d木瓜係亞嗲拎番黎的, 係有機木瓜黎架(肯定無化學肥的). 因為之前先煲左2次木瓜眉豆湯, 所以今次轉排頭, 煲木瓜魚尾湯唔駛咁悶嘛. d木瓜特登筆黎食, 佢雖然係咁既色, 但係好清甜的, 係唔同平時買黎煲湯既青木瓜味架, 甜d, 清d的.
d三色椒今日又平番, 4隻都係8蚊, 所以又買一盒啦, 早去街市, 見到d野係靚d架, 所以人都開心d, 野都買多d番黎. 買完當時都無諗過煮咩架, 後來先決定煮雞柳咋. 小冰係咁食d雞柳話好味, 我諗係因為醃左幾個鐘所以入晒味啦.
等亞嗲收工, 同佢一齊再行多次街市, 就無啦啦買左d魚pop番黎, 好耐無食了, 而家好鬼死貴, 呢到咁少要15蚊了(得8個咋). 不過我由細到大都鐘意食的, 每次有我都即刻搶左黎食的.
1. 三椒炒雞柳
2. 清蒸魚pop
3. 炒白菜仔
湯: 木爪大魚尾湯
指定要買呢隻梅菜, 因為我鐘意食菜多d, 所以買梅菜王而唔係買梅菜芯.
切開左d梅菜, 將個頭唔要, 攤開晒佢. 目的係將d沙唔駛藏係d莖同葉入面, 咁就會洗得乾淨d. 攤開晒之後就用水先沖下佢, 然後再用水浸佢等d沙再出埋黎. 我食完lunch 番黎(30分鐘到啦)轉水, 跟住再逐條用水沖下佢, 再用水浸洗下佢, 見d水再無沙就ok了. 唔浸太耐既原因係唔想d梅菜浸到無晒味.
梅菜洗乾淨晒之後, 就好似拎毛巾咁拎乾d水(見下圖).
梅菜拎乾水後切粒, 大約係咁既大小啦.
呢到係一包梅菜切好晒既樣. (切到手都軟晒!!)
然後燒暖隻fissler平底镬(只限於好厚底既镬先可以咁做), 然後白镬(即係唔駛落油), 將梅菜倒入镬內, 不停兜炒,當你炒到覺得d梅菜乾身, 咁你就可以落紹酒炒幾炒之後, 再落d 沙糖落去. 份量係幾多無所胃的, 隨個人喜好, 但係當然唔可以超級多啦, 即係半杯都叫做超級多(以半包梅菜計). 由於我唔會好快食晒, 所以最後只係炒左大約一半既份量算了, 淨番既就放係冰格用晒呢d後先再炒埋佢.
炒完晒之後就係咁既樣, 灘凍晒之後先放入個樽, 放係雪櫃用幾多拎幾多. 我通常用黎蒸豬肉的.
