出前一丁親子烹飪班

大兵細個時我有同大兵玩過烹飪班的, 那時大兵好開心架. 今次有機會所以就俾番個回憶小冰, 咁樣會fair d.

今次其實佢教既野好簡單, 對小冰黎講叫做簡單得滯, 同埋, 佢地真正可以動手既機會唔多, 所以其實小冰既開心程度及滿足感都唔及上次大兵係towngas玩咁大.

反而我最開心既就係………………送左呢條出前一丁圍裙俾我啦, 因為好靚呀, 唔捨得用, 我番到屋企摺好佢留念呀!

EMPRESS機又做特價了, 今次都係特價$660 (做到10月14日咋)

今次見到佢特價$660, 想借#既可以私人留言俾我. 做到10月14日咋.

今晚食咩餸 - 2012年9月13日 (全意粉)

下面個碟意粉就係一早諗好點整的, 但係上面個碟白汁意粉就係臨到煮既時候先發覺D雞排係咁鬼細塊.  所以就唯有分開兩碟啦. 咁煮多一碟又唔想咁悶又係黑椒意粉嘛, 所以個腦入面突然轉出一D我之前上網睇過既資料出黎....... 就係白汁啦, 因為我雪櫃入面仲有淡忌廉係到, 所以不如清下貨啦.

由於我係已經煮完一碟黑椒意粉, 所以我根本無時間上網去SEARCH 白汁意粉係點煮, 只係馮記憶再加自己既所胃經驗試下煮, SO FAR 煮完出黎食落又OK喎. 

下圖係一個普通大既康寧碟, 而上圖係一隻26CM既易潔平底镬, 我真係無諗過居然會全部食晒, 係真係全部呀!! 我原本係打算留番D FOR我第2日既LUNCH架, 點知, 清晒! 真係想唔做野都唔得, 養佢2個真係要400萬呀!!

DIY 組合書櫃仔

後尾再買多4個番黎的.

又過左一個學年, 所以又一如以往地產生大量書/紙/簿呢D野出黎要清左佢, 但大兵間學校又話D野要KEEP住, 即係唔可以掉啦, 咁唯有向外發展搵更多空間出黎啦. 之前係日本城見過D櫃仔, 所以接完小冰後就去日本城睇真D佢既大小, 同小冰2個係到研究左一陣, 記低D呎寸, 番屋企即刻度下地方, OK喎, 可以放得到, 所以又拿拿林同小冰落街買番黎啦. 

由於亞嗲今晚唔番黎食飯, 所以食完飯我就即刻郁手開工了, 因為我無可能等得到亞嗲番黎先拆的.  真係好彩, 呢D櫃係有印埋數目字的, 又有圖, 所以叫做有得跟下點樣去砌, 但係..................... 我都搞左一排先搞得掂, 係未搞得掂之前, 我係到諗...........我由細到大都未試過砌一副PUZZLE 或者係模型的, 唔怪之得啦, 因為我絕對係呢方面既白痴呀!!  基於我死都要玩唔等得既性格, 所以我又再叫大兵幫手睇下點搞, 後來終於俾我舞得掂佢啦, 不過上羅C上到我手軟, 所以就點大兵幫我上埋佢啦.

整好晒之後, 再擺黎睇下, 嘩, 好靚呀, 又好用, 可以將D野分好類別咁擺, 非常好用.  最初只係買左2個番黎試下, 後來亞嗲第2日見到都話超正, 所以又買多2個, 但因為我同佢出現左誤會, 所以後來變左每人各自買左2個番黎, 最終就變成而家既6個啦! 以69.9蚊(有一個綠色少一塊版既係$59.9)一個黎計, 佢D料算好, D色又靚, 又可以組合或單獨擺放, 又可有圖教埋你點整, 所以真係VERY GOOD, 值得推介!

燉瘦肉汁 - 補而不燥

要燉4小時的, 咁大舊瘦肉燉埋只係得咁少咋, 我買左50蚊瘦肉都放唔晒入個燉盅到, 所以第2日我改左買35蚊算了, 費事又切到死死下跟住用唔晒.

我連續燉左5日俾2個細路飲, 原本想自己都飲埋的, 但係又懶, 唔想一日燉2次咁煩, 所以就第一個禮拜俾細路飲(因為天氣轉, 所以要煲鱷魚肉湯俾佢地飲嘛).  第2個禮拜就燉俾我同亞嗲飲.

