砂窩花膠雲吞雞 - 附食譜

下面呢張相係已經煲左隻雞約55分鐘時的情況, 己經好香及白色了.

下面呢張相係隻雞煲左2x分鐘時的情況, 見到d 湯既色係唔夠上面張相咁白的.

由尋晚食完那隻超滑既白切雞之後已經一路諗緊今日整咩好呢?? 好想再整雞,但係亞嗲話“又雞”??!! 一路諗諗諗到今日朝早上網,係個yahoo blog度輸入3個字 “雞食譜”, 好搞笑, 第一個見度既blog居然係我自己既blog, 係尋晚既白切雞黎的. 再向下睇, 見到 “砂窩雲吞雞”登時成個人醒一醒神. Click入去睇……………張相都好靚喎, 於是我問亞嗲:整砂窩雲吞雞好嗎? 又出奇地亞嗲都話好呀.

有左目標就集中去search呢個食譜啦,好彩咋, 我睇左幾個blog張相最靚既就係我第一眼見到那一個blog, 咁樣先可以激發起我既動力去整呢個餸.

而家仲整緊, 所以打住食譜先啦, 效果係點要開飯先知.

食譜

材料:

雞           一隻(3個人既話真係整半隻就夠了)

金華火腿     3-4片

乾瑤柱       幾粒(視乎大小)

薑           2片

花膠         適量 (已處理過的花膠, 我通常一次過整好多,

             然後分開一少包咁放係freezer)

鮮蝦雲吞     隨意 (我就用左一包東東雲吞)

小棠菜       適量 (我自己就買左一斤)

醃料:

紹酒         適量 (外面和雞殼入面)

鹽           適量 (雞殼入面)

做法:

1.      將乾瑤柱及金華火腿用水沖一沖洗, 然後用水浸軟, 之後連埋浸野既水一起備用.

2.      先將醃料塗抹全隻雞,將薑片放入雞殼內之後放入雪櫃最少醃2小時.

3.      用高速煲放入適量既水(你預計放埋隻雞後d水唔會超出最後用黎煲雞既煲), 將花膠,乾瑤柱及金華火腿連埋浸既水一起放入煲內, 煲佢10分鐘, 等排氣後備用. (高速煲儲夠氣計10分鐘, 等於正常煲煲了1個鐘頭). 咁樣做我想呢3樣野盡量出晒d味出黎而又唔駛煲到隻雞爛晒.

4.      將雞從雪櫃內取出,將高速煲煲內的湯倒入另一個煲內煲番熱d湯(你可以用番高速煲當普通煲咁用的,只係我想用呢個黑色既鐵煲,咁樣會好味d,又慳火d,又可以serve埋上檯,呢個煲有保溫的效果,所以用黎裝呢d餸最適合).

5.      湯滾後將隻雞放入湯內,煲了幾分鐘又將隻雞轉另一邊又煲幾分鐘. 跟住就較慢火(總之d湯滾得起便可,不用大滾)一路煲個半小時(90分鐘), 中間大約2x分鐘我又將佢轉一轉身.

6.      煲完90分鐘後, 差不多開飯前, 將d 雞湯煲番滾. 將雞取出. 放入小棠菜, 跟住將#7步驟的雲吞也一併放入煲內至熟便可上檯.

7.      煲少少水用黎煲下d 雲吞(1, 2分鐘便可)免佢有任何 “簡”水味. 然後就可以放入雞湯內連同菜一起煲熟.

開飯啦))))))))))))))))))))))))))))))

好正呀,無諗過煲咁耐d雞肉都仲係滑的(由於個煲係保溫的,食到後期(約2x分鐘後)d雞肉變得無咁滑了). D 湯又好味,亞嗲好鐘意食呀,佢食完飯飲完湯仲係到唔停口咁食菜(我無咩幾何見到佢飲完湯仲唔停手的).

啖湯好味又夠白,d金華火腿我食過已經完全無晒味了,即係出晒味啦.食完飯d湯仲係熱的,very good!

呢個餸夏天食都咁正,若冬天食真係絕配!!

p.s.

1.我呢隻只係$22 一隻既唐順興冰鮮雞咋,但係都真係好正呀!!

2. 用Le Creuset 既煲去整呢個餸係最適合的,因為佢個樣靚同埋可以存熱,所以可以盡量保持到個溫度熱得耐d.

滑過豆腐花的白切雞 – 附食譜

因為買唔到唐順興, 所以試下呢個牌子, 但係無唐順興咁有雞味的. 下次唔會再買.

呢張相係浸完第一個 8分鐘, 而家係度煲番滾d水的情況. 見到既薑片, 原本係放係雞殼入面的, 我由得佢放係水中一齊滾埋佢.

呢張相係隻雞熟左之後, 即刻將佢放入d 冰水入面, 等佢d 雞皮可以變爽.

浸完冰水後, 亞嗲整俾我既雙鈎終於可以出場啦, 將隻雞好似玩奧運玩體操項目既吊環咁, 呢個動作用引體上升都幾似, 不過係隻雞引體上升而唔係個人咁啫.

呢個工具我買左番黎用左2次之後一路收埋左. 今次要整薑茸, 攞出黎睇下是否合用, 發覺ok喎, 那就可以省回原本我想買個特登用黎整薑茸既野. 上個禮拜jusco 10蚊店9折, 好彩唔記得左去買, 而家慳番. 原本又想將呢個工具送俾人的(因為我覺得無用), 而家可以唔駛敗家留番自己用啦.  同埋用呢個工具去整薑茸, 可以整到好多薑汁出黎架. 我今次用黎醃雞的那些薑汁, 係我搵把刀柄係咁 "中"爛d 薑片, 再用手去禁d汁出黎的, 雖然咁辛苦, 但係都係禁得少少薑汁出黎咋.

