2010年12月31日@Pizza Hut

由於我好想係呢個假期盡量清敢d 野, 所以除左廚房係我主要攻擊既目標之外, 仲有d gift coupon亦都係被列入我攻擊既目標.

我地去到pizza hut,坐低睇左一陣個餐牌, 諗好晒叫咩野食啦, 亞嗲就叫個waitress過黎寫野.

Waitress: 先生想要d咩?

嗲: 我要一個xxx餐

Waitress: 好呀, 一個xxx餐

嗲: 一個xxx

Waitress: 一個xxx

嗲: 同埋要一個鮮果沙律(我唔記得左個名啦, 但係係沙律黎的)

Waitress: 好呀, 一個鮮果沙律.(當waitress係度寫緊單時)

嗲: 可唔可以俾大碟d呀? (我一聽到呢句已經想打亞嗲, 因為覺得佢好核突, 人地實會答你得一個份量架啦.)

Waitress: 可以, 可以大碟d.(waitress依然係度寫緊單) (我真係估唔到個waitress答佢可以大碟d喎, 個樣仲要係好認真, 那時其實亞嗲已經開始偷笑緊啦)

嗲: (當人地一答完佢可以大碟d, 亞嗲又即時,係真係即時話) 唔會加錢架喎. (我聽到已經笑到”令””咩”塊面向牆係度勁笑)

Waitress: 完全無反應 (我估佢聽唔到亞嗲講咩), 佢仲望住我唔知我係度笑咩tim.

到個waitress一走, 我即刻鬧亞嗲(當時亞嗲個樣已經v晒啦(victory)), 做咩咁肉酸係度叫人俾大碟d喎, 亞嗲好得戚咁話, 有邊d女見到我會唔死係我手上呀! 我話: 你食屎啦! 不過, 我又真係無諗過佢會答你可以大碟d喎. 呢次又亞嗲得戚番一次.

*我諗當晚係因為亞嗲連續番左1x日工, 難得可以放一日假, 所以佢好似放監咁!! 我當時聽到真係眼都突埋出黎, 因為佢好少咁樣講野的. 再聽埋之後個句真係笑爆咀, 所以有時同佢出街真係幾尷尬!

自家制芝士漢堡飽

尋日打開雪櫃先記起有芝士係度, 所以今日既漢堡飽就加埋d芝士入去, 等佢地清埋d野.  我放假既目的好似係幫屋企大清倉咁!!

佢地話今日個漢堡飽仲好食d, 可能係多d洋蔥同埋多左塊芝士啦,

個細既問我, 點解唔整魚柳飽喎! (大佬, 你估呢度係快餐店咩, 咩都有架!!)

* 點解我次次都影埋入面既相, 原因係我留番黎俾工人睇, 我點樣整, 因為佢地話工人整得唔好食, 梗係啦, 工人落沙律醬, 又無洋蔥, 所以俾佢睇住黎整啦, 我唔駛講咁多野.

青蘋果沙冰 - 爽呀! 附食譜

之前係工展會飲左德國佬整既沙冰(不過飲完都唔知佢係整咩味), 我幾鐘意飲, 所以就自己試下整啦. 原來好鬼死容易整的, 青蘋果味又好fresh, 夏天飲真係一流! 而家咁鬼死凍, 但係我地都覺得好味, 只係飲到震晒啫. 兩個蘋果可以整到3杯. d色好靚.

材料:

1.青蘋果               2果

2.冰粒                 大量

3.蜜糖                 5大湯匙

4.水                   小量

做法:

1. 將青蘋果洗淨, 將頂同底去掉, 隔水備用, 想快既就一開二.

2. 將所有材料放入攪拌機內打爛便可.

Tips:

1. 因為青蘋果太酸, 所以真係要5大湯匙先至唔太酸.

2. 下次我會試一個青蘋果一個紅蘋果, 我諗咁樣會可以落少好多蜜糖.

係呢度睇片:

http://www.youtube.com/watch?v=_gDZtSO2ZhY

*由於那隻未有牌既攝影師將我影埋入鏡, 所以最開頭個條片唔能夠放出黎.

