subway@上環 ~ lunch(尋日同今日都係食subway)

由於工人太忙, 所以連續2日叫佢唔好煮我lunch, 我自己去買算了.  之前係團購買左4張subway既半價coupon, 所以就唔駛諗, 就食佢啦. 

尋日食左subway club footlong, 今日就食steak & cheese footlong. 我番到公司俾同事睇個包, 佢係度大叫, 嘩))))))))))))) 點食得晒呀? 我話, ok, 我尋日都係食晒一個啦.  呢個footlong係足足12吋長的(見圖一把間尺). 我都幾鐘意食佢, 因為佢有d菜, 瓜呀咁, 無咁乾, 同埋鐘意佢既bbq sauce.  

之前同小冰食, 佢一個人都可以食到一半的, 即係6吋. 

權發飯店@筲箕灣~晚飯

因為一個原因, 所以今晚出街食飯, 望住個餐牌都唔知食咩好, 到亞嗲黎到, 先至可以諗好晒食咩(其實都係全部我揀, 只係佢讚成既話, 好似firm d咁).  全部野最最最鐘意就係啖湯, 因為我地幾日無湯飲了, 所以遇到魚湯, 真係非常之合時.  

1. 大生魚兩味 - 魚片炒時菜
2. 大生魚兩味 - 魚片湯
3. 波蘿咕嚕肉
4. 蠔油鮑魚菇掌翼煲

5個人食都食唔晒!! 反而白飯就叫左7個(小冰一個人食左一碗半白飯, 反而我同大兵每人食一碗咋). 我而家最最最想飲既係.............蕃茄薯仔湯!

紅蘿蔔粟米粥

呢個粥係empress機同LC煲既夢幻組合, 非常方便正斗.  LC煲煲粥又快又綿(夠晒慳電).  而EXPRESS機就負責將D紅蘿蔔同粟米打到變成茸, 好快就搞掂啦.  

材料:
1. 粟米 3條(隨意)
2. 紅蘿蔔 半條 (隨意)
3. 米 隨意

做法:
1. 預先將米洗淨, 用水浸起碼1小時(浸幾小時都唔緊要的)
2. 將紅蘿蔔去皮, 切開大件. 用EMPRESS磨粉機打爛變成茸.
3. 粟米起粒(條芯可留番黎第時煲湯用), 洗淨乾水後放適量入EMPRESS機打爛成茸. 餘下的留用.
4. 煲水, 水滾後KEEP住大火落米, 一路落米一路輕力攪下佢.  煲5分鐘之後見D粥係一路滾起晒可以轉細中火(但都要KEEP住不斷滾起的), 由得佢煲至D米開始爆開.
5. 米開始爆開後轉番大火, 落紅蘿蔔茸, 水再滾起後落埋所有粟米(茸及粒)落去, 攪下佢, 又轉去中火KEEP住再煲(要滾起).  煲到D粥綿晒可以熄火食得(用LC煲大約煲多15-20分鐘便可, 但其他煲你要自己試下幾耐).

今晚食咩餸 - 2011年11月13日

我好多時煲粥都鐘意煲呢個粥, 原因係多顏色同營養又多好多.  我識煲呢個粥都係因為我以前番工係一間齋舖買早餐食過覺得好味, 所以就自己煲了. 小冰好鐘意呢個粥的, 因為佢鐘意食 "濕米" (粟米).   有時就會加d 肉碎落去煲, 今次就無加. 

碟炒河粉係因為上次炒時亞嗲番左工, 未試過即炒即食, 所以今次特登整俾佢試下.  今次就用晒3種臘腸落去炒.  今次因為買左3斤半河粉, 所以要分開2次炒, 但係, 都真係炒到手倦!!

大兵小冰的宵夜 (睇下嚇唔嚇得死你)

咪以為呢張相就係2隻野既宵夜, 呢度只係一個人既宵放份量咋, 死未!!!  呢碗麵同埋呢碟青瓜係小冰今晚10點既宵夜(yes, 無錯, 食宵夜既時間係10點鐘咁早呀)  呢度係一個麵+4粒黑椒牛丸+1條青瓜(2食), 佢地食完呢個份量我話: 飽晒啦. 小冰話: ok啦, 唔肚餓啦. (死未!)

呢碗同埋呢碟就係大兵既今晚10點既宵夜 (大兵就只係要半條青瓜, 其他既同小冰一樣)

呢碟就係前晚10點大兵既宵夜 (半條青瓜) - 肯食少d係因為工人今日放假所以無煮麵咋, 咪以為佢地因為唔肚餓而食咁少呀!!


呢碟就係小冰前晚10點既宵夜 (1條青瓜)

我地好鐘意食呢隻青瓜的, 非常爽脆, 佢地一路食, 我一路聽到 " 索 ,索 "聲, 好似食緊薯片咁.


因為特價, 所以一次過入咁多貨, 基本上係因為屋企既freezer唔夠位, 所以先買"咁少"咋.
呢d麵, 一包係有20個既(每晚一人食一個架), 所以就一次過買3大包(其實屋企仲有半包存貨係度), 湊夠100蚊(仲有買其他野)入埋會有discount啦. 


