樽都成72蚊(5升容量), 但係…… 我又唔想買d 無手抽既(因為我怕第時拿起時會甩手成樽跌落地), 所以貴d就貴d啦. 整好晒有2樽(其實我都嚴唔夠多, 真貪心), 不過因為都幾阻地方, 所以…… 叫自己死心唔好再諗, 等出年再買桔整過啦. 因為浸左一段時間後, d桔係會縮細的, 所以可以轉個細d既樽慳番d位.  我整完2樽之後, 梗係將舊既打開黎睇下, 欣賞下d傑作啦, 點知有一樽實到打唔開, 叫亞嗲幫手加埋我兩個人一齊都打唔開,我問亞嗲咁點算呀? 亞嗲話咪由佢囖, 仲好啦, 實唔會有水氣入到去啦, 反正都有排未食得住架啦.

材料:

1. 大口既玻璃樽           1個

2. 粗鹽                   7包半 (我買左10包番黎)

3. 暖風機

4. 紙巾

做法:

1. 先將金桔用較剪剪下.記住要留番少少枝, 這可避免爆口有肉汁留出黎易發mo.

2. 逐個金桔洗淨, 再以鹽水浸一浸.

3. 放係度等風自然吹乾(需時1日).

4. 由於我怕d金桔未乾得透, 所以我會再用風機再吹一吹佢先入樽的.

5. 將粗鹽簿簿舖一層係樽底.

6. 每粒金桔用紙巾再抹乾及抹走D塵先放入樽. 放好一層後, 再舖上一層粗鹽. 留意d lone 位, 都要有鹽放入去.

7. 一層金桔一層粗鹽咁一路舖到上頂 (當然唔駛去到爆晒咁多啦), 將蓋扭緊便可.

TIPS:

1. 我第一年失敗係無做到用風機吹乾呢個步驟, 所以若家有暖風機, 可以開凍風吹下佢先入樽會穩陣D. 第2次用機吹多次再加用紙巾抹乾就無問題成功了.

2. 樽要買個大口的, 以便可以伸手放桔入內.

3. 個樽都要百分百係乾晒先好放桔.

4. D鹽唔需要禁實佢的.

5. 一個月之後可以睇下, 若無發MO就係成功左一半了.

6. 再過多幾個月之後睇下, 若D桔仔有縮細同變深色左少少呢樽鹹金桔就係成功了.

7. 此時你仲見到好多鹽係度唔怕的, 只係表示樽內既水既咸道已經飽和, 所以D鹽係點樣都唔會再溶架啦.

8. 若你需要由大樽轉細樽, 記住盡量保留番D水, 因為呢D水係令到佢地唔變同越浸越好既必需品.

左邊的是浸左4年, 右邊的是浸左2年.