 

糖醋豬軟骨 - 附食譜

因為我尋日係街市買左唔係好多餸, 所以今晚唔夠食物.但係我又死都唔想落街喎,所以咪打開個冰箱睇下有咩可以整啦, 一開, 嘩, 原來有豬軟骨呀(我真係完全唔記得左),從來都未整過,所以又無咩頭緒用佢黎點整, 上網睇完一輪食譜,最後就搵左一個但係又自己改左d野黎煮,好味呀, 好過用五花腩黎整, 因為佢炆完夠林但係又唔會散晒,仲好有睇頭,今次個味仲效得幾好, 所以我撈汁食飯, 佢地全部都話好味,yeah!! 我好鐘意食D酸酸甜甜既餸.

材料:
1.豬軟骨           約少於1.5磅

2.乾蔥頭           2粒

3.蒜               2粒

4.八角             半粒

5.薑               2片

6.蔥段             數條

調味料:
1.紹酒             1/2tb sp

2.鎮江醋           5tb sp

3.生抽             2tb sp

4.老抽             2tb sp

5.冰糖             適量

6.水               約1碗半

做法:
1.豬軟骨洗淨出水備用
2.乾蔥頭、蒜頭去皮拍扁洗淨備用
3.大火起鑊落油，爆香蒜、乾蔥及薑後，下豬軟骨，炒至表面乾身後灒酒加蓋片刻

4.開蓋加入生抽、老抽將豬軟骨炒香，加入所有調味料及蔥段大火炆煮片刻，然後轉細火(我用LC煲,所以用好細火便OK了)炆2小時至豬軟骨腍滑入味即成．

5.在最後15分鐘時你要試味將個味道較至你喜歡為止(即係加醋及冰糖).

Tips:

1.冰糖既份量真係要自己較,我比較鐘意甜的,所以我一路落,落到我覺得夠甜為止.

2.加入老抽及生抽爆炒時要小心將個火轉細少少及快手, 否則好易炒燶.

3.想更好味, 若你有時間,先炆45分鐘, 熄火等45分鐘.再煲番滾佢轉番去細火再炆多1小時15分鐘便可.(我今次就係咁做)

今晚食乜餸 - 2010年12月28日

1. 糖醋豬軟骨

2.冬菇蒸半肥瘦

3. 鮑汁生菜

自家制漢堡飽 - 今日早餐

前2日買左d 漢堡牛肉, 諗住整漢堡飽俾佢地食等佢地唔駛咁悶啦. 由於佢地唔係好食洋蔥, 所以只能加少少有個香味咋. 佢地話好味喎.

蘋果無花果南北杏蜜棗豬骨湯

尋日去左好多地方,去街市行黎行去都唔知買咩煲湯好, 想買紅蘿蔔但係又唔多覺眼. 想煲雪梨蘋果湯但係又唔想買咁多個雪梨. 最後…………算, 我番到屋企有咩煲咩. 所以就出左呢煲蘋果湯出黎了. 好甜, 好好味.

材料:

1. 蘋果(蛇果)            4個

2. 南北杏                適量

3. 蜜棗                  4粒

4. 無花果                7粒

5. 豬骨/豬展             適量

做法:

1. 將蘋果洗淨, 去籽去芯後一開八.

2. 南北杏先浸軟.

3. 蜜棗浸軟後上下都剪十字.

4. 大滾水將所有材料放入去煲去大滾10分鐘後轉細火煲2個鐘便可加鹽調味上檯.

關廟.麵 - 正, 完全唔會陸到好林的

呢包麵唔好問我係邊度買, 因為係人地俾既. 最初我都唔想食架, 係亞嗲死都要我煮黎食, 好啦, 煮就煮啦. 下面呢張相就係陸完之後個樣, 見到嘛, 係一條一條完全無發漲架, 所以到食既時候一D好林既感覺都無, 好有口感的, 用黎煮上海雲吞麵啱晒.

