結婚周年紀念 - 鴻星海鮮酒家 (銅鑼灣分店)

又到左結婚周年紀念了, 不知不覺間就結左婚1x年, 但係其實我同亞嗲都唔覺結左婚咁耐!! 咁係好事啩, 唔知道了!!

原本我係想食片皮鴨的(基本上我每期都有唔同既野想食的), 但係我又覺得用左張鴻星禮券會有意思d, 所以最後都係揀左去鴻星食.  點解我話用鴻星禮券有意思?? 張券同我地結婚周年紀念有咩關係?? 事緣係之前參加左鴻星那個食譜創作遊戲, 我地整既其中一個餸(炸電吞)俾佢地揀左係其中一個有創意既餸菜, 所以就有一張禮券送番俾我地.  咁又點解同結婚周年有關呀? 係因為呢個餸係亞嗲諗出黎, 然後由我去將佢實踐出黎的, 佢只係講左個idea, 我就去落手整.  咁呢張禮券係我地2個人合作嬴番黎的嘛, 所以就同結婚周年可以扯上關係啦.  再加上, 一路小冰都好緊張呢個遊戲我既進度, 大兵都有問下, 所以我又覺得呢個遊戲又係我地一家人整體既事, 咁結左婚先有呢個家, 咁...........就有關係啦.

尋日好開心終於可以去深圳dup骨啦, 成2個月無去, 倦到死咁滯!!  dup dup下後期我都訓著左覺! 跟住夜晚就去左cwb既鴻星食飯, 我地一早係網上睇左佢有咩野食, 所以target好食呢個鮑魚魚翅餐, 佢8點半後有8折添, 所以就book 左8點半先食.

其實之前都食過好多次鴻星, 因為我老豆好鐘意係到食飯的, 但係........次次都係叫12人的套餐, 所以..........真係very 一般.  so 對d食物都無咩期望.

最先黎既翠肉瓜炒北寄貝, 呢個我地全家都鐘意食, 清得黎d北寄貝幾甜.  

跟住係個翅, 都ok.  跟住黎個炸帶子...........我超like呢個, 因為平時d炸海鮮卷我係唔吼既, 食到嚴晒啦, 呢個.............出面一條條個d好得意呀, 個口感幾好, 又唔heavy. 我問亞嗲一條條個d係咩黎, 佢話係麵粉喎, 我死唔信囖!! 

然後就係鮑魚...........d冬菇真係唔好食, 我同我女都鐘意食冬菇的, 但係我地2個都話唔好食. 但係d 鮑魚就好食, 幾爽口.

條魚就蒸得幾好, 無over, 所以好好味, 係嚴太少蔥, 所以唔夠香囖(同埋d蔥唔知點解係全白色既??). 小冰係食條魚食到.................完全無坐低過, 因為佢呢頭夾, 即刻放入口, 跟住又即刻夾, 咁你話, 佢邊有時間坐低呢??!!! 我食第一啖時, 條魚已經無左1/4啦, 變態!!

跟住黎個雪x紅麵..........由於食左2碟濃味既餸, 所以顯得呢個麵好淡, but食多兩啖就好d(因為好少, 所以即係食到最後一啖時先覺得好d, hahaha).

個甜品好好味呀, 原因係唔太甜, 同埋唔係咁粉(有時d 酒樓既紅豆沙唔知點解係粉粉地的). 我好快食晒啦.

最後黎既係壽桃包, 其實都係因為呢個壽桃包我地先confirm揀呢個餐的. 但係尋日拎呢d包黎既亞姐拎埋黎時話壽包呀, 我一聽就超唔高興, 因為係幾個月前知道壽包係白事先食架.  呢個係一路以黎好多人都犯既錯, 包括以前既我, 但係知道左個錯之後, 就覺得超錯, 係真係一個唔可以唔應該犯既錯.  喜慶事食既係叫做壽桃包, 而唔係壽包呀. 我諗, 所有有賣呢d 壽桃包既食肆都應該同d員工講番呢個問題, 糾正番佢, 大家一齊錯既話就無問題(因為聽者根本唔知有錯), 但係對於知道真相既人黎講就好唔高興啦.  仲有d 壽桃包係唔夠粉紅色, 所以唔靚, 吸引程度大減, 失望!

除左呢個問題之外, 成餐飯我地食得好開心, 因為............真係好抵食囖, 當然係講緊8點半後有8折啦, hahaha.