我整之前問亞嗲, 通常係街食, 係有無蔥既呢, 佢話無架. 但係我細個係一間燒臘舖食親雞飯都係好鐘意食佢d 蔥茸的, 次次都叫佢俾多碟蔥茸我要黎撈飯的, 所以我唔理, 每樣整一碟啦. 一碟係齋薑茸, 一碟係薑蔥茸(薑少蔥多).

我

滑過豆腐花的白切雞 – 附白切雞食譜

今日去左鰂魚涌, 咁順便係嗰度買埋今晚既餸啦. 由於人生路不熟, 所以係個街市行左足足4, 5個圈都唔知買咩好(雖然個街市又真係幾細)!! 咁就求奇買樣菜, 然後又唔知買咩好. 係呢個時候, 我就醒起我既至愛 “佳寶”既唐順興冰鮮雞啦, 係街市搵到有, 但係雪到死死實實咁, 一睇個到期日係今日, 所以唔買得啦. 再繼續好迷網咁搵, 見到呢隻 “田園雞”, 見個日期係尋日出產既那就試下啦.

原本諗住整南亂吊燒雞, 但係買晒野之後覺得………. 未病好, 所以都係唔想食吊燒雞了. 最後改左整白切雞.

番到屋企拿拿林搵食譜啦, 我記得我有本cook book有教的, 攞黎睇下. 但係睇完覺得唔好, 所以又即刻上網搵(因為唔知駛唔駛預先整好耐而那時又已經12點幾了), 後來搵到個覺得ok既食譜就定心好多. 食完lunch 後 又再研究下2個方法邊個好d, 最後我揀左而家呢個, 雖然另一個方法係簡單好多同少好多功夫, 但係…………… 可以既話我都想試下整個好d效果既方法.

我search到2個整白切雞既方法, 一個係蒸, 一個係浸. 我係blogS見人講話浸係會滑好多既, 所以就揀浸啦.

食譜:

材料:

1. 雞       一隻(我呢隻係冰鮮雞黎的)

醃料:

外面:    1. 薑汁  適量

         2. 紹酒  適量

         3. 生抽  適量

裏面:    1. 薑汁  適量

         2. 紹酒  適量

         3. 鹽    適量

         4. 薑片  2片

冰震:

1. 冰粒     好多

2. 飲用水   一盤

薑蔥茸:

1. 薑       適量 (磨成茸)

2. 蔥       幾多下 (視乎個人喜好)(將佢切細晒佢)

3. 幼鹽     適量

4. 油       少許

做法:

1.     先將雞洗淨, 雞入面全部野都掉晒佢, 我通常都會將個雞pat pat 剪左佢, 費事唔覺意到時食左. 亦會將雞入面既肥膏全部都剪晒佢的(除左整海南雞飯啦). 用筲箕裝好, 備用.

2.     將 “外面”的醃料順序塗抹在全隻雞的表面.

3.     將 “裏面”的醃料順序塗抹在雞殼裏面. 將佢放入雪櫃最少2小時等佢入味. (放耐d 更好啦).

4.     煮之前半小時從雪櫃取出放涼, 令雞既溫度慢慢變回室溫.

5.     在雪櫃取出雞之後, 拿一個夠大夠高既煲, 煲4/5 或3/4既水, 煲滾後熄火備用(此舉只為節省時間, 不等雞夠半小時才開始煲水, 因煲一大煲水都需時15分鐘的)

6.     等雞從雪櫃取出夠半小時, 將煲內的水再開火至微滾便可(即係你見到d 水滾會郁, 但不要滾到火山爆發那般勁), 你便渣住雞頭, 放隻雞入滾水內, 要肯定雞殼入到滾水入去(由於我是用電磁爐做, 所以一路我都keep住有開住慢火去keep住水溫的). 浸完成隻雞落滾水後拿出來, 令雞殼入面的水倒番晒出黎. 如是者, 從覆這個動作3, 4次, 令雞殼內的溫度不會與雞殼外的溫度相差太遠, 這樣雞殼入面會唔熟的.

7.     做完這動作3, 4次後, 我將成隻雞放晒入滾水內(雞頭都放埋入去)再開番大火令水滾番起, 同樣, 都係睇住d火去到微滾便可, 唔需要火山大滾水. 見到d水微滾後, 熄火, 由佢浸8分鐘.

8.     8分鐘後, 將雞反轉後, 再開火又煲至微滾水, then 熄火, 又浸佢8分鐘.一路重覆這浸法, 直至你用筷子插入去雞脾最厚肉的位置feel到佢熟為止. (由於我呢隻雞好細隻, 所以我只係浸了2次既8分鐘便搞掂.)

9.     係開始浸最後既8分鐘的時候, 將所有飲用水及冰放係個大兜內備用.

10.                待肯定雞已熟後, 從煲內取出, 立即放入冰水內, 將隻雞不停咁轉, 務求隻雞全身都可以浸到d冰水. 這樣可令雞皮做到一熱一冷的效果, 令到d 雞皮可以爽口.

11.  之後我將隻雞吊起風乾(因為想佢可以回番去個室溫, 同埋…………未開得飯嘛).

12.    係開飯前可以將雞斬好放碟上備用.

13.   臨開飯前將頭先浸雞既滾水(你可以倒淨得番少少水便可)煲番熱, 將d 滾水淋上雞幾次當然要將d滾水倒番出黎啦, 令雞變番暖身才上檯.

薑蔥茸做法(可預先切定晒到上檯前先煮滾油):

1.     先將薑成工具整成茸.

2.     將蔥全部切細晒佢.

