麵

由於尋日整出黎既烏冬太硬, 所以我唔奮氣, 今日死左出街(其實我完全唔想出街的, 我星期六已經成日無出街了)買左包WHITEWINGS粉再試, 我係想試下係咪KM那部機先可以整到那個口感而象印係做唔到既.

上網問過人但係都未能找到致命原因, 咁唯有自己再研究下出事原因啦.

好啦, 量好晒粉開機啦, 但係…………… 點解D粉攪黎攪去都散修修既?? 又錯係邊呀? 咁我走番去個食譜度睇啦, 頂!! 原來人地係100g粉咋, 我一路都睇左做150g粉, 唔怪之得d粉痴唔埋一齊變成粉團啦. 真係鬼”x”眼, 睇左幾百次個食譜都可以錯架!!

加番d水落去再重新開過機啦, 好啦, 今次可以痴埋晒變成粉團啦.  打好做粉團之後, 我就meet左少少出黎壓偏佢切幼條煮左一d黎食. 呢個粉團同尋日那一個有明顯既分別, 今次呢個係碌左之後, 唔會縮得好勁架, 尋日那個係縮到抽根的, 好難碌架.好驚好驚咁去試食(因為個粉團打完出黎一d都唔熟的), 加埋d豉油, 麻油撈埋佢就咁食, 試完, 咦, 又ok喎, d麵係軟身架, 好野!! 大兵同小冰都試左佢地都話好食, 仲話要添多d添, 但係無晒啦, 我叫佢地等下一轉啦.

餘下黎既大粉團, 係因為有網友叫我將佢放半小時等佢鬆馳下先, 咁我就等啦(其實整完煮埋食埋第一轉麵都已經超過半小時了), 又由於尋日係諗住整烏冬既, 而第一轉麵係成功, 但係就好幼唔似烏冬, 所以我今次就切番粗身d啦, 咁先似樣嘛. 好啦, 又碌完, 切完煮啦, 今次仲過埋冰添, 好緊張咁試食, 點知……… 又出左事, 又係硬既, 點解呢?? 唉…… 真係玩死我, 咁我又走去剪開條麵, 見係唔同色既(出面白, 入面啡黃色), 咁我懷疑係咪未煮得熟晒啦, 咁又再煮多3分鐘, 但係出黎都只係林左少少咋.

算啦, 我投降, 下次整幼麵算啦.