上面呢2張相係我自己整既蘿蔔蔔糕.
下面呢2張相係人地俾既不知名酒樓蘿蔔糕.
大家睇完覺得點呢?? 唔駛試味, 一睇就唔想食啦, 不知名酒樓個D 係無咩料的, 就算係有, 都9成半係蝦米ONLY!!!! 大佬呀, 一年先食得一次, 唔駛咁刻簿呀??!! 當然我個D係有不足之處, 就係唔夠實唔夠企身. 但係就好有蘿蔔味同多料. 而LEE D呢..........一食落去, 嘩..........腥到亞媽都唔認得, 鬼咩, 咁死多蝦米, 唔腥就有鬼啦. 亞嗲同大兵話OK喎, 我叫佢地食晒佢. 最後淨番係到個D, 亞嗲咪又係倒晒佢, 原因係........我話明我唔會食的, 佢食就佢自己煎.
我諗係呢個時候, 個個屋企都會做同一動作的, 就係清糕大行動, 我都唔例外, 所以就煎左D蘿蔔糕, 年糕黎當晚飯就算. 但係............唔夠飽架嘛, 所以就煲左D白粥啦, D糕肥膩, 清下腸胃都好. 係浸米之後, 突然間諗起亞嗲之前拜神我留番D 豬腳係雪櫃喎(因為真係完全唔記得左LU), 雖然得2舊, 但係唔用埋黎煲粥就係煲湯, 咁就一於煲粥啦.
D粥煲得超綿, D米開晒花的, 所以好好味, D粥係全部食晒! 碟鹹豬手係因為去OSIM買枝按魔棒後行超市時買的, 所以呢一餐又係9唔搭8餐既好例子啦.
1. 蘿蔔糕
2. 年糕
3. 鹹豬手
4. 咸豬手粥
'
呢盒年糕係人地送既, 遇啱我今年自己懶無整年糕, 所以就好開心啦. 睇表面就一般啦, 但係一打開就有d驚喜, 因為佢個模係有突出黎既 "鴻星"字樣, 我覺得幾高檔幾靚, 送俾人真係幾大體的. 剪開晒d包裝之後見到個年糕既真身, 我嚴佢d色比較淺啡, 可能係我自己整親都係買增城蔗糖既關係, 因為增城蔗糖係深啡色的, 非常深個隻, 所以我見慣左就會覺得年糕應該係咁既式. 所以心理上覺得佢係麻麻的.
煎左一碟出黎食, 食落, 咦, 又ok喎, 佢最好既地方係佢唔係太甜, 但又覺得有少少甜味. 我自己整既年糕都係咁, 好怕太甜, 咁食多件都膩晒啦. 佢呢個甜度就真係剛剛好, fit晒. 又好得意喎, 唔知點解, 呢個鴻星年糕係無我平時自己整個d咁痴身痴勢的, 我係唔鐘意落蛋去煎年糕的, 平時我自家制既年糕, 一煎時痴到亞媽都唔認得, 好煩. 呢隻鴻星雖然都痴, 但係相對地好左一半了, 咁樣疊埋放埋一碟, 食時都叫做大致可以夾番開一件年的. 所以整體黎講佢有80分, 幾好!
今日又要開工啦, 所以尋日就整定d餸, 聽日放工番黎可以快d開到飯啦. d 鴨掌原本係諗住年廿九個晚煮既, 但係.................... 又唔夠時間囖, 所以就一路擺係雪櫃, 直至尋日衫三先整左佢. 好耐無整鴨掌啦, 又咁橋係報紙到見到有教炆鴨掌, 所以就剪左落黎跟住整, 咁咁咁橋, 佢係要用鮑汁黎炆既, 我雪櫃仲有上次d 用剩既鮑魚汁係到, 所以就.......萬事俱備啦.
由於個食譜係無鹽(我當時煮都有?? 唔駛落鹽咩??), 所以整出黎完全唔夠味, 因為有鹽先可以吊到d味出黎的, 然後開左飯都要拎番入去再加d 味, 所以呢個係唔成功既, 下次再黎過.
另一碟餸就係d 拜完神既燒肉, 雪櫃真係好多野, 所以快d 清左佢, 買左d 冬瓜番黎炆, 嘩, 好味呀, d 冬瓜索晒d燒肉味, 正! 個個都係食冬瓜為主!