3.     加幼鹽

4.     將油煮滾, 淋入薑蔥茸內便可上檯

賽後報告:

全家一致覺得隻雞係超滑, 從未食過咁滑既白切雞, 所以亞嗲食左好多(佢平時怕感冒唔知道, 所以唔係太食雞的), 今晚見亞嗲面前既雞空nel nel, 可想而知真係ok呀!

我覺得呢個牌子既冰鮮雞唔夠唐順興咁好, 價錢一樣, 但係細隻d, 同埋無咁有雞味.

D 薑蔥茸(有蔥那一碟)正到呢…………… 真係可以就咁撈飯食呀, 可惜今次唔夠經驗, 整左唔係太多, 無得用黎撈飯. 同埋屋企整既薑蔥茸唔駛好似係街食咁食到成口油.

第一次整, 我俾自己90分(咁耐以黎最高分今次啦).

刨絲/磨茸/整薯架既工具

呢個工具買左年半度啦, 原本買黎刨蘿蔔絲整蘿蔔糕的, 但係而家有左kenwood那部機就唔駛用手刨得咁辛苦啦.

又因為咁, 所以呢個工具擺左係度好耐都無用過了, 咁耐只係用左2次, 另一次係用黎整薯片, 薯格, 但係我依然係整唔到薯格喎, 所以............咪give it a lesson 囉, 個lesson係咩, 咪就係打佢入冷宮囉.

原本想將佢送左俾人tim, 因為我見無用, 又事阻地方啦, 係咁橋今日要整薑茸, 所以先攞佢出黎睇下整唔整到, 點知, 好容易整喎, 同埋用佢黎整薑汁快靚正tim. 唔駛我又用刀柄沖, 再用手去練d 汁出黎, 都係得個少少.

好啦好啦, 而家一家團聚啦.

薑蔥煀蠔煲 - 附食譜

見jusco 減價, 尋日就預備左去買桶蠔黎煮呢個餸. 唔知煮成點呢, 好緊張!! 呢盒$69.9 今日有95折.

生平第2次整薑蔥蠔, 但係第一次整時係數個月前, 真係整得好難食.

今次找到個食譜, 覺得ok(其實成日都係靠感覺來找食譜, 因為網絡世界實在有太多既食譜.)

亞仔同我都覺得好味, 亞嗲因為訓左覺同埋佢好怕腥的, 所以佢食既時候話有少少腥(因為我地食完飯佢先起身). 亞女就因為唔鐘意食蠔, 所以no comment. 呢個餸我會再encore的.

食譜

材料:

1. 桶蠔  1桶 (中size, 但係我嚴佢整完出黎唔夠大隻)

2. 薑  10片 切片

3. 蔥  1蚊蔥差唔多用晒, 切段

4. 蒜頭  4粒 切片

5. 乾蔥頭  2 大粒 切片 (若細粒就3粒啦)

6. 紹酒  適量

調味:

1. 糖 適量

2. 蠔油 適量

3. 豉油 適量

4. 粟粉 適量

5. 水 適量

做法:

1. 將蠔洗淨去黑邊, 煲滾水放蠔入內, 待水再滾起就可以撈起蠔, 我再用水喉水沖一沖佢, 免d熱力仍在將蠔繼續加熱, 之後待乾.

2. 用kitchen paper 將蠔索乾晒水, 上一層簿生粉.

3. 燒油, 爆香薑, 然後乾蔥頭及蒜至有香味. 將所有材料推至鑊邊(圍番一個圓形). 中間放入已上粉的蠔, 將2邊都煎至微黃.

4. 緣鑊邊加入紹酒, 及蔥段後, 輕手兜幾兜. 再加埋調味. 滾後便可上碟.

今晚食乜餸- 2010年5月23日

1. 薑蔥煀蠔煲

2. 清蒸薑蔥青邊鮑魚

3. 芽菜炒魚蛋

4. 蜜糖雞翼

5. 白酒煮青口(格夜餸)

湯: 赤小豆扁豆果皮老黃瓜生斑魚湯

我最鐘意食係個薑蔥煀蠔...........好味呀!! 好開心呀!

薑蔥清蒸青邊鮑魚

今日去街市, 又見到呢d 青邊鮑魚, 雙眼即刻發光啦, 問下幾多錢, 又係90蚊一斤, 仲要大隻過上次喎, 當然又即刻買啦. 呢度買左$45. 上次既size 係比呢度細隻既大少少的(上次有9隻). 同樣全部都係生歐歐的.

上次試左用果皮蒸, 咁今次就亞嗲用薑蔥蒸啦, 睇下邊種食法好食d.

期待中!!

**************************************************

真係果皮好味好多呀, 香好多的. 今次完全無驚喜................ 浪費左d 鮑魚.

今晚食乜餸 2010年5月22日- 9唔搭8餐

再加埋腩汁生菜.

第一碟就好西, 第2碟就好中................... 所以個標題就係9唔搭8餐啦.

白酒煮青口again

由於少爺想食, 所以又encore左. 好明顯見到今次d 青口d肉係大粒好多的. 呢隻係new zealand的frozen 青口, $40一盒, 1kg. 呢度係半盒.

我今次聽何師奶講落少左雞湯, 所以真係無咁咸. 但係................... 真係無咁好食, 都係上次那些青口好食好多的. 真係一分錢一分貨!!

原來上次買既$128一盒1kg既青口(blue 青口), 係幟哥那個節目介紹的那一個牌子黎的.

柱候炆牛腩(米) - 附食譜

而家炆緊牛腩, 因為星期四晚一次過要亞嗲諗左3餐餸食咩, 諗到佢死死下. 原因係我由星期四夜晚9點鐘番左黎屋企之後, 打算一路到星期日先會出街(搬左黎呢間屋, 成日都想係屋企, 唔願出街). 所以要寫晒叫工人煮d 咩餸叫佢今日買晒番黎.

