d 相全部都係熱既時候切黎影的.
由於...........好悶, 又由於好倦, 再由於.........懶, 所以好耐都無整咩野食了. 唔悶得既我又心思思啦, 但係因為小冰又病左, 所以又被佢搞我一大餐, 所以都係唔整. 但係........又真係好悶喎, 最後就揀左之前係bk睇到人地話用麵包機整蛋糕, 而我買左部機成年都未試過整蛋糕, 所以就試下啦(因為之前有人話整出黎好實, 所以印象麻麻). 因為無左工人, 一定會整少左野食, 若試左部機真係可以整到ok既蛋糕出黎, 咁我地又可以多番d野食啦, 唔駛咁悶, 同埋............清左d 粉佢嘛.
原本諗住整香蕉蛋糕的, 但係d最熟既蕉俾人食鬼晒, 得番d無咁熟既, 咁唯有整齋蛋糕啦. 但係.......最後諗起有提子乾係屋企, 所以就掉埋落去啦. 呢隻提子乾幾好的, 一盒盒細細的, 每次我就落一盒, 方便乾淨.
呢隻蛋糕因為牛油量好勁, 所以係好香的, 我揀左light crust 呢個mode, 所以個面d 色係相對淺色少少, 但當成個蛋糕拎左出黎之後, 見到側邊d色係夠晒的, 所以..........下次再整都係揀番light 就ok了.
個蛋糕出黎既texture 係鬆散左d(熱既時候), 所以切時係會切碎個蛋糕的, 即係唔能夠一件一件完整無缺咁切到出黎. 熱食既時候覺得唔夠甜, 因為得極輕微既甜味. 但係第2朝做早餐時就覺得ok夠甜了, 剛剛好. 同埋第2日凍晒時食, 件蛋糕質感會實番d, 有d似莎利蛋糕feel架. 不過因為真係太多牛油, 所以好heavy, 大兵只係拎左一件做早餐咋, 因為佢話好膩喎, 食唔到咁多. 我就將餘下既拎晒番公司, 而家食剩左既就放係檯面, 所以耐唔耐就聞到一陣好香既牛油味的. 真係矛盾, 多牛油有佢既好處, 但亦有佢既唔好處!! anyway, 下次我都會減d牛油, 因為每次食得一件既話, 銷情太慢會影響我整既興趣!
因為呢一個蛋糕, 所以我想買d for 麵包機既書睇下, 有無多d 蛋糕可以整到出黎, 咁樣就可以少功夫之餘又有得食多d啦. 用麵包機整蛋糕, 我只係要量d份量, 打d蛋, 同等佢一陣將d粉整番去堆麵團到, 然後就全程自動波了, 又唔駛洗n咁多野, 所以真係適合d 無工人既mummy架.
牛油提子蛋糕
1. 無鹽牛油 100g (下次我會試下改少d)
2. 低筋粉 180g
3. 糖 80g (我今次改左用70g)
4. 牛奶 30g
5. 雞蛋 100g
6. 提子 隨意 (大約50g)
7. 泡打粉 7g
做法:
1. 將從雪櫃取出, 放一陣, 見佢開始溶, 然後將牛油切成小粒(最大係1cm既立方體咁大)備用.
2. 將所有液體+糖放入麵包兜內.
3. 將牛油放入麵包兜內.
4. 將所有粉過篩, 然後放入麵包兜內.
5. 選cake mode, 揀light crust, 然後禁start.
6. 幾分鐘後, 佢會beep beep聲, 你就用把膠刀將則邊d粉篤番晒落去堆麵團到. 然後再禁多次start, 跟住1小時25分鐘後個蛋糕就可以出爐了.
嗚謝: bk win win815 的分享.