值得推介, 我見到個價錢係一包$13.5, 一包有9個麵餅. 佢好似係齋黎架, 因為我見佢寫"全素".

wasabi墨魚 - 附食譜

亞嗲個同事前日請佢食墨魚, 亞嗲話好好食,尋日去街市見到(之前一路都想買黎食, 但係唔知點整好), 所以買左一隻番黎.

一隻$35, 起埋骨, 去埋皮其實得好少, 但係食就真係幾好味. 我prefer點豉油多d, 好味過點wasabi.

材料:

1. 墨魚           1隻

做法:

1. 叫人幫你劏左佢, 番到黎將佢起晒啡色那層皮, 摸到有硬骨既都全部起晒佢.

2. 用鹽將佢洗一次後, 再用水洗多次.

3. 將佢片簿片.

4. 煲滾水, 要大滾那一種. 將所有墨魚片放晒落去, 整散晒佢, 4, 5秒鐘度可以將全部墨魚片撈番晒出黎, 格水後便可以上碟.

5. 食時點wasabi 或豉油(頭抽就更好啦).

Tips:

1. 所係用陶瓷刀黎切片的, 咁就可以切得好簿. 用普通刀既話好難做到呢個效果. 墨魚片唔夠簿的話就可能會出現un的現象.

 

2010 Unforgettable 劉德華演唱會

我由讀中學時已經好鐘意劉德華, 個時係電視見到佢會發顛咁叫的.但係到我見到佢真人時我又會好靜的, 原因係………好驚囖. 最好笑既係d人話番俾我聽, 我見到劉德華真人時塊面係紅晒的. 我自己當時係唔知道,但諗番起就覺得當時塊面係熱熱的.

一路都好迷佢, 如是者去到幾近年真係無咁鐘意佢啦, 一黎係轉左超迷張國榮(以前都好鐘意, 但係呢10年黎係鐘意佢多過劉德華的), 二黎係覺得劉德華都唔似人的, 佢個人係真係幾乎完美的, 一個咁完美既人好唔現實嘛, 係咪!! 同埋又覺得佢太瘦啦, 瘦到真係過晒龍, 有番咁上下年紀既人一瘦就好易老的.

直至舊年發生左講大話事件, 我就好唔鐘意佢啦, 係電視/街/報紙一見到佢既野就唔想睇, 個種感覺係反感. 反感既原因唔係因為佢有老婆而令我幻想破滅, 我不嬲都好想佢去結婚生仔, 佢都做左咁多年野啦, 好應該有自己既一個家, 有一個鍚佢既人, 有一個伴終老, 有兒有女嘛, 佢應得的. 但係估唔到佢係有視那個訪問入面咁信誓旦旦地講大話, 話如果佢結婚既話一定會告知所有人. 我諗如果我無睇過呢個訪問既話, 我無咁討壓佢, 因為佢講大話. 佢當時個樣係好誠懇的, 我仲等緊好啦, 佢終於都開下口講結婚呢d野, 呢一日應該都快黎啦, 我等緊鄧佢開心既一日. 點知, 原來係咁既………佢唔想提屋企人, 佢可以唔答/唔回應, 好似黎明咁啦, 佢從來都係晒人的, 佢唔會答人呢d野架, 但係我無對佢反感喎. 佢答同唔答呢d私人野係佢既自由, 但係就真係唔好講大話囖. 可能係因為佢之前係我心目中既image係一個完美既人, 到真係出現瑕疵時我又會覺得好難以接受, 同埋係人地老豆死左咁多日被人迫/被人踢先肯公開. 拜個外”苦”都拜得咁唔知點咁, 佢知唔知道有幾難為個老婆呢??!! 我覺得一個男人連咁少既事都唔可以為佢老婆犧牲一下(其實根本好多佢既fans 都接受到的), 呢個男人根本就唔值得去愛!  呢個唔可以叫做係男人, 男人應該係要保護個女人的, 但係倒番轉, 佢既女人(even係女家既人)要為佢做好多好多野.