諗到無野好煮, 所以咪又炆牛腩 law, 今次炆一半份量, 但係到煮既時候, 又好似少得滯........ 之前次次炆一包又好似好多要食成 3餐. 真煩.

聽日炆好先影相放上黎啦.

食譜 (我呢度煮左半包咋)

材料:

1. 牛肋條一包 (我鐘意6-7成肥的, 煮完出黎當然無咁肥啦)

2. 柱候醬   6 -7 spoon 西式湯更滿到瀉的 (一半炒牛腩時落, 另一半加入水度)

3. 薑片 5片

4. 蒜頭 6粒 (切碎)

5. 香料 (八角約5粒, 花椒一"炸", 桂皮一條, 香葉一片, 果皮一角)用細煲湯袋裝住

6. 紹酒 少許

7. 水適量 (大約9碗水)

調味:

1. 冰糖 (適量)

2. 老抽 (適量)

3. 鹽 (適量) 最後落

做法:

1. 將牛肋條解凍後, 出水(我會加片薑), 備用. (此時可以切細, 或唔切都可 - 我今次就無切)

2. 燒滾油, 爆香薑片, 落蒜蓉再爆香, 然後落牛肋條炒幾炒, 加桂候醬再炒. (這個步驟你會覺得易燶的, 所以我會加少少水落去, 免燶. 到炒香d 牛肋條, 加少少紹酒再炒香.

3. 轉落另一個煲炆佢.  因為我趕住教仔, 所以我一開始時已係呢個煲煲定d 水, 當我炒好d 牛肋條時, 就將佢放入滾左既熱水內, 加埋 香料包, 調味搞暈佢. 水滾番後, 較到細火先炆45分鐘, 停45分鐘, 重覆3次(因為我通常整親都係一早整的, 所以大把時間). 即前後你會總共炆左 2小時15分鐘. 加番少少鹽試味就可以上檯.

我次次炆牛腩都係用le creuset 既煲, 因為咁樣慳好多電費, 我用電磁爐, 水滾後較到800w 火便可以了(記住, d 水都一樣係滾起的, 只係微滾).  我都有高速煲, 又有真空煲, 但係我覺得既然有時間既話, why 唔用番最傳統既方法去煮呢??!! 同埋用le creuset, 因為佢係鐵做, 所以應該會更留得番牛既原汁原味.

其實都好易整. 就算唔係整得超好食, 都唔會難食的, 又夠晒林. 我聽日叫亞嗲買包枝竹番黎放埋落去炆, 索晒d牛腩汁正到痺.

2隻野最鐘意用黎整湯粉, 貪個汁夠晒正.

而家已經聞到好香啦)))))))))))))))))))))))))))))))))))))))))))))))))

亞少爺又話想食青口喎, 睇下聽日點先啦.

************************************************

點解最後變左係柱候牛腩米, 原因就係今朝亞女聽到我話整左牛腩, 佢就即刻話食米粉呀? 我話唔係呀, 食飯. 佢話, 唔好啦食米粉啦, so 最後就係呢個版本了.  亞女好鐘意食牛腩米(屋企個d), 因為佢鐘意個汁. (佢出街通常食魚蛋粉的)

拿, 整左半包就係得咁多咋, 多一舊都無. 全部牛腩放晒係呢3碗粉度啦.

係BK 有MUMMY 問我這幾個問題, 我將佢COPY埋係度, 等其他人都可以參考下啦.

請問妳係用凍鮮 / 新鮮牛腩 架 ? 窮等人家, 買唔起新鮮牛腩. 所以每次我都係買FROZEN的.  其實唔係買 "牛腩", 係買牛肋條(我個BLOG入面有寫明). 牛肋條即係類似我地平時叫既坑腩(肥瘦相間)

妳係超市買 / 凍肉鋪買呢 我當然係我既至愛 佳寶度買啦. 但係有一排佢唔知發咩瘟無呢個牌子賣, 搞到我全香港島係咁搵. 最後發覺係灣仔有(都係搵到一檔), 另係筲箕灣都有(都係一檔搵到咋).

邊隻牌子好食 d 呀  我試過3個牌子, 我而家只會買 巴西既BERTIN 呢個牌子. 我每次要包大約 6, 7成肥的, 炆完先至最正. 尋日那包我都嚴唔夠肥, 因得5成肥度. 大約 $18-$22一磅.

我試過係 和興行買, $90 一條, 我同人SHARE左, 每人要半包(半包既份量, 同我買 BERTIN 既差唔多啦), 但係炆完我嚴佢太瘦無坑腩feel.

又係佳寶無 BERTIN 賣那一排, 我買佢另一隻啦(唔知咩牌子, 佢好似係自己再包的), 都係因為太瘦, 所以炆完都係唔夠好食. 未至於UN, 但係就............... 係街食過坑腩既人會明我講咩, 總之炆完之後都要肥肥地先最好食啦.

今晚滾咩湯好呢??

1. 紫菜梅頭湯

2. 冬瓜冬菇瑤柱梅頭湯(全粒湯)

3. 皮蛋芫西魚片湯

4. 菠菜豬潤瘦肉湯

5. 大豆芽大魚尾湯

6. 木瓜大魚尾湯

7. 九幾豬潤瘦肉湯

8. "散"菜咸魚頭豆腐湯

9. 時菜梅頭湯

10.粟米豆腐肉粒湯 (罐頭粟米湯加料)

11. 蕃茄薯仔肉碎湯

 

煲咩湯好呢??

呢篇野係我寫俾我自己睇的, 因為想搵多d 新既湯黎煲下無咁悶, 又可以當我諗唔到煲咩湯時睇番, 咁就好似菜單咁任揀便可.