1. 鮑汁冬菇髮菜炆鴨掌
2. don't 瓜炆火腩
3. 鮑汁西生菜
今年新年, 係結左婚1x年黎第一次咁舒服. 一黎初一唔駛去d 閒人屋企, 二黎, 我初二同初三都選擇留係屋企, 因為真係好倦, 雖然我都只係主力做左2日野, 但係由無工人開始積落黎既倦, 再加埋呢2日, 真係............攞命.
我初一晚去完我媽到, 之後就一路無出過街, 到初四番工先蒲頭. 6x個鐘無出過屋企門口真係爽到爆!! 咪以為我好得閒, 初二又係到洗衫, 煎糕, 教小冰, 都係無事忙, 無咩停手. 直至初三四點後先可以一個人靜下咋, 因為我耍左3隻野出去拜年, 我自己留係屋企, 煮2個麵食, 加d 湯渣又一餐. 我食既時候係到諗, 若餐餐都可以咁快靚正就好了, 唔駛做死人啦!
d 衫尋日朝早洗完已經開左成6, 7個鐘抽濕機都仲未乾, 真係煩, 呢d天氣真係唔知幾時先凍完濕完呀!!!
今朝好彩無想像中咁凍, 但係都唔係幾願起身, 鬼咩, 尋日我都仲訓到9點半, 10點半先離開張床起身. 亞嗲話尋日朝好凍喎, 唔知呀, 我仲係被竇, 開住電氈訓緊, 不知幾爽!!
今日我番工, 2個仲放緊假, 叫做warm up下先, 下星期番學又要早起身煮lunch了, 希望到時唔好再咁凍啦, 唔係就慘啦!!
希望年年新年都可以放假真係放假啦!!
個死人yahoo blog, 轉黎轉去都轉唔到紫色, 真係火都黎, 成Q日都係咁!!
呢隻烏結糖係第2年收到既新年禮物, 佢係好味架, 但係衰在好快就到期(都可以講話係佢既優點黎既, 因為少防腐劑嘛). 由於佢快到期, 所以就要博命係佢到期前食晒佢啦, 衫三個日, 佢地去左拜年, 我一個人食左差唔多10粒咁滯, 真係唔爛牙至奇啦!! 但係佢又真係好食, 又忍唔住口唔食的, 做人真係矛盾呀!! (呢段既紫色, 我係搞左十萬次先轉到的!!)
上下2張相都放左部電話係到俾你地睇下個大小比例.
一早問左我亞媽係咪叫PIZZA, 因為若佢煮飯既話, 咁我就幫手煮少少拎上去啦. 其實都係prefer 叫pizza, 因為..........唔駛做到隻狗咁嘛, 又要買, 洗, 切, 煮, 再黎洗碗, 唉, 應該話係做得仲辛苦過隻狗!! 叫外賣最好啦, 食完掉晒佢就可以了, 爽呀!
我老豆話前2日見人係間pizza舖頭拎住個pizza出黎, 佢聞到好香, 所以佢就負責係去買個番黎試下啦. 咁一個pizza都唔夠食架, 所以就再係pizza hut到叫多個套餐加多少少野就夾啱時間一齊食啦. (其實係7點時已經有人忍唔住開左d 壽司黎食. 到食完d pizza我亞媽先醒起未拎d壽司出黎食, 我即刻話, 一早食鬼晒啦!!)
好啦, 到7點8, 個pizza 番到黎, 嘩...................,個盒大到無輪呀..........真係差d 連門口都入唔到. 跟住大家就好多??? 又話18吋既, 18吋無奶由大得咁交關架??!! 唔通係個盒大, 入面細好多既?? 跟住一開...............嘩))))))))))) 痴q線架, 唔係得個盒大, 連個pizza都一樣係好很大呀!! 死唔信佢係18吋囉, 我細佬攞把拉尺出黎度, 妖, 成24吋喎!!!
跟住大家就爭相起烘, 搵機影低佢啦, 因為佢真係差唔多有成張檯咁大, 我諗, 真係好難再會買多一個咁鬼大既pizza啦. 為左顯示佢有幾大, 所以就放左部手機上去黎做大小比例既概念, 睇番d相, 個手機係個pizza入面真係小毛見大毛!!
話時話, 個pizza又真係幾香既, 食落無pizza hut個d 咁漏. 又好彩, 佢雖然唔係厚底, 但係又唔係我最憎那一種簿到好似餅乾既底, 所以佢係幾好食既, 但係就真係俾佢個樣已經嚇到你飽晒了. 我一個人食晒一件, 其他野都無咩點食過, 因為食一件都已經食左好耐, 食完個胃係飽, 個肚係餓既, 但係.......隻手好倦, 唔想再食了!!