所以原本我唔諗住買飛睇呢個演唱會的, 但係又無啦啦係公開賣飛個一日俾我知道, 諗諗下唔睇又好似唔知點咁, 最後就打電話去買啦, 我同自己講, 隨緣啦, 我俾一個鐘頭時間自己, 買唔到飛就算了(因為係2008年我真係完全買唔到飛, 所以無得睇, 當時係好失望的). 點知, 就係最後個5分鐘俾我打通左, 咁既然打到就買啦.

好啦,買到4張山頂既飛啦但係無以前好開心撲到飛既感覺(記住我2008年係買唔到正價飛黎睇的). 一子一日一日咁過, 我開始又有唔想去睇既感覺, 唔知點解, 我有諗過不如放番d飛出去啦, 有人買既就唔睇, 無人買既就睇啦, 等個天決定. 但係又諗下, 今年唔睇既話應該呢一世都唔會再睇喎, 咁個細既咪一次都未睇過劉德華既演唱會囖. 最後我問2隻野想唔想睇, 點知佢2個都話想, 咁好啦, 唯有睇啦.

一路睇都覺得悶架(即係後悔ing 囖), 可能d最鐘意聽既歌佢都無唱到(最起碼係連暗裏著迷都無唱, 情感的禁區又無唱), 我都見亞嗲成日打咸露, 又見到兩隻野係睇到無表情的(即係好悶).

直到見到劉德華著見紅色褸出黎, show佢那6舊腹肌, 帶埋個超, 50歲仲有咁既樣咁既身型, 真係………………仲有咩好講??!! 當堂又有番少少好似讀書時見到佢個種好high 好興奮既感覺. 佢真係好型. 好彩有呢一part, 咁先叫做……… 好d啦, 否則……… 真係後悔死. 成個concert除左呢一part, 最好睇既係葉德嫺唱歌, 佢唱歌真係好好聽. 嗰晚既嘉賓係謝安琪, 超失望囖, 情願葉德嫺唱多兩首仲好.

下次仲會唔會睇佢既演唱會就唔知啦, 因為………無左嗰種感覺就係無左, 所以人真係唔好呃人, 有好多野都番唔到轉頭的. 從呢件事, 我知道若亞嗲有女人既話, 個結局一定係離婚收場, 因我唔容許人呃我!!

 

好時沙嗲

之前係網上無意中睇到人地話呢間好時沙嗲既海南雞飯好好食,所以特登等到係睇劉德華演唱會既今晚去食啦, 因為順路嘛, 反正我都唔會係屋企食埋飯先出去睇架啦.

都叫做易搵既, 我地book左6點半, 但係就早左1x分鐘去到, 所以可以坐係舖入面, 過左一陣我已經見到多左好多人啦.

人地話最好食既海南雞我就覺得唔好食, 好淡, 無咩味.唔知關唔關因為個日多人既關係, 佢ling埋黎時見到隻雞d色水我已經知道奶野.食落………淡過淡水湖既水. 係d油飯就好番d囖.

亞嗲話最好食係個蝦麵喎(即係第1張食物既相), 我就無食過所以唔知, 但係睇樣既話, 都係呢個蝦麵最好樣. 第2樣好食既就係沙嗲, ok啦. 個喇沙就真係一般…………上環那一間巴東(我唔sure有無記錯名)好食過佢好多好多. 碟菜佢係炒燶左少少, 所以有苦味.

呢餐d野食真係一般啦…………!!!

 

華山論劍 (logostina平底镬 vs 孖人牌刀)

呢2套野一年只得一次出山既機會 - 就係工人放大假既時候, 平時佢地只能在廚房既櫃入面閉關, 今日先突然醒起(因為我想炒菜, 但係又唔想用那個死人煤氣爐黎炒(因為唔夠猛火, 炒成世先炒得完同埋d菜出好多水), 所以你見我成日都烚菜就係咁解啦.

今日又係佢地出肖既時候啦.