1. 紅蘿蔔青蘿蔔果皮南北杏蜜早豬展湯

2. 紅蘿蔔粟米南北杏蜜早豬展湯

3. 紅蘿蔔合掌瓜南北杏豬展湯

4. 木瓜花生雞腳蜜早豬展湯

5. 連藕綠豆(1碗)章魚豬展湯

6. 眉豆花生發菜雞腳豬展湯

7. 類似清保涼湯 (沙參玉竹茨實淮山薏米冬瓜淡菜)豬展湯

8. 無花果花旗參豬展湯

9. 無花果霸王花南北杏蜜早豬展湯

10. 赤小豆扁豆粉葛白鍘魚湯/或山斑魚

11. 老黃瓜赤小豆扁豆豬展湯

12. 南北杏蜜早菜乾豬肺豬骨湯

13. 冬瓜紅蘿蔔仙百合豬展湯

14. 烏豆紅早煲塘"塞"

15. 淮山杞子圓肉水魚豬展湯

16. 淮山杞子瑤柱花膠 "羅"頭豬展湯

17. 淮山杞子煲雞瘦肉湯

18. 紅蘿蔔粟米馬蹄排骨湯

19.南杏北杏雪梨雪耳豬展湯

20. 南北杏蘋果雪梨豬展湯

21. 黃豆苦瓜排骨湯

22. 苦瓜咸菜排骨湯

23.雪耳椰子煲雞湯

24.南北杏蜜早西洋菜豬骨湯

25. 南北杏蜜早西洋菜生魚湯

26.南北杏密早西洋菜鴨腎豬骨湯

27.牛大力地老鼠蜜早豬展湯

28. 洋蔥紅蘿蔔蕃茄豬骨湯

29. 野葛菜生魚湯

30. 紅青蘿蔔牛鰍魚湯

31. 栗子粟米紅蘿蔔排骨湯

32.金錢草雞骨草豬展湯

33. 雞骨草黨參車前子豬展湯

34.花生紅衫魚湯 (煲1個鐘)

35. 南瓜蕃茄紅蘿蔔豬展湯(加2粒蜜紅棗)

上述的湯可用豬展或豬尾骨.

今晚食乜餸 - 2010年5月16日

1. 青蒸青邊鮑魚 (好好味呀, 一d 都唔un, 又幾大隻, 亞嗲好鐘意食)

2. 青瓜炒鮮魷 (d 青瓜好爽脆, 亞嗲平時唔食青瓜的, 佢今次都話好食. 亞仔又係話d 青瓜好味)

3. 鹽焗雞 (淨係得亞嗲鐘意食, 我地其他人就麻麻地)

4. 南北杏菜乾豬肺豬骨湯 (呢5個禮拜煲左3次了)

鹽焗雞

終於整好左啦, 但係係失敗既, 一黎焗完唔熟, 又要再焗, 再焗完都仲係未熟, 最後我蒸佢算了(唔係都唔知幾多點先可以開飯).

個味............... 我麻麻地, 都唔似平時d鹽焗雞味既, 但係亞嗲好似幾鐘意食喎, 佢好耐無食過咁多雞了.

睇張相好明顯見到斬得唔好, 原因好簡單, 就係把刀唔利囖. 叫左個工人磨刀架啦, 我斬之前都問多佢一次磨左未, 佢話磨左. 到我斬, 頂佢, 都唔斷既, 斬多兩斬, 我叫佢再磨過, 見到佢磨既方法都唔啱既, 但係我一隻手又帶住手套(全部都係雞油), 所以做唔到俾佢睇. 佢再磨完之後, 我再斬啦, 都依然係唔夠利, 我即刻就炳佢, 我話你下次make sure 把刀係利先好俾我, 斬到我隻手好鬼痛(因為要搵隻左手黎禁把刀). 又搞到隻雞........好醜樣, 激鬼死.

我唔會再整呢個鹽焗雞了, 一黎個味我唔鐘意, 佢係多左陣香料味的(應該係桂皮味). 二黎, 我屋企無一個再高d既煲(普通煲除非一路係咁開住個火, 否則做唔到夠熱的. 係le creset 呢d煲先可以做到存溫夠耐), 而家個煲就係唔夠高, 所以裝唔到更多既鹽去蓋過隻雞, 咁樣會好難熟的.

食物價錢參考

第一次見到呢d 青邊鮑魚, 生歐歐的, 係海架, 唔係養的. 所以買半斤黎試下啦. 呢度買左$50, 打算用果皮蒸.

我俾亞嗲偷左一隻放係佢個魚缸度呀, 痴線架!!! 尋日又俾佢偷左一隻青口放入魚缸.

青瓜一條$3 (一斤$4.8), 今晚用黎炒鮮魷($15), total $18.

那排蛋一排30隻, $22.

粟米一份$8, 打算2條用黎煲湯, 1條用黎俾d 細路做 tea. 或者到時3條都用黎煲湯, 未定.

第一次見到呢d 青邊鮑魚, 生歐歐的, 係海架, 唔係養的. 所以買半斤黎試下啦. 呢度買左$50, 打算用果皮蒸.

我俾亞嗲偷左一隻放係佢個魚缸度呀, 痴線架!!! 尋日又俾佢偷左一隻青口放入魚缸.

呢度一包蕃茄只係$4, 有成10個. 諗住分兩餐.

另外買左新鮮 2條白鰂魚$15. 而家放係 freezer諗住用黎煲粉葛湯.

買左一塊敏魚, $20, 而家亦都係freezer, 聽晚煎黎食.

 

小朋友番學飯盒

由於我自己都係一個怕悶既人, 所以我幫d 細路諗食咩我都盡量多樣化d. 希望佢地食得開心d 同食得多d.  由於夜餐通常都係食飯, 所以lunch 我傾向選粉麵多d, 務求一日裏面唔駛餐餐都係飯.

以下為一人份量, 另附水果.

