鴻星第三擊の瑞士汁臘腸炒河

呢個炒河係我諗出黎既, 原因係我範得D臘腸係甜, 干炒臘腸河我覺得會唔match.  所以就諗到用瑞士汁黎炒河粉配D臘腸, 咁樣個味道會統一D.  星期五上網搵食譜睇下點樣用瑞士汁黎炒河粉, 講真, 我連干炒牛河都未試過成功架(次次都痴底又唔夠喊), 哈哈哈哈!! 睇左一陣都唔知跟邊個做法好, 因為好似個個都好簡單咁(因為我唔識炒嘛, 咪覺得太簡單唔穩陣囉). 尋晚叫工人買好晒野, 我起身後又要開始整另一道臘腸食物(臘腸包, 因為整包需時好耐的), 跟住............突然醒起, 我仲未識瑞士汁炒河係點樣煮架??!!! 跟住即刻拿拿林上網搵啦, 見到李x記那一個, 好啦, 死就死啦.

一路炒都相當順利, 炒完之後好開心呀(雖然未知味道如何), 因為隻镬係完全無痴底架, 勁!!! 見到隻镬可以照鏡都覺得成功左一半!! 影完相即刻急不及待試下先, 嘩, 真係幾好味喎!! 大兵一食即刻話好味, 小冰都係一樣話好味. 大兵仲好鬼快就添左第2碗添, 最後大兵係食左3碗, 小冰食左2碗(佢生緊痱滋). 亞嗲打番黎叫留系一小碗俾佢試下喎, 到佢放工番黎, 佢試完都話好好味.  我自己覺得佢除左好味之外, 最最最好既地方就係碟炒河一d都唔肥唔油的, 平時就算自己係屋企炒粉, 都要落多油, 因為一唔夠油呢佢就一定痴到亞媽都唔認得, 但係今次出奇地............. 完全無事喎! 亦可以擺脫埋肥同臘上畫上等號呢個定律.

材料: 3人份量或勉強4人份量
1. 臘腸 4條
2. 河粉 1斤半
3. 芽菜 $1
4. 洋蔥 半個(一個都可以, 隨個人喜好)
5. 蔥段 適量
6. 蛋 3隻
7. 瑞士汁 8 tb sp
8. 鹽 小許
9. 水 如有需要

做法:
1. 先將臘腸沖一下, 切片再一開二變成條狀. 香镬將臘腸炒香(只要見到d臘腸既白色變成透明便可)備用.
2. 芽菜用水浸住直至炒前15分鐘才"琼"水備用.
3. 蔥洗淨, 切段, 備用.
4. 洋蔥洗淨, 切條, 備用.
5. 蛋剪完後切絲, 備用.
6. 將河粉一條一條分開晒佢, 沖一沖水備用. 
7. 先燒熱油(用番炒完臘腸既油再加d新油便可), 下洋蔥炒香.  再加入芽菜同炒. 落少許鹽炒勻.
8. 見芽菜炒至開始軟身, 下蔥同炒.
9. 然後加入河粉同炒勻, 若你覺得太乾, 可加少少水去炒. 此時可加少許鹽炒勻.
10. 落瑞士汁將所有材料炒勻後加入蛋絲炒勻便可上碟.

tips:
1. 我覺得最緊要係將d河粉一條條分開佢, 咁樣唔痴镬既機會會大好多, 因為咁樣可以減少左你係镬炒散d河粉既時間.
2. 火力既控制亦都好緊要, 我無法係度詳寫出黎, 因為我又要炒, 又要影相, 又要教大細個火, 所以都記唔到幾時做過d咩, 總之就自己執生啦, 見唔對路就較番細d個火啦.

制作圖

其實今日整左3樣臘腸野, 暫時post完一樣先, 明天待續........

鴻星第五擊の炸雲吞 (臘腸餡)

呢個炸雲吞就唔係我諗出黎既, 係亞嗲諗出黎既, 不過就係我負責整(正衰人黎).  我諗d餡料時為左想顏色靚d, 所以就揀馬蹄. 點知我去街市搵馬蹄得一兩檔有, 但我嚴佢細粒, 所以又走左去2間超市睇, 點知2間都無. 激死, 於是又走番去街市死死氣買啦. 嘩, 好鬼貴, 成$14一斤, 痴線的.

係買餸時都猶疑過仲整唔整呢個餸, 因為今日已經整左2樣臘腸野啦(2樣都係我整嘛), 又唔夠訓, 所以都幾倦下.  後來又諗到, 今日唔整又要等下星期先可以整了, 加上小冰又快測驗, 唉, 好啦, 快快趣趣整埋佢先啦, 下星期都唔知仲有無時間整了(因為要同小冰溫書嘛)!  買完馬蹄又要搵雲吞皮喎, 因為我唔熟呢個街市, 所以又行左幾個圈先至問到有得賣, 真係行到腳都跛!

番到屋企馬上開工啦, 由5點頭開始整, 整到6點頭先整完, 跟住仲要炸, 所以搞到夜晚晚先沖得涼洗頭!

炸既時候, 一放落油時即刻成個人醒晒, 成個人好high, 因為佢脹到好大, 好似炸緊臭豆腐咁, 好得意.  由於入面既餡已經熟晒, 所以只要炸個皮就ok了. 第一轉由於未熟手, 所以炸完深色左d, 到第2轉時就好d了, 知道幾時要轉身了.  到炸完, 隻隻脹卜卜的, 個樣就幾好.

