紅莓方包

呢轉包既蜜度係高少少的, 亞嗲鐘意食呢種texture喎, 佢依然係一d 都唔硬的, 只係唔同早兩日那種超軟的感覺.

 

之前都講過, 因為唔想2隻野食提子包食到悶, 所以特登去買左d紅莓乾番黎, 所以今晚就整紅莓方包. 呢轉麵包係整俾佢地做tea既, 由於聽日要係出面學野, 所以要整d甜包, 唔可以係方包渣jam, 怕佢地搞到個身污糟晒.

今朝係網上睇人地用少d yeast但係居然可以出黎成個鬼佬咁高, 所以今晚我又學下人地既formula啦,一路都留意住個包既轉變, 梗係啦, 因為試新配方嘛, 唔知成唔成功, 所以要留意佢既變化, 衰左既話都可以問下人衰咩. 

明明一路去裝佢, 佢都係曾志偉一名, even到第2次發烤完都一樣係低過個兜架, 諗住衰硬啦, 點知突然間令轉頭望過去, 嘩, 嘩, 嘩………佢高到就黎鼎頂呀, 好得意, 真係好令人意外, 無諗過佢突然間發育得咁快架, 就係電光火石之間佢已經變左就黎6呎高啦!! 而家等緊出爐, 睇下佢個真身係點樣先, 再同佢度下高!

*******************************************************

出左爐啦, 無想像中咁高, 但係都幾高下, 個包既高度同尋晚個轉差唔多, 都係大約15.5cm. 

我想問, 點解工人整既d提子就唔會飛出黎, 而我整既就會飛出黎既?? R 晒頭!!

*********************************************************

今朝早餐試左一塊呢隻包, 亞嗲又係試左一塊.  亞嗲話呢轉包好食d, 因為..........無之前既咁軟(可能係唔夠飽肚啩!) d 紅莓, 我同亞嗲都覺得好食, 我鐘意佢無提子乾咁甜, 所以呢個可以encore的.  而我自己都鐘意呢轉包既texture, 不過唔代表我唔鐘意之前個種咁軟熟, 係兩種唔同既野黎, 即係雞尾包同菠蘿包, 兩種都可以好食, 兩種都可以鐘意食的. 而呢個包我最鐘意除左佢既紅莓之外, 係個包既咸甜度. 最開頭既包我嚴佢唔甜. 後來既包, 我加左糖, 就明顯甜包(但係都唔係過甜).但係呢轉包呢就有無咁多甜味, 但係又唔識講, 係咪叫做d 包味重番d出番黎呢?? 定係叫做有輕微既咸味但係又一d都唔咸呢?? 係咁上下啦, 唔識形容, 因為呢頭食完呢一塊, 轉頭又食d 方包(有jam), 所以都唔記得咁清楚了.

 

即溶乾酵母 - 金燕子 (instant dry yeast)

分開左 2包加一樽黎keep. 呢2包用抽空機抽左之後放係freezer度, 咁樣可以放耐d喎. (其實有d人係唔抽空的), 只係.....................我身痕又搵d玩具出黎玩下之嘛.

幾經辛苦先買到呢隻yeast番黎, 其實係我公司附近都有烘焙店, 而星期日都有叫工人去過屋企附近既烘焙店買麵粉, 但係我一路都係想買到網友用開那一種(唔止一個網友, 係幾個, 佢地識整麵包的, 所以信佢地好過我買錯野啦), 而我最近既烘焙店又無呢隻牌子賣, 所以唯有係其他店買細包既先啦. 我係咁的,  我要買到個樣野我死都要買到的!

終於係尋日問到網友, 原來係銅鑼灣有得賣呢個牌子, 所以就叫工人去買啦, 呢度係大包既有500g 先係$29. 好啦, 唔駛再捱貴 yeast啦. 之前買$5 先得15g, 貴好多的, 一次已經要用5g!

佢個樣都幾靚呀, 無係二德惠賣個d 咁大陸feel, 但佢價錢又唔係貴先好喎. 

人地話有分金燕子同紅燕子的(燕子就係呢隻野既牌子名), 今日我記低埋佢地既分別, 將來有需要可以睇番. 金燕子係for整甜包的. 而紅燕子就係for整咸包. 咁若你只買一種既話, 網友suggest 買金燕子, so.........佢就黎左我屋企囖!

抽真空保鮮器

呢種機我想買左一排, 一路都唔見有, 又或者係一係好大部, 一係就貴. 個次見到報紙廣告有得賣, 唔駛100蚊, 所以就去買左個番黎. 佢唔阻地方, 但係當然啦, 佢細部, 佢既馬力又唔夠人地大部咁勁的, 有gain有lost啦. 買左都一排啦, 今日用佢黎抽空d yeast, 令d yeast 可以存放得耐d.

佢仲有d 袋可以配架, 所以當時配左一套大既袋, 細既就無再配了, 因為佢跟機送左3個.

提子乾/紅莓乾

(上: 提子乾 3xxg $29.x    下:紅莓乾  1xxg  $22.x)

自從買左部麵包機之後變得好忙, 好似成日都缺貨要補倉咁!!!

今日放工為左要準備聽日亞女既下午茶, 所以就去左pk超市度搵提子乾. 入到去見到地moon呢隻$29.x一包, 好似有3xxg的. 我之前用緊一隻係有機既大提子粒, 好似係$18.9  200g. 咦, 咁計落買大提子粒那一隻都係差唔多錢喎, 但係就係因為佢大粒, 所以一罐新開既都好似係整到3次提子包咋(最多4次)!  而家pk 呢度我有85折coupon, 咁為起黎平d囖!!

跟住又怕2隻野食得多提子包悶, 見到有d 紅莓乾, 見價錢都ok就買包試下, 呢隻係$2x.x  好似係1xxg (細包d既). 唔知好唔好食呢? 2包剛剛好$51.4 可以夠用一張$50 coupon (即係有85折啦).

 

白麵包

呢個係今朝5點幾出爐既白麵包, 特登影張大頭睇下佢入面既組織係好多窿, 所以唔駛問亞貴都知個包係好鬆軟啦.

佢地既下午茶就食提子包, 呢d白麵包就用黎查jam做早餐(大人only), 所以呢2日整左3機包先夠食!!