1. 肉碎豆腐飯 (蒸豆腐1件$3, 豬肉碎$5, 雜豆$1, total $9)

2. 茄汁豆肉碎意粉 (茄汁豆細罐一罐, 約$5, 肉碎 $5, 雜豆$1, total $11)

3. 肉絲炒銀針粉 (銀針粉$2, 梅頭肉絲$5, 芽菜$1, total $8)

4. 粟米魚柳意粉 (粟米湯半盒 約$2.8, 魚柳半包約$4.5, total $7.3)

5. 粟米肉粒意粉 (粟米湯半盒 約$2.8, 梅頭肉粒$5, total $7.8)

6. 燒汁雞排意粉 (雞排 1/2 件約 $3, 燒汁約$2, 雜豆 $1, total $6)

7. 波蘿雞粒炒飯 (波蘿細罐2/3罐約$4, 雞排1/2飯$3, 雜豆$1, total $8)

8. 豆角肉鬆炒飯 (豆角$2, 切粒. 梅頭肉粒$5)

9. 雜錦炒麵 (芽菜$1, 蟹柳 4條, 切條約$2, 火腿 $2 切條, 全蛋麵1個約$1, total $6)

10. 茄汁牛肉意粉(牛肉$5 (買$10分2日), 攪碎, 雜豆$1, total $6)

11. 雜菜蕃茄雞粒飯 (蕃茄1個$1.5, 雞排1/2件$3, 雜豆$1, total $5.5)

12. 窩蛋免治牛鬆飯 (蛋1隻 $0.9, 免治牛肉$8, 雜豆$1, total $10)

13. 乾炒牛河 (河粉$2, 芽菜$1, 牛肉切片$5, total $8)

14. 家鄉炒米 (梅頭$5, 米粉$1, 芽菜$1, 蛋1隻 $0.9, total $7.9)

15. 咖喱牛肉意粉 (牛肉$5, 咖喱磚1/2盒, $6, total $11)

全部我寫好晒係一個table度, 每星期既早, 午, tea 都係晒個table內.  每個星期一張table, 理論上以上既lunch 係每3個星期先重覆一次的.

白酒煮青口-食譜

我只係因為要繼續煮野, 所以叫佢地幫我影張相, 點知就影到咁樣出黎............. 擺番好少少先影都唔識的, 下次我自己影番!!

前日同亞嗲去行街, 見到呢d 青口, 起初都無諗住買青口的, 但係個老板話呢d 青口仲係生的, 今朝剛到香港, 10日先會死的, 亞嗲話想試下, 咁就買左啦. 呢盒野成$128, 1kg.

之前已經想煮白酒青口的, 所以今次就順利成章啦. 搵左幾個食譜(其實已經print定左一個食譜係度, 但係頭先都係唔想煮呢個, 所以再搵), 最後都係揀左何師奶呢個, 煮左出黎, 亞嗲同個仔都好鐘意食.  亞嗲話好西餐feel呀.

食譜

青口    1 kg

乾蔥    2粒 (大)

蒜頭    3小粒

洋蔥    半個

白酒     適量

清雞湯  適量

調味料:

淡忌廉  適量

麵粉      少許

鹽         好少

做法:

1. 先將乾蔥, 洋蔥, 蒜頭全部切粒. 青口洗淨.

2. 以牛油起鑊炒香乾蔥, 洋蔥及蒜頭粒後, 加入青口再炒, 炒香後灒白酒, 蓋上片刻. 然後加入雞湯再蓋上片刻, 最後加入調味料. 見所有青口打開便可加入香草便可上碟.

今次只能算是合格, 因我覺得咸左少少同多汁得滯. 

呢隻青口真係好食好多, 無咁硬身的, 但係就肉比較細粒.

 

 

下周預告 - 鹽焗雞

暫定黎緊呢個禮拜整鹽焗雞, 方法會跟呢個, 希望成功啦.

上次隻豉油雞都係用Le Creuset 隻黑色煲煮的, 就係貪佢保溫好, 可以用真係比較細既火去煮野(我只係用電磁爐既 800w咋, 第2細火了.). 又慳電, 又可以做到個效果.

如何用Le Creuset Marmite 煮東江古法鹽焗雞?

網誌分類：食譜 |

圖片

網誌日期：2010-03-26 11:40

東江古法鹽焗雞 Salt Roast Chicken

 

煮食器皿及用具　Cooking Utensils：

․         Le Creuset 三十二厘米深底鍋        Le Creuset 32 cm Marmite

        （內鍋黑色琺瑯）                             (satin black enamel interior)  

 

材料　Ingredients：

a )     1 隻全雞                                      1 whole chicken

b )     5千克粗海鹽                               5 kg of raw sea salt

c )     5粒八角，拍開                           5 pieces of star anise, cracked

d )     3湯匙花椒粒                               3 table spoon of fagara

e )     2枝桂皮，節斷                           2 cinnamon stick, cracked

f )      10片沙薑片                                 10 pieces of spicy ginger slices

g )     1塊白楊布                                   1 piece of large calico

 

 

醃雞調味料　Chicken Marinade：

A.      5片生薑                                       5 slices of fresh ginger

B.      20克蔥段                                     20g spring onion, sectioned

C.      小許老抽                                     a little bit of dark soy sauce

D.      小許玫瑰露酒                             a little bit of Mei Kuei Lu Chiew

E.      小許幼鹽                                     a little bit of table salt

 

烹調步驟Cooking Steps ：

（1）    把小許玫瑰露酒及幼鹽抹勻雞肚內，再放入生薑片及蔥段，雞外皮即用小許老抽抹勻，待皮乾透後再用一塊白楊布把雞完全包裹著，備用；Spread inter side of the chicken with a little of table salt and Mei Kuei Lu Chiew, then place the ginger slices and sectioned spring onion into it.  Also, spread the chicken skin with a little of dark soy sauce, let dry, then wrap the whole chicken with a piece of calico, set aside;