10個人+多一個2歲幾既細路, 呢到d野都食唔晒, 個大pizza仲淨番2大件, 最後又因為存放既問題, 俾人斬開18碌先可以keep到咋. 個細既pizza 係完全無食過添呀, 佢變左做我初二既lunch呀!!
食完無野做, 後來我地係到玩估下個pizza幾多錢. 我大e 初頭唔肯估架, 因為佢怕輸左要拎d 食唔晒既pizza番屋企, 後來我話, 根本無人會肯拎架啦, then 佢地先肯估咋. 我就估個pizza $350, 我e姨丈估$520, 我妹夫就估$650, 我細佬最賤, 佢等我地估晒佢就搵個中間位, 因為咁樣就一定唔會輸啦. 我同亞嗲完全唔認為佢值$650, 但係又因為我老豆又真係顛既, 就算真係$650 佢都會買架, 所以............ 又唔敢講100%無可能. 但係就真係唔認為佢值law. 後來上網search, 都唔肯定幾多錢, 最後係我亞媽打俾我老豆問, 跟住我老豆好得閒咁問齊邊個估幾多錢, 問晒先開估, 原來呢個pizza係$270(即係我嬴左). 咁都ok既, 因為佢真係好香, 香過pizza hut既好多. 但係原來, 到我地食完, 我老豆都一值以為佢買既係18吋pizza, 唔知原來係24吋架, 真係低能!! 食鬼死我地咩!!! 好彩, 我地都食唔晒, 留番好多俾佢慢慢嘆!
呢個pizza真係玩味好濃!!
今日係年廿九食團年飯的日子, 所以就買隻鮮雞番黎煲湯啦, 又因為係做節, 所以要落重料, 又順便清一清個雪櫃佢, 呢D 鮑魚係我亞媽買黎既, 用左一半, 留番一半下次用啦. 下次我諗住係煲淮山杞子雲腿鮑魚螺頭雞湯, 諗起都好味.
今次啖湯好好味呀, actually我係好鐘意飲雞湯的, 所以係雞湯我都鐘意飲既. d 湯又清晒啦!
材料:
1. 鮮雞 一隻
2. 淮山 8, 9片
3. 杞子 一撮(隨意)
4. 雪藏鮑螺 2隻 (其實我都唔知佢係鮑定係螺!!)
5. 金華火腿 3 - 4片
6. 薑 1 - 2 片
做法:
1. 用水將淮山浸半小時後, 沖水備用.
2. 杞子用水浸15分鐘, 沖水備用.
3. 雪藏鮑螺預先一晚放在下格解凍. 第2日用水洗淨, 一定要將d 黑色野刮晒佢(見上圖係已經刮晒的), 否則我覺得好污漕, 唔會食. 之後就切片備用.
4. 將雞洗淨, 買既時候可叫人起埋皮, 斬開四大件. 將所有肥膏去掉.
5. 金華火腿切片後沖水備用.
6. 煲滾水後將所有材料同下, 水滾後大火煲15分鐘. 然後轉中細火至水滾起(不需大滾), 再煲多3小時便可. 飲湯之前將所有面頭既油"筆"走晒佢, 加鹽即可飲用.
今日係年廿九, 聽日就係年初一, 所以有好多野要做. 但就算有幾多野要做都好, 都要食飯, 呢樣係最煩既野. 煮呢個炒飯既原因都係好簡單, 就係要清雪櫃既野, 因為有包火腿同一包隔夜飯, 為左要清d位黎放蘿蔔糕, 所以就唯有煮晒佢啦. 但包飯又唔夠3個人食, 所以又要煮d新鮮飯.
呢個炒飯係我幾個月前上網睇一條片然後憑記憶煮出黎的, 到差不多炒好既時候, 我突然間想加xo醬落去, 所以..........即係熄火去開樽新既xo醬出黎. 因為怕太辣大兵食唔到, 所以都係加左唔太多, 費事真係太辣就浪費食物了. 至於佢點解叫做懶人屋企炒飯係因為我只係見屋企有咩就落咩去炒, 但係..........其實我屋企仲有腸仔蟹柳呢d可以放落去的, 不過...因為... 我仲有好多野做, 所以求其有蛋有火腿就算了.