下面呢D係我之後幾日買既新鮮瘦肉(原來只係影左一日咋).

蕃茄薯仔三文魚湯 -超正!! 附食譜(已加食譜)

想煲三文魚湯好耐好耐, 但係一路都俾亞嗲阻止我, 原因係佢好怕腥的. 今次我唔理佢, 死都要買黎煲, 話之佢唔飲啦, 了左我一個心願嘛!

咁多三文魚都係21蚊, 抵買啦, 蕃茄薯仔就買左10蚊, 啖湯真係超正, 係超正呀, 飲完即刻想再添, 因為好鮮甜.  連亞嗲都話好好飲, 大兵小冰更加啦, 因為佢地不嬲都鐘意飲湯的.  啖湯咁鮮甜既原因就係因為有左佢(見下圖), 無錯, 就係D 蝦殼, 咁橋我今日買左D蝦仔黎整蝦仁炒蛋, 所以咪用得唔好浪費, 將佢放埋入去煲啦, 出黎真係好正呀!! 啖湯鮮甜左之外, 又可以物盡奇用, 我超LIKE! (因為咁樣先顯得我有智慧嘛! haha!)

講漏左一樣野, 我煲呢個湯時係將D燉完瘦肉汁既瘦肉掉埋落去煲的, 唔理佢死, 諗住反正都要掉架啦, 咪掉落D湯到煲埋佢, 若仲有味可以出埋D味嘛, 唔好浪費. (我以為我自己影左D瘦肉既相, 點知無影到!!)

食譜:

1. 三文魚 呢到大約係1又 1/3磅
2. 薯仔                             3個(鐘意食就4個啦)
3. 蕃茄                             3個 (呢樣就唔鐘意都唔能夠減)
4. 蝦殼                             有幾多放幾多落去啦
5. 薑                                 8, 9片(唔怕腥都要6, 7片)
6. 熱水 適量

三文魚醃料:
1. 檸檬汁 無所胃的, 怕腥可以落多少少, 度度都查D就可以
2. 胡椒粉 鐘意落幾多就幾多啦, 度度都整D落去


做法:
1. 先將三文魚切開, 洗淨, 備用. 
2. 蝦殼沖水, 備用.
3. 蕃茄切塊備用.
4. 薯仔, 切厚片備用.
5. 燒熱個煲落油(呢個係高速煲或一D好厚身既不锈鋼煲既做法), 爆香D薑後將三文魚放下, 兩面煎至少少金色. 然後撥埋一邊, 將蝦殼倒入煲內, 煎下佢, 聞到蝦既香味後就開大D個火, 加入熱水(先落大約2碗份量), 等佢即時大滾, 此時將D三文魚同蝦殼搞下佢免痴底. 滾得5分鐘後, 再將你餘下的熱水倒埋入去. 水滾後開始計(轉去中大火)滾佢20分鐘, 之後可以將D 蝦殼筆起掉左佢.
6. 將蝦殼筆走左之後, 開番大火, 將蕃茄同埋薯仔放晒入煲內. 水滾後轉中大火再滾多最少30分鐘, 之後你可以睇下D湯既樣, 夠濃就可以熄火加鹽. (因為我無計時, 所以我講唔到比較接近既時間. 當時我係一邊煲湯, 一邊做第2樣野, 所以真係斷估都估唔到個數出黎)

TIPS:
1. 蕃茄要揀呢D夠紅色林林地身先夠味.
2. 三文魚, 我自己覺得要有骨先好飲(其實所有魚湯都係, 有埋骨會好飲D的). 所以唔好要D淨係腩/肉.
3. 為左要反亞嗲, 所以我必須要整到D湯係唔腥先得, 否則就無下次再出現既機會了, 因為D湯一腥既話, 亞嗲就會不停咁講好腥, 煩都煩死!! 所以我先會用檸檬汁黎醃下D三文魚的. 又好彩, D湯真係唔腥, 亞嗲無嘈過半句! 所以屋企有怕腥既人可以試下咁醃.
4. 蝦頭你要睇下無黑色先可以留黎用, 若見到係黑色既即係唔新鮮, 要掉左佢, 唔可以用黎煲湯呀.

今晚食咩餸 - 2012年9月10日

金東大@筲箕灣

點解會去金東大食晚飯係因為有一次我同小冰去呢到係LUNCH, D野食OK, 所以就想試下佢D小菜了.  