（2）    把所有海鹽、花椒、八角、桂皮及沙薑片放入Le Creuset三十二厘米深底鍋（內鍋黑色琺瑯）內用中火炒勻約十五分鐘至大熱、呈微黃並香味撲鼻；Add sea salt, fagara, anise, cinnamon stick and spicy ginger slices into Le Creuset 32 cm Marmite (satin black enamel interior) to stir fry for about 15 minutes using medium heat until the sea salt is being heated at a very high temperature, hazy with fragrant and light browned;

（3）    把包好的雞放於熱鹽的中間，確保鹽已經把全隻雞密封起來，把Le Creuset深底鍋蓋好；Put the wrapped chicken into the middle of sea salt, make sure the chicken has been covered well by the pre-heated sea salt, put the lid on;

（4）    繼續把Le Creuset 深底鍋蓋文火加熱約十五分鐘，熄火焗半小時；Continue to simmer under very low heat for about 15 minutes, turn the heat off, keep the lid on and set aside for another 30 minutes;

（5）    把雞取出，除去白楊布，斬件上碟即可。Take out the wrapped chicken, discard the calico, chop the chicken into pieces, dish up and serve hot.

 

 

唔知買咩餸好?? $30 一餐餸點搞??今晚食乜餸? 睇下呢度包你無煩惱.

4人份量

p.s. 除左雪藏食物, 9成幾既餸我都係即日買即日食的, 唔駛要買多d for 2日食架. 咁樣會新鮮好多, 有益d.

A) 10蚊or 10蚊樓下的菜單

1.     豆角煎蛋 ($2 豆角, 4隻蛋約$3.5, total $5.5)

2.     梅菜蒸鯇魚 ($7 鯇魚, 買一包既梅菜慢慢用, 每次約$1.5, total $8.5)

3.     麻婆豆腐 (1磚豆腐 $3, 辣豆板醬(一樽11蚊, 1次約 $1, total $4)

    (若買百福豆腐一盒 $5.5, 加辣豆板醬 $1, total 都係$6.5)

4.    生抽皇香煎豆腐 (1磚布包豆腐切開 4, 5片, $3. 若用一盒百福豆腐, 一盒都係$5.5. 煎好四面後, 用豉油, 糖, 油, 乾蔥, 蔥煮個汁, 好味的)

5.     炸菜粉絲蝦米豆腐卜 (炸菜 $2, 粉絲1包 $1.5, 蝦米 $2, 豆腐卜 $4, total $9.5)

6.     光波鹽燒三文魚頭 (三文魚頭一個一開4$10)

7.     魚肉煎蛋 (白色魚肉 $5, 4隻蛋 $3.5, total $8.5)

8.     蒸水蛋 (4隻蛋 $3.5, 一盒雞湯 $5.5, total $9)

9.     茄子醸鯪魚肉 (茄子一條, 約3蚊, 鯪魚肉 $7, total $10)

10.    芽菜炒喊魚 (芽菜1斤$4, 喊魚 一片切粒 $5, total $9) (呢個係睇亞蘇個節目教既)

11.    香草蕃茄炒蛋 (蓄茄4個中SIZE 約4蚊, 蛋4隻約3.5蚊, 意大利混合香草約$1, total $8.5)

12. 節瓜粉絲蝦米 (節瓜1斤約$5 切條, 粉絲1包$1.5, 蝦米$2, total $8.5)

13. 意大利香草牛油焗金菇 (香草$1, 牛油$1, 金菇1包半$5, total $7)

14. 炒時菜 (時菜1斤, 約$6)

15. 紅燒玉子豆腐炒菜(玉子豆腐 3條=3蚊, 每條切開5-6舊,  白菜仔, 3/4斤約5蚊, total $8. 我睇食譜叫工人煮的, 想知我可以幫你摷食譜)

16. 蓮藕餅 (蓮藕$4切片, 鯪魚肉$6, total $10)

17. 雞粒玉子豆腐蒸蛋 (玉子豆腐2條$2, 1開5. 蛋 1隻 $0.9, 雞排1/4件$1.5, 切粒, 雜豆少許$0.5, total $4.9)

18. 半肥瘦蒸豆腐 (攪碎半肥瘦$6, 布豆腐1件$3, 切開5, 6片. Total $9 將d 半肥瘦醃好, 豆腐平放係碟上, 將d 半肥瘦醸係豆腐上面, 蒸好加豉油便可.)

B) 超過10蚊的菜單

1.   光波燒汁雞排 (雞排 2塊, 約12蚊)

2.   西檸煎軟雞 (雞排 2塊約 12蚊, 檸檬 1個約2.5蚊, total $14.5, 要睇食譜先知要唔要用蛋, 因為係工人煮的, 要蛋都係加多$0.9度啦)

3.   金銀蛋”現”菜 (金銀蛋 total 約 5蚊, 一斤”現”菜約5蚊, total $10)

4.   香茅豬排 (豬排 2塊 切粗條 約 $10, 香茅切細粒 $2 一包, total $12)

5.   紹菜粉絲冬菇 (1斤紹菜 $6, 粉絲 1包 $1.5, 冬菇 切絲 一次過買一斤好難計, 就當$5, total $12.5)

6.     欖菜翠肉瓜炒半肥瘦 (翠肉瓜 1條約3蚊, 半肥瘦$13 攪碎, 欖菜一樽11蚊每次約 1.5蚊啦, total $17.5)

7.   煎紅衫魚 ($15 2條)

8.     光波燒汁豬頸肉 (豬頸肉 2塊, 約 15蚊)