炒完個飯出黎, d 色幾靚喎, 再加埋隻镬可以照鏡, 一d都唔痴底, d飯又係我炒咁多次飯以黎(其實都唔係炒左好多次飯)最乾身既一次, 所以好開心啦! 以前我唔識用呢隻pan的, 掌握唔到點用, 所以買左4年都只係用黎白镬炒野咋. until 搬左黎呢間屋, 無啦啦我又可以識用喎, 仲用得幾好添, 真係........世事無絕對, 唯有試多幾次!!
小冰一食就話: 媽咪, 放完假番學, 你炒呢d飯俾我做lunch呀.
我: 炒飯要炒好耐架喎, 一早留留, 咁我咪又要早d起身囉!!
我地3個都覺得唔夠xo醬味, 下次可以再落多d. 呢樽xo醬我係工展會肥滔既美味棧到買的, 因為見到佢好多瑤柱覺得幾抵買, 所以買樽黎試下, 呢樽野好似係100蚊(工展會價).
無左工人之後, 我又再可以盡情做自己想做既野啦, 唔駛怕做完等於白做了.
尋晚好緊張咁搵番支清潔劑黎清潔呢D 煲, 今朝............呢個JOB都要輪到夜晚8點幾先輪得到. 一路抹, 一路見到照晒鏡的, 好開心. 個煲底, 係咁用力擦, 擦到真係手都軟埋要轉用左手再擦, 先至可以見番個牌子咋, 未洗之前係完全見唔到FISSLER呢D英文的!!
呢到2張相, 一張係個高速煲, 另一張係個平底PAN黎. 高速煲下次我再諗下辦法睇下點樣再去洗下, 希望洗得甩多D D 漬啦. 係有工人呢幾年入面, 我肯定呢D 字係從來未見過陽光的. 所以有工人其實係提升左生活質素定係降低左生活質素呢?? 對我黎講絕對係降低左!!
又到左星期五啦, 根據慣例都係煮通粉食. 尋日已經買好晒d 材料, 洗埋, 切埋, 今晚番黎就可以即刻煮了. 今日落左好多好多紫菜, 原因係........... 我見我仲有幾包存貨係到, 所以就落重料去貨啦.
再加埋我至愛既南x島辣椒油同新買番黎既越南魚露, 正!
尋晚約左個老朋友食飯, 所以叫佢地3個係街食啦, 點知個亞嗲居然走左去買壽司食!!
尋晚同大兵講電話:
佢: 媽咪, 你幾時番呀(唔知關佢咩事呢??!!!)?
我: 會夜啦.
佢: 咁我聽日食咩呀?
我: 我俾錢你買lunch啦.
佢: 吓??!!
我: 吓咩呀?
佢: 我想食屋企飯呀?
我: 你唔係好鐘意出去買飯食咩?
佢: 唔係呀. 我想食屋企飯.
我: 但係無餸喎. 一切煎午餐肉啦.
佢: 都係唔好啦, 費事你咁早起身煮飯啦.
我: 唔緊要啦.
佢: 唔好啦唔好啦, 我買飯得啦.
聽到佢識得為我切想, 唔想我咁辛苦早起身都安慰d!! 所以到今朝, 我都起左身煮lunch.
炒左個工人到而家都已經10日有多了, 係呢大約既10日入面經歷左好多野, 因為最忙就係呢個禮拜!! 大兵小冰都係考試, 亞嗲又一晚ot, 一晚要出去食飯, 跟住又就黎過年, 所以都幾踢腳.
由於係突然間俾工人提早last day, 所以2個都無訂到飯, so 我就要朝早煮好佢地既lunch俾佢地帶飯啦, 連埋我自己, 即係要準備3個人既lunch. 突然間要早好多起身真係好辛苦, 訓覺係我第一生命黎的, 所以唔夠訓真係想死!! 仲記得第一日要煮lunch, 眼訓到頭痛, 但都要頂硬上啦, 煮飯, 煲水, 準備早餐(都係麵包同jam啫), set好張檯, 由於手腳慢, 所以比平時遲左出門口兼已經好倦了. 送埋小冰番學番到公司坐低, 嘩............好似做完gym咁, 要透大氣氛!
因為係考試中, 所以就叫大兵放左學幫手吸塵同收衫, 減輕我既工作量啦. 跟住大兵之後已自動自覺識得番到屋企自己去吸塵了, 唔駛叫. 小冰既工作就主要係收衫同摺衫. 有次佢放早, 之後佢收晒所有衫, 自己開埋張檯係到慢慢摺, 一堆一堆咁放係檯面, 我係cam 見到都surprise 佢識得開張檯黎擺d衫, 因為係佢老豆眼中, 佢係低能的. 而我睇完就覺得, 原來佢係可以自己將d野做好d的!!