訓唔著玩咩好? 薑茶沐足

今朝6點幾, 因為個死人亞嗲無熄到個鬧鐘,所以我就監生被個鬧鐘嘈醒左, 一路都訓唔番. 對腳因為尋日做野企得太耐, 所以都仲係好倦, 雖然我訓晚已經用個枕頭long起對腳訓, 但係都無咩幫助. 所以就諗起用薑茶黎浸腳,希望可以好d, 因為今晚仲要去行尖沙咀, 又要睇劉德華演唱會, 所以一定要成12點先番到屋企.

呢盒薑茶係買野既贈品黎的,由於我一飲薑茶就會頭痛的,所以擺到已經過晒期啦(原本諗住俾人,但係一路都唔記得左俾),而家就用佢黎浸腳啦, 唔好浪費. 今朝同佢影相時先發現原來佢都有寫明可以用黎沐足的.

今日開始又凍番啦, 所以可以連續咁用佢黎浸下腳幾日,我諗可以幫到個人會暖d的, 因為我係d手腳都冰凍既人(雖然呢一年好似好左d), 諗住都被亞女浸下啦, 反正佢又係d手好鬼死凍的.

**************************************************

亞女一路浸一路話好正. 我浸完之後, 右腳既腳面覺得"拿拿地"的, 唔知點解呢.

今晚食乜餸 - 2010年12月24日

之前提過,由於亞嗲禁制我使用煮食用具,在有限資源下,我就整左呢D野黎食.

1. 瑤柱滑雞粥

2. 3吞 (東東鮮蝦雲吞, 東東菜肉雲吞, 淘大韮菜雲吞)

3. 蠔油生菜

瑤柱滑雞粥

尋日整左幾樣餸, 亞嗲一路洗碗一路係咁鬼殺咁嘈, 話好多野洗喎. 佢唔准我今晚煮飯, 要我煮粉, 原因係………只係洗一個煲就得.

但係我買左隻雞係雪櫃, 點煮到粉啫, 咁咪唯有煲粥啦. 所以就整左呢個瑤柱滑雞粥, 用LC煲黎煲D粥又快又錦, 真係幾好的.

 

今晚食乜餸 - 2010年12月23日

1.青咖喱薯仔雞煲

2. 燒肉

3. 白焯蝦

4. 蠔油生菜

湯: 冬瓜瑤柱淮山蜜棗豬骨湯

辣到爆炸既青咖喱薯仔雞 - 附食譜

上上次永安大減價時, 見到包青咖喱醬, 個樣好似幾pro咁, 記憶中紅咖喱係好辣, 青咖喱應該微辣, 所以就買左包青咖喱啦.

工人放假, 又係我一年一度開工既時候, 所以想清下d存貨, 就煮咖喱啦.

尋日做冬, 買左一隻雞番黎, 叫工人整左鹽水雞半隻, 咁淨番呢半隻就整咖喱剛剛好.

而家整完啦, 試下味, 嘩, 原來青咖喱咁鬼辣架, 辣死人, 呢次都唔知點食得晒呢煲野啦!!!

材料:

1.雞             半隻(斬件)

2.青咖喱醬        一包

3.薑              一片

4.洋蔥            半個(切大粒)

5.花奶            3湯匙

6.水              1碗(視乎實際情況而定)

做法:

1.先將薑及洋蔥爆炒.

2.然後加入薯仔一齊兜炒(此時加少少鹽), 聞到洋蔥香味後加少少水以免痴底.

3.加入青咖喱醬兜勻後, 加入適量水蓋上蓋炆20分鐘.

4.加入雞件兜勻後再炆多10分鐘.

5.加入花奶兜勻後試味,個味啱再炆多5分鐘便可.

呢個餸用LC煲黎煮最好,因為食既時候可以連煲一齊上檯,可保溫.

**************************************************

食左啦,嘩,辣到爆炸,我只係食左2舊薯仔(好似一舊tim咋)同2舊雞就完全頂唔住,要即刻開罐jolly sandy黎飲(食第2,3舊時已經要飲汽水啦,唔係會嘖火).停左無再食一排, 但係不停咁飲汽水解辣,兩個咀唇都慶晒,可想而知辣成點. 成煲野唯有倒晒佢啦,因為我屋企無人食得辣的!!