見過大兵小冰既人就知道佢地咁既食量係唔成正比的, 因為佢地係瘦架, 一d都唔肥的!!! 養佢地真係好快破產, 所以就唯有減價入多d貨啦.

今晚食咩餸 - 2011年11月6日

唉, 又要忙住同2隻野溫書, 但係又要去買餸, 真係我自己問書都問到個腦都實晒.  落到去街市, 樣樣野都貴, 梗加唔知買咩餸好, 真係煩爆!!  最後就買左呢幾樣餸了.

1. 薑蔥炒蟹 (今次試下食花蟹, 但係我同亞嗲都覺我都係三點蟹鮮甜d, 好味d)
2. 清蒸盧魚
3. 蒜蓉炒波菜
4. 蠔油薯仔蚊排骨
湯: 冬瓜無花果淮山茨實沙參玉竹燒骨湯

鴻星臘腸第六擊の金銀鳥

由於要試把家禽剪, 所以就一定要買隻家禽番黎啦, 一路都諗住烤雞的, 但係小冰病左, 所以就費事整熱氣野啦, 改為蒸.  咁我又懶得去買金針雲耳, 所以咪.............用臘腸蒸囉, 但係.........用臘腸蒸又會有少少甜的, 所以就試下用剩番既2種腸黎蒸啦, 因為我想隻雞係鹹.  一路都不敢抱有任何希望, 因為.....................我地都唔鐘意食鴨潤腸同鵝肝腸既, 不過叫做試下啦.  否則我真係無辦法再有時間可以整到臘腸野出黎, 因為大兵同小冰都就黎test!!!

蒸完出黎, 試下咦...... d 鴨潤腸ok喎, 我同亞嗲都覺得o 喎.  跟手再試埋d鵝肝腸啦, 都係唔得, 太潤了, 我地都係唔鐘意食.  但整體上黎講有意外驚喜(因為真係做左幾十年人, 從來都唔鐘意食鴨潤腸架). 

材料:
1. 冰鮮雞 1隻
2. 鴨潤腸 1條
3. 鵝肝腸 1條
4. 薑 3片

醃料:
1. 糖 適量
2. 鹽 適量
3. 鼓油 適量
4. 紹酒 適量
5. 老抽 少許

做法:
1. 將鴨潤腸及鵝肝腸沖一沖後, 切片備用.
2. 先將雞切去頭, 頸及pat pat, 將所有的肥膏全剪掉以便太多雞油, 洗淨切件備用.
3. 將薑片切條, 放入雞件內(以去除雞的"蘇"味).
4. 將鹽, 糖, 紹酒, 老抽及豉油醃雞最少半小時.
5. 將鴨潤腸及鵝肝腸放入雞件內(不要只舖面).
6. 煲熱水後, 將雞放入镬內蒸9分鐘便可上檯.






p.s. 由於小冰病的關係, 所以我花了半小時黎起皮.

今晚食咩餸 - 2011年11月5日

由於要試下新玩具, 所以叫工人買左隻雞番黎啦.  一路都係諗住烤雞的, 但係...........小冰傷風(定感冒), 所以費事整熱氣野了, 唯有改左做蒸雞啦.  d 青瓜就係因為我懶得去買菜, 所以就炒青瓜算了, 呢隻青瓜好爽口的, 好味架, 每次去親jusco都買3包的, 俾佢地生食又好, 用黎煮餸又好.  d紅腸就係因為亞嗲鐘意食, 所以friday特登買左一條分2次食啦.

1. 金銀鳥(鴨潤腸, 鵝肝腸蒸雞)
2. 蒜蓉半生熟青瓜
3. 蜜汁金蠔
4. 煎紅腸
湯: 南北杏蜜棗雪梨雪耳豬骨湯

p.s. 諗買咩餸真係諗到頭都爆埋!!

登!登!登!登! 又有新玩具 - 孖人牌家禽剪

多得眾人既幫忙先至換到呢把較剪, 係萬零用左30個印花加$19X蚊換到番黎.  初頭係我話想換既, 因為我之前聽人講呢排野(其實都唔sure係唔係呢把)好好剪, 咁你知啦, 我耐唔耐都會烤下雞, 雖然我識斬雞, 但係斬完d地方就會污糟晒的, 而家就話有工人抹啫, 咁總有一日我會唔再用工人架嘛, 所以咪想有一把囖.  後來係網上又見到d人話呢把野每次都要洗番同整番乾佢既彈弓, 否則會生锈, 咁我又懶, 咪唔想換囖.  點知, 亞嗲一聽完就話, 唔好, 把較剪咁靚, 換啦.  最後就變左係佢想換, 於是我就要廣發英雄帖問人有無萬寧印花可以割愛啦.  好彩, 有3個人可以俾我, 所以可以順利地帶佢番屋企了.  

尋晚去萬寧換啦, 叫亞嗲開黎睇下把野有無問題先去俾錢, 佢一開左出黎揸住把較剪時就好似日本武士上身咁話: "好較剪!" 真係發神經的.  後來食完飯我拎出黎玩下啦, 用佢黎剪紙真係好爽, 大兵睇到嘩嘩聲.  哈哈, 真係好玩.  玩完又收番埋佢lu, 暫時唔會用住, 遲d先會開黎用.