由於驚唔夠時間, 所以閒日都要出動整左試下先(都係嗰句啦, 唔係整一次就成功嘛!!), 所以就趕頭趕命咁開工啦.
呢個食譜既靈感來源係我近排鐘意食蒸勝瓜, 貪佢夠清淡, 食到勝瓜本身既清甜. 而臘腸我即時諗到既係蘿蔔糕, 所以就將呢2樣野2合為一了. 咁就將呢個清清地既蒸勝瓜變左一個味道比較豐富既蒸勝瓜了.
初頭食第一舊時, 你會覺得無咩特別, 但係再慢慢食下就有另一個感覺. 然後你會不期然再想食第2舊的. 最後係要控制住先可以留番3件俾工人, 所以.........佢係被唔到人驚喜既感覺, 但係就被到人細水長流既感覺. 唔明我講咩就自己試下整黎食啦.
之前我用金蒜蒸勝瓜, 係比較鞋口d架, 原因係我無落過任何油落去嘛. 但係今次有臘腸係度, 雖然我已經炒過迫左d油出黎, 但係佢本身唔多唔少都仲會有dd 油係到的, 所以連埋勝瓜一齊入口就剛剛好了.
材料:
1. 臘腸 1條
2. 勝瓜 半條(約半斤)
3. 乾冬菇 2 - 3隻
4. 蝦米 適量
5. 雞湯 適量
6. 鹽 少許
做法:
1. 將乾冬菇浸軟, 洗淨後渣乾水份, 切粒備用.
2. 將蝦米浸軟, 洗淨後抹乾水份, 備用.
3. 將勝瓜刨絲(間住黎刨便可), 洗淨後切件備用.
4. 將已洗淨的勝瓜用叉將佢"吉lone".
5. 將已"吉lone"的勝瓜用雞湯浸住.
6. 將臘腸沖一沖水(我自己個人喜好), 然後抹乾, 再將佢切細粒備用.
7. 燒熱隻镬後(唔駛落油), 用中火將臘腸下镬炒香, 盛起備用.
8. 用炒完臘腸餘下的油將冬菇至9成熟(唔夠油就加油), 然後再將蝦米放入同炒, 炒一陣再加埋臘腸一齊炒勻3樣野.
9. 將勝瓜從雞湯取出直接舖係碟上, 將每一件勝瓜也灑上少許鹽(整件勝瓜都要有鹽).
10.將#8的所有材料舖在勝瓜上面. 然後放入大滾水的镬或煲蒸7分鐘便可上碟.
流程圖如下:
tips:
1. 食既時候一定要整件夾起連埋混合臘腸粒黎食先正確的.
2. 勝瓜要揀d軟身的.
3. 勝瓜要切有平面才能放上混合臘腸粒.
4. 臘腸:冬菇:蝦米的比例是1:1:0.5
沒有留言:
張貼留言