上檯啦, 急不及待咁試下, 嘩, 好脆呀.  但係個餡我諗就真係唔係幾match 呢件事了, 一黎好似皮還皮, 餡還餡唔關事咁的.  二黎係由於我唔識包雲吞, 所以唔敢放太多餡入去怕爆開, 所以d餡真係得太小了.  可能我屋企真係好少有住家炸野食, 所以雖然小冰生飛滋只食左一舊, 但係我地3條友都食左2/3呀(係2碟夾埋既2/3).  其他既唔知工人食唔食得晒, 我叫佢食唔晒都唔要了, 因為林左唔好食的.  我又放左d喼汁黎點, 都ok喎.  亞嗲同大兵都鐘意食..........個皮.  因為呢個餸, 所以下次我可能會試下整錦魯雲吞, 不過..........等下先啦.  我覺得呢個餸係唔合格的.

材料:
1. 臘腸 3條
2. 芥蘭莖     比臘腸既份量多一半(因為我想多菜少肉)
3. 馬蹄 6粒
4. 雲吞皮 4兩
5. 雞蛋 1隻

做法:
1. 先將臘腸沖一沖, 然後切粒, 炒至透明便可盛起備用.
2. 芥蘭莖洗淨, 切粒, 將佢炒至9成熟, 盛起備用.
3. 馬蹄去皮, 洗淨後用飲用水再浸一浸佢, "琼"乾水備用.
4. 將所有材料放埋一齊, 攪勻晒佢.
5. 將雞蛋打散備用.
6. 將雲吞皮放在手心上.
7. 將適量餡料放在雲吞皮中間.
8. 將蛋液揸勻雲吞皮的四條邊.
9. 將上下2邊雲吞皮對摺, 然後再將左加2邊雲吞皮對摺, 要確保所有邊都摺合好.
10. 燒熱一镬油, 油熱後(但油不能太熱, 否則會好易燶晒), 將雲吞放入油內.
11. 炸得幾秒, 便可以反轉. 炸到d顏色滿意便可上碟.
12. 食時可配上喼汁.

做作圖:

隻隻脹卜卜好cute呀!

睇下仲有幾多空位, 所以d餡真係完全唔夠多呀!!

鴻星第四擊の臘腸包

臘腸卷係一種由細已經知道佢存在既包點, 但係我係甚少食的, 原因係當你一口咬落去d臘腸度時個d油亦同時好似炸彈爆炸咁彈到你一口都係油, 當然啦, 係酒樓食, 佢梗係比d平既臘腸你食啦, 而平既臘腸就係好多好多肥膏架啦, 所以我好怕食臘腸卷的.  

就係今次, 又因為我嚴悶, 所以想係小菜以外既地方都試下用臘腸整野, 咁就想到整臘腸包啦, 而今次係唔會用成條或半條臘腸去整,原因係要避免又再一口油既情況, 係而家人人食野要求健康既情況下, 臘腸卷已經真係不合時宜了.  所以希望呢個臘腸包可以令人懷念一下臘腸卷的味道啦.

由於整包我真係................very 麻麻地識, 所以以下既做法可能係唔正宗, 唔正確, 但係整完出黎係食得入口, 唔硬, 熟晒啦.  所以個做法你地自己可以自行修改. 同埋, 整得成呢個臘腸包全靠係我既好幫手 - 象印麵包機, 哈哈, 無佢, 呢個包一定無可能黎呢個世界上. 因為之前一晚我被人嘈醒左之後到3, 4點先訓得番, 所以我好倦好倦, 咁整造型時整到一半開始我已經無耐性, 所以你見到有d爆左口, 有d 唔夠圓, 但係.........我已經唔想整啦, 我淨係知道好倦咋(唔夠訓真係會死人的!!!)!

材料: (12個份量)

粉團材料
1. 溫水 130g
2. 蛋液 24g
3. 高筋粉 260g
4. 鹽 1g
5. 糖 20g (因我唔想個包太甜, 而家個包係咸咸地的)
6. yeast 3g
7. 牛油 15g(後下)
8. 炒臘腸淨番既油 有幾多放晒落去

其他材料
1. 臘腸 3條

做法:
1. 將臘腸沖一沖水, 抹乾後切粒. 將佢用白镬炒至d肥膏變透明便可用碗裝起備用.
2.先將粉團材料順序放入麵包兜內, 然後禁dough那個制, 再禁start. 聽到beep一聲之後即刻再禁多次start制(total 會搓16分鐘), 部機會自動再郁的.  (由於次次都整唔到簿膜出黎, 所以今次我特登再行多一次(即係第2次禁dough) 8分鐘既dough(即係聽到beep一聲之後無再禁start了, 即係今次前後共搓左24分鐘).
3. 將一個大既兜渣上一層油備用.
4. 粉團搓好後將佢整圓佢, 然後放入個大兜內, 以保鮮紙蓋好, 進行第一次發酵. (而家呢個天氣室溫都可以了).
5. 大約1小時之後(見佢發大左一倍幾度啦), 就可以看看效果, 若無問題的話, 就可以禁下佢幾下, 等佢排氣.
6. 然後, 將佢分割成12份, 每份大約35g咁上下啦.
7. 將呢12份麵團滾圓後, 讓佢鬆馳10分鐘(以保鮮紙舖面)
8. 跟住將粉團碌開佢, 然後將臘腸粒舖面.
9. 將拉長左既粉團由上向下碌到最尾.
10. 將個尾收好, 同埋將所有口"練"實晒佢以防爆口.
11. 再將個粉團滾圓, 整竹番圓佢.
12.放入焗模內並用保鮮紙藍好, 進行第二次發酵.
13. 待麵團發至一倍大之後, 可以150度火預熱焗爐或光波爐.
14. 個爐夠熱後, 便可渣上蛋液將麵團放入爐內焗大約焗8分鐘便可.

制作圖:

查左蛋液先好入爐焗呀! (唔記得影相)