其實呢一晚已經係第2晚係呢到食晚飯, 今晚係因為小冰尋晚MISS左無黎到, 所以因應佢既要求要黎食的, 而D餸都係同之前一晚既大同小異.

今晚叫左菠蘿咕嚕肉, 通菜炒牛肉, 老水雞腳, 西蘭花炒花支片. 再加5碗瀨粉, 2碗白飯!

全部餸都OK的, 但講好食就係尋晚既菠蘿咕嚕雞球好食過今晚既咕嚕肉, 但係2晚既汁都係好味的.  而碟通菜牛, 亦都係尋晚既好食好多, 你睇D牛肉既色已經知道, 尋晚既係深色好多的.  佢呢到D牛肉唔同出面的, 出面既係好似拿到鬆左既肉, 呢到唔係架. 花枝片一般啦, 而雞腳又係一般啦, 無咩特別.

佢既價錢合理而水準又OK, 所以係會ENCORE的. 呢到D位都坐得OK舒服的, 因為唔會太窄. 

九層茄子(塔香茄子改良版)!! - 附食譜

呢d就係九層塔, 一包$5, 可以分3次用.




次前講過, 我煮原裝版時, 個腦入面覺得加d野入去應該會好味d, 後來得閒d既時候我去實踐呢個諗法, 第一次煮出黎一般, 因為水同火同時間既控制未掌握到. 煮左幾次之後, 我而家掌握到反而係要煮超過3分鐘, 等佢入味d, 咁d茄子就更好味了. 同埋, 而家加左d豆板醬成個餸會變得無咁單純既味道(我唔係話單純既味道唔好, 只係可以有另一種變化的, 而2者係無沖突的, 可以共存的, 今日食呢個味, 下次又食另一個味道咁囉!), 個味變得覆習左少少, 野味多少少, 我地3個都鐘意(小冰就唔鐘意食茄子, 所以............咩都唔好食啦!!)

基於呢個係我自己既食譜, 所以我將佢改左個名叫做九層茄子, 原因係.............塔香, 好似"屎塔"個塔咁, so 唔鐘意.


材料:
1. 幼身茄子           2條 - 3條  (係街市買貴d那一種, 呢一種煮出黎係最好食的,
     我買半斤分2次煮)
2. 蒜頭                  2 - 3瓣
3. 九層塔              1棵 (係賣泰國食物的店舖有售) 我買$5 有3棵 (大約分3次用)

調味料:
1. 豉油                  1 1/2 table sp
2. 糖                      1/2 table sp
3. 鹽                      1/4 tea sp
4. 豆板醬               1 table sp

5. 水                      3 table sp

做法:
1. 蒜頭及辣椒洗淨切片.
2.九層塔洗淨, 瀝乾備用.
3. 將茄子切細段.
4. 燒熱2.5 table sp 既油, 放入蒜頭及辣椒爆香.
5. 加入茄子, 用镬剷快速將茄子與镬入面既油炒勻.
6. 之後, 加入水. 蓋上蓋, 以細火煮3分鐘.
7. 夠時便立即打開蓋, 加入所有調味料炒勻, 再繼續用細火慢慢煮.
8. 見到收淨少少汁就加入九層塔兜勻(1, 2分鐘)即可上碟.

tips:
1. 茄子一定要煮之前先切, 這樣才可以保持煮完之後都係紫紫地色, 靚好多的.
2. 九層塔煮過龍會變黑色, 所以小心免過火.
3. 先將調味料以碗準備好備用, 以便最快時間倒晒入镬內.
4. 一定要用細火慢慢煮佢, 等佢入味.
5. 加水後一定要計時3分鐘, 呢個係大約時間. 若你見未夠3分鐘就無晒水, 你可以即時倒d調味料落去, 總次就係要自己執生, 唔好太快無晒汁便可, 我煮左呢個餸(原裝版+改良版)成10次都有, 我覺得超過3分鐘係無問題的, 只要你個火細便可. 反而煮over 3分鐘仲入味, 仲好食添呀.
6. 火同水(水& 調味料)既控制係最關鍵, 要自己睇火睇水執生.

野生蕃石榴

呢D蕃石榴都係亞嗲拎番黎的, 真係好香好香, 放左佢係雪櫃, 一打開個雪櫃勁大味. 講甜佢就真係唔係幾甜, 但係就超香, 仲有最勁既係無蟲的, 食左幾個都完全無蟲的. 呢棵蕃石榴樹出既係無蟲架, 少有呢! 最重要係佢係野生的, 唔怕有農藥同化學劑.