Happypiano168: 07/02/11

紀念品:

花膠

大地魚粉

一磚磚既蝦膏(自己切開左入樽)

紫菜(買左5包)

舊年睇蘇玉華既飲食節目介紹大澳之後醒起都好耐無去過, 趁住3日假期加亞嗲又要番工, 唔想又要係屋企, 所以就一個人帶佢2個去大澳啦. 亞嗲當日知道左我地去大澳時, 佢話 “佢又想去, 做咩唔同埋佢去.”

最初真係完全唔知點樣去, 一起身開機上網search下, 原來有2個方法, 一係搭船(呢個我一早知啦), 二係搭車. 係東涌轉巴士去大澳. 基於我唔趕時間而亞仔搭地鐵可以半價, 所以我揀左車車車入去大澳(之前係搭船入的). 即係搭地鐵係中環再轉車去東涌. 落車之後搵11號巴士總站就可以了. 揀呢個方法一黎因為平d(上網d人話), 二黎之前次次都係搭船入大嶼山的, 所以今次想試下唔搭船又睇下點.

由於大概都知道要搭好耐車, 帶埋d零食去, 所以真係好似去旅行咁. 一路係咁催亞大少快d快d, 最後都要搞到成11點先出門口, 一路so far我地都幾好彩都有位坐(at least都有一個位坐既). 去到東涌, 我先突然醒起我未過東涌的, 第一眼見到, 都ok呀, 幾大幾空礦呀. 由於人有三急, 加上又要搭成個鐘頭巴士, 所以入去商場去左廁所先, 費事中途2隻野又話要搵廁所.

搵完廁所, 跟住就要搵個巴士站啦, 我係咁望係咁望, 望極都望唔到(平時亞嗲係度, 呢d野我就會點佢去做啦, 而家佢唔係度, 就局住我做啦!!), 後來唔理啦, 馮直覺啦, 終於都真係行啱左路. 我地搵到個去大澳既11號巴士站, 每班車相隔都成半個鐘頭呀, 我地好彩, 等左10分鐘都無就可以上車了. 一開車無耐, 突然落左一陣雨, 都幾大下, 當時諗, 唔係玩野呀?! 黎到呢度先黎落雨!! 好彩, 只係落左一陣都唔夠10分鐘就停左. 要讚既係架巴士, 其實係旅遊巴黎的, 所以d位好好坐, 但係d冷氣就好勁, 凍到我死.

架巴士, 路不停咁轉灣, 上山, 落山, 轉灣, 我地仲見到靈”忍”寺, 聽就聽左好耐, 終於知道係邊度啦. 仲有搭呢程巴士既戲肉就係……………黃牛show, 見到幾次, 每次都最少2, 3隻的, 多個次我仔話見到成7, 8隻都有, 有大有d好細隻既都有. 佢2隻野一見到d黃牛就好興奮. 跟住又見到藍色的士, 講真, 連我都真係好少見到(當然係見過, 只係好少見到), 因為好少去大嶼山嘛, 真係可能最少5年先去一次大嶼山.

好啦, 坐左45分鐘車終於到大澳啦, 一去到, 影左2張相就見到有人叫坐船仔, 咁我見佢可以睇d棚屋, 又話可以睇海豚, 咁就玩下啦, 因為佢都平. 2隻野初頭坐都覺得無咩野, 睇風景(棚屋)law, 後尾出左去海之後, 隻船都拋起跌番落黎, 小冰即刻驚啦, 我話, 好玩呢, 好似玩海盜船咁. 亞女應該無咩幾何試過咁拋法的, 所以佢覺得好玩囖. 跟住一路加速向前行, 嘩, 大風度呢……… 好彩我戴左度帽, 唔係d頭髮實吹到打晒結啦. 但係真係好大風, 所以我都要用手禁住頂帽先得. 個船家都好好人, 同我地係個海度係咁左兜又兜睇下見唔見海豚, 最後當然係見唔到啦, 呢d野要講彩數嘛.

由於當時已經係2點幾, 所以2隻野同我都覺得好肚餓了, 搵野醫肚先啦. 睇左一排, 見到呢間橫渡小廚咁就入去啦(未去過, 無聽人講過的), 上到去叫野食時, 記起我入門口時見到一個易拉架影住燒鵝, 所以就叫左一碟下裝, 叫左個魚湯烏冬, 叫左一個籠仔蒸飯. 3個都幾好味既, 最好食係燒鵝, 但係我唔記得佢2隻野唔食d 咸魚仔, 蝦乾個d野, 所以個飯最後食唔晒. 2隻野都話最好食係碟燒鵝, 咁講真, 佢d皮又真係好簿下, 若佢唔係咁肥, 真係叫做好好食添.

食飽啦, 繼續出發, 一路跟住d路行去睇野, 睇下d 棚屋, 又因為當日係潮退, 所以棚屋下面d水退晒, 見到d泥地. 泥地上見到好多蟹仔, 有d魚仔添, 我地係度睇d 蟹仔打交. 跟住又行去另一邊又睇下野啦, 行左一排, 我見都無咩野睇就轉頭走了. 最後行番去買海味那條街, 俾我撞到去上次蘇玉華介紹的那一間(我都係買完俾錢見到張相先知我撞啱左). 買左d紫菜, 大地魚粉, 同d 花膠. 那個老板(我諗係啩)好好人, 我係度揀左而家買左既呢一隻, 跟住再睇d再貴d既, 我問佢2隻邊隻好d, 佢話, 你自己食呢隻(平個隻)得架啦. 既然佢都咁講, 我無理由唔信佢有錢都唔賺架, 所以最後買左2包. 紫菜因為我地個個禮拜都用黎煮通粉的, 所以買左5包. 又買左一磚蝦膏, 番黎叫工人切開佢入樽放係雪櫃. 尋晚用左黎炒菜, 香味真係好d, 但相對亦貴d 囖.

我見到有蜜芽糖夾餅, 問佢2個食唔食, 佢地話好飽唔食. 後來再見到雞屎籐, 我又係咁問佢地同唔同我share, 佢地聽到個名又死都唔肯食話好核突喎. 係後來我叫佢地買紫貝天癸黎飲, 話左俾佢地聽我之前煲過佢地好鐘意飲架, 佢地先肯買黎飲. 但到臨走, 我忍唔住, 都買左一件, 諗住唔好食既話食一啖掉左佢啦(因為我都怕好難食), 但起碼我都叫做試過呀. 食落又ok喎, 當然佢唔係特別好食, 只係比起想像中叫做好好多了, 其實個味係無咩特別.