自家制燒肉 - 失敗篇(另外一種做法)

係惠康見到D豬腩肉好似OK(因為我買既時候立一立咋), 所以買埋佢. 番黎屋企睇下張單先知道, 原來買滿30蚊豬肉會有85折的, 所以無啦啦平左$5.8, 真係意外收獲.

今次係試另一個做法, 呢個方法係唔駛插lone的, 所以睇下又咩效果啦. 已經醃左成晚啦, 一定入晒味啦.

材料:

1. 豬腩肉            2條

2. 鹽                好多

醃料:

1.五香粉             4 tsp

2.紹酒               適量

做法:

1. 將豬肉洗淨, 格水備用.

2. 以紹酒先塗勻所有豬肉兩旁(即係除左d皮外).

3. 再以五香粉塗勻所有豬肉兩旁(又係除左d皮外).

4. 用大量既鹽醃豬皮面, 最少幾個鐘, 可以放入雪櫃過夜更好, 因雪櫃可以將水份抽乾.

5. 燒之前先用紙抹走晒所有的鹽.

6. 將光波爐以250度火預熱.

7. 在豬皮面上查少少油.

8. 放入光波爐內以250度火燒而熟及見到皮爆花便可上檯.

***************************************************

賽後檢討:

1.個皮一d都唔掂, 唔脆,硬.........食唔到的.

2.唔知係我整錯定點, 近皮那些好咸.

3.我落五香粉太多, 所以燒完出黎太黑.

4.d肉個味唔夠另一個做法好味.

5.唔會再encore!

再黎叉燒 - 附食譜

由於工人放假, 所以尋日當然係物盡其用, 買定d野, 等工人整埋佢, 我就洗少d野啦. 去左惠康, 見d梅頭夠肥, 所以就買左黎整叉燒啦.

今次因為舊肉夠肥, 所以真係更甘香. 正!

佢最好就係用黎做晚餐又得,用黎整湯粉又得,多變化.

材料:

1. 梅頭豬肉(肥肥地)    (呢度見到既係一開二出黎的其中一塊)

2. 紹酒                適量

3. 叉燒醬              1.5湯匙

4. 海鮮醬              3/4湯匙

5. 老抽                少許

6. 豉油                少許

7. 蜜糖                1 茶匙

8. 蜜芽糖              適量

做法:

1. 梅頭若太厚將佢打橫一開二. 洗淨備用.

2. 先用紹酒查勻豬肉.

3. 然後將上述材料#3-#7搞勻後, 加入豬肉, 將整塊豬肉都浸滿醬汁, 醃過夜. 若第2日晚上才煮, 可在早上將豬肉反轉, 令醬汁再均暈地浸滿豬肉.

4.先以250度預熱光波爐.

5. 將豬肉放入, 兩邊燒到你喜歡的程度便可. 燒幾耐視乎你的豬肉的厚度(最少每邊都要6, 7分鐘).

6. 將蜜芽糖塗在在叉燒兩邊便可.

7. 用較剪剪開便可.

*用淨左既醃料又係用黎番兜整燒排骨, yeah!

是日午餐 - 叉燒湯米

天然椰子號 - 香料舖/椰子舖

上個星期日(即係19號), 由於要去北角睇那個loyola爐(紅外線爐), 所以去左北角那間實惠, 最後又係亞嗲話怕危險無買到, 改左買loyola既電磁爐.

之前講左好耐話想去馬寶道那間香料舖, 就一於今日順路去埋佢啦. 其實我唔知地址的, 淨係記得馬寶道咋, 所以就由馬寶道街頭一路搵, 又好彩喎, 唔係行左好耐就見到啦.

入到去比想像中簡陋, 但係佢d野大部份都係比出面平, 同埋老板又好人, 你係度係咁睇野佢都唔會嚴你阻地方的. 佢除左香料, 仲有槨子賣, 亦有d印尼野, 馬來西亞野賣. 我係度睇左一陣, 又俾個死人亞嗲問我買咩呀? 我話: 無野一定要買喎. 亞嗲:咁你又黎? 我: 黎睇下唔得呀, 犯法呀? 拉我呀! (我都未睇得晒d野點知我想買咩喎,都低能架!)