9.   光波蝦醬雞翼 (雞翼15隻, 約17蚊, 蝦醬約2蚊, total $19)

10. 光波蜜糖雞翼 (total 約 20蚊)

11.   光波鹽焗雞翼 (雞翼 15隻$17, 鹽焗雞粉一包$3, total $20)

12.   金針雲耳蒸雞 (4蚊雲耳金針, 雞翼 10隻, 一開2, 約 $12, total $16)

13. 蝦醬蒸半肥瘦 (半肥瘦 切薄片$12, 蝦醬約 $2, total $14)

14.   煎敏魚(新鮮海魚 一塊 $20)

15.   蒜頭豆豉炒青口(青口半盒$20)

16.   芽菜炒魚蛋 (芽菜1斤$4, 魚蛋一包$9, total $13)

17.   椰菜炒半肥瘦(椰菜一斤$4, 半肥瘦 $10, 切條, total $14)

18. 蕃茄半肥瘦(蕃茄中size 4個 約 $4, 半肥瘦 攪碎 $10, total$14.好開胃的, 撈飯一流. 另可加粟米粒少許又得)

19. 翠肉瓜炒魚餅 (翠肉瓜 2條$4, 鯪魚肉$9, total $13)

20. 蠔油薯仔炆雞翼 (薯仔中size 2個, 切一舊舊$3.5, 雞翼10隻, 一開二, 約$12, 蠔油$1, total $16.5)

21. 翠肉瓜雲耳雪耳炒仙菇(翠肉瓜1條$2.5切粗條; 雲耳$2, 雪耳$3, 仙菇 $6, total $13.5

22. 勝瓜雲耳炒魚條 (勝瓜一條$3切粗條, 雲耳$2, 鯪魚肉$8, 煎完切粗條, total $13)

23. 粟米魚柳 (粟米湯1盒$5.5, 魚柳$8.8, 蛋1隻$0.9, total$15.2)

24. 蒜頭豆豉蒸排骨 ($13肥腩排, 蒜頭豆豉約$1, total$14)

25. 冬菇土魷蒸肉餅 (半肥瘦$13, 魷魚一隻$4, 冬菇2隻約2蚊, total $19)

26. 柱候排骨($13肥腩排, 柱候醬 $1, total $14)

27. 梅菜蒸肉餅 ($13半肥瘦, 梅菜 $2, total $15)

28. 冬瓜炆豆卜 (冬瓜1斤約$3, 豆腐卜$4, 鯪魚肉$6, total $11)

29. 魚肉醸冬菇 (鯪魚肉$6, 細冬菇18隻約 $8, total $14)

30. 南乳花生炆豬手(南乳$2, 花生$2, 豬手 一磅$8, total $12)

31. 魚香茄子煲 (茄子1條, $3, 半肥瘦$12. 豆板醬$1.5, total $16.5)

32. 蒜豉四季豆炒排骨 (四季豆$4, 一開二. 肥腩排$10, total $14)

33. 紅燒醸豆卜 (免治半肥瘦 $6, 豆卜$4, 青菜 3/4斤$4, total $14)

34. 蠔汁燴鮮菇 (中size西蘭花2棵 約$5, 鮮菇$5,切開5片, 蠔油$1, total $11)

35. 豆角蛋粒炒碎牛 (牛肉$8, 豆角$3, 蛋2隻$1.7, 全部切粒, total $12.7)

36. 葡汁焗4蔬 (中薯仔 1個 $2, 大西蘭花1棵$3, 椰菜花細1棵$3, 紅蘿蔔細1個$3 (要一半就夠), 葡汁$3, total$14)

37. 咸蛋雞蛋蒸肉餅 (咸蛋1隻, $1.5, 雞蛋2隻$1.7, 半肥瘦$10, total $13.2)

38. 光波叉燒 (半肥瘦梅頭$25 (有$10留番黎炒蛋用), 叉燒醬$2, total $17)

39. 叉燒炒蛋 (因為而家無得係街買$10叉燒, 所以唯有自制啦. 用番b part#38的$10叉燒切粒, 蛋4隻$3.5, total $13.5)

40. 紅燒豆腐(白菜仔3/4斤$4, 冬菇8隻, 一開二約$5, 布包豆腐2件$6, total $15)

備註:

1.      蛋由於我有時整蛋糕, 所以我通常買一盤番黎的, 一盤$25有30隻, so 一隻約$0.8x.

2.      梅菜, 我一次買一包石澳那個牌子的梅菜, $16一包, 洗好切好放係雪櫃慢慢用.

以上可從A 和B 自由配搭至30蚊上限. 希望幫到你地啦. 要30蚊整兩個餸係完全無難度的. 若30蚊3個餸就要砌一砌, 以下有些例子可給你們參考. 我買餸通常係會均衡d, 唔會偏埋一邊的.

例子:

1.      柱候蒸排骨$14 + 冬瓜炆豆卜$11+ 麻婆豆腐$4, total $29

(有魚, 有肉, 有瓜, 有豆腐)

2.      蠔油薯仔炆雞翼 $16.5 + 炒時菜$6 + 豆角煎蛋$5.5, total $28

(有肉, 有菜, 有蛋, 有豆)

3.      香茅豬排$12 +節瓜粉絲蝦米$8.5+芽菜炒喊魚$9, total $29.5

(肉, 魚, 菜)

4.      光波燒汁豬頸肉$15 + 蔥油煎豆腐$3 +炸菜粉絲蝦米豆卜$9.5, total$27.5

(魚, 肉, 菜)

5.      光波燒汁雞排 $12 +梅菜蒸鯇魚 $7 + 炒時菜$6, total $25

(魚, 肉, 菜)

6.  梅菜蒸肉餅 $15 +玉子豆腐炒菜 $8 +意大利香草牛油焗金菇$7, total$30