到第2日, 經過一d 調動, 所以番工前既所有工夫都做得比第一日快左. 而再之後就直頭加埋準備埋麵粉set 好timer 夜晚8點麵包出爐添.
係無工人呢頭10日我覺得:
1. 無工人係屋企唔知點解覺得free d, 講真, 真係唔知點解, 佢又唔係我boss, 反而係我叫佢做野之嘛, 但係無左佢係到之後, 成個感覺係好自在的.
2. 呢10日, 大兵比以前變得好左, 會有主動幫手做野既情況出現. 我叫佢做野時亦都俾d 好positive既答案我, 如: 好, 得, 黎, 即到. 有一晚係佢自己話個地下有油, 佢自己話要拖地添. 最搞笑既係, 當佢渣住皮地拖既時候, 佢好似係突然間醒起咁講左一句: 咁我咪做左工人囖!! 我聽完, 笑到我死死下. 而佢既態度係變得好左, 以前d野成日周圍pat, 東一件西一件, 唔見野就賴工人, 而家經過頭幾日軍訓之後, 佢d野放得好左了. 反而而家大兵會主動幫小冰手, 以前只會係點小冰做野, 佢就閃左去. 我鐘意大兵而家既轉變.
3. 小冰經常做既係收衫摺衫, 佢有時都放錯d 衫去第2個人既櫃桶的, 但.......凡事總要有個開始的, 由她慢慢學習啦. 反而佢無大兵咁好, 有時叫佢做野佢會聲衰衰咁應的, 即係佢唔想做. 而小冰係呢10日入面個人變得獨立左, 因為係炒工人前我一路叫小冰學習唔好靠人, 要靠自己, 所以係某程度上佢知道無左工人後, 好多野都要硬食靠自己的, 佢一定要做得到. 佢變得無以前咁依賴. 食完飯收野執檯都係佢2個搞掂. 係2月, 小冰將會接受另一個新挑戰, 祝她成功啦!
4. 係過去既friday 同sunday 我又叫pizza外賣, 又成家去老麥食lunch, 呢d 情況真係呢4年黎都甚少發生. 感覺好似番番去以前咁, 好開心, 好free, 鐘意煮就煮, 唔鐘意煮就出去食, 叫外賣, 好free, 好free. 唔駛d生活咁定時咁有規律! 我唔駛再要今晚就決定聽日食咩lunch, 我可以係個一刻隨住喜好而決定食咩, 變化多左, 好似無咁悶咁.
5. 亞嗲係最唔想工人last day的, 因為..........佢要洗碗嘛, 但要黎既總要黎的, 所以我都無理佢. 有時我唔得閒, 叫亞嗲幫手買餸煮飯佢都無托手踭(暫時啦), 之後仲照樣洗埋碗添. 我係到叫腰骨痛, 佢又幫我dup下, 都算佢盡番d公民責任啦.
6. 經過10日暫時已開始適應新生活, 過渡期都尚算順利, 一切在2月將會變得更為妥善, 到時應該會可以無咁倦了.
7. 題外話, 由於小冰有幾日放早, so 叫我細佬去接佢啦, 到尾2個日既夜晚我同我細佬通電話, 我提佢, 聽日係last day啦, 唔駛再接小冰啦, 我細佬答我: 我已經係到倒數緊啦. 我一聽到笑到死死下. 我話: 你而家知道我湊佢幾倦啦. 我細佬話: 去踢場波都無湊佢咁倦!! 我聽完就更加勁笑添!! 因為小冰好多野講的, 又成日周身郁, 加埋佢見到我細佬就好似放監咁, 因為有人同佢顛嘛, 佢仲唔死lur住佢玩咩!!
8. 記得係無工人既頭2日, 我因為做到無停手, 好倦好倦, 所以我同大兵小冰佢地講: 你估我會唔會頂唔住而要請番另一個工人呢?? (可想而知我個刻有幾倦!!) (但係我唔想再請工人啦, 我唔想勞氣, 我唔想用我d時間黎幫人教女, 要教都教自己那一個啦. 再請又唔知下一個工人好唔好, 唉!! 所以試下自己黎先啦) but 到而家我適應左好多了, 又有佢地幫下手做野, 所以好好多了.
9. 而家我用既野既質素可以提升番, 因為唔駛怕買左番黎俾工人整爛會肉赤, 所以而家鐘意想買既就可以買黎用.