D男人真係好q 煩架, 慢慢睇下野都唔得, 但係又話陪你去喎. 佢係有陪, 但係陪得5分鐘就唔耐煩囖. 所以去工展會我同亞女自己去係明智既決定, 鐘意行幾耐就行幾耐, 睇咩就睇咩, 唔駛俾人煩住晒.

講番呢間舖頭先, 由於我真係在無準備情況下去左呢度, 所以一時間都唔知買咩好, 最主要係好多野佢識我, 我唔識佢, 買黎都唔知點用或整咩好. 所以都係買番d我有用或我知佢係咩既野啦. 我諗住用d果皮粉黎醃魚類或者雞,睇下 o 唔ok先.

今次既收镬係:

陳皮粉(一包$3), 黃薑粉, 咖哩粉, 五香粉, 蒜頭粉, 沙薑粉(一樽$20)馬來西亞既止痕膏($10), 細魚露($8.5)同埋椰子肉($20/斤,呢度買左約$14)

自家制椰汁 (正) - 附食譜

買左部機剛剛一年, 最最最想整既係椰汁, 係一周年紀念終於整到出黎啦.  個食譜係 “火石”找俾我的(在此先謝). 但由於各人口味不同, 所以我按我的口味修改原食譜以附合我地既要求(當然係整完飲埋先知道有需要修改啦).

亞嗲話好飲, 我都覺得好飲, 但係就覺得多左花奶, 所以以下食譜係減左份量的. 真係幾好味, 又簡單, 又快趣, 超爽! 不過我就整得輪盡d(我一排無用部機啦).

其實d椰子好快已經打爛晒了, 我之所以打咁耐只係因為要打爛晒d冰糖咋. 你又見到我打左一陣之後倒左一大碗出黎, 原因係個壺打打下突然滿晒, 所以要倒左d出黎先繼續打埋佢. 咁打好之後, 又要將呢一碗未打好既倒番入去再打, 所以就搞左咁耐.  我諗下次半個椰子咁打最好. 打好之後要格渣先好飲呀.

你見到呢d椰子全部都係白色因為我唔係成個椰子咁樣買,個老板話我整椰汁, 買淨肉整出黎會靚仔好多,因為無晒d啡色野. 所以我就買左差唔多一個椰子咁上下既肉啦. 呢d 椰子肉我係北角街市那間香料舖度買的.地址見頁底.

材料:

1.椰子          1個

2.冰糖          110g

3.水 + 冰       1200g (水和冰的比例隨個人喜好)

4.花奶          250g

做法:

1.將所有材料量好, 然後倒晒入機內, 打爛晒佢格埋渣就飲得.

Tips:

1.椰汁一定要夠凍先好飲的, 所以一定要落多少少冰.

2.一定要格渣, 唔係會成口都係椰絲, 唔係講笑, 我最初無格渣, 真係飲到一口椰絲架(我即係想話d椰子可以打到咁爛).

3.要格渣, 可以用豆漿袋黎格, 一流.

4.一個椰子分開2次黎整唔駛怕部機滿瀉.又或者人少,可以用半個椰子肉及所有份量減半.

呢度有片睇(part 1 & part 2), 由於此片係一位未夠"稱"既攝影師所拍,所以效果真係麻麻,敬請見諒!

自家制椰汁 1

自家制椰汁 2

sorry,之前既part 1係放錯左片上去,我尋晚明明翻睇過, 但係唔知點解會出左錯的.

*工人懶, 只係搵左個比較大lone既野黎格咋,所以格得唔夠好, 下次叫佢用豆漿袋先得.

椰子舖

名稱: 天然椰子號

地址: 香港北角馬寶道1號k地下

(老板好好人的,有問必答,d 野都幾平. 另外我買左盒細細既止痕膏(右下角紅色那圓型物體),唔知駛唔駛得既呢?)