栗子忌廉蛋糕

由於覺得無論在整海綿蛋糕, 同將d cream 放係蛋糕上面都仲有好多進步空間, 所以今日特登去學, 約左10點鐘, 然後先發覺奶野, 因為即係我放假都要8點幾起身........ 正當我後悔緊之後(因為都改唔到啦), 點知部洗衣機發出怪聲加埋個摩打熱, 所以換個新既費事叫人黎整(我都話我係唔鐘意俾錢去整機既人, 用得幾年, 真係買過部新既好過整啦, 一黎又唔知整要幾多錢(唔俾300蚊檢查費係無可能知道的), 2黎整完都唔知幾時又壞, 所以買過佢好了, so 我又要等人送機黎, 又要等人黎裝機, 所以好彩我約10點, 唔係就麻煩了.

點解揀學整栗子忌廉蛋糕, 因為我想學海綿蛋糕, 又想學點樣將d cream 放係蛋糕度, 又因為屋企有罐買左成年既栗子蓉未開, 所以就一cake 3味啦.

學完好開心呀, 因為學既時候好relax, 可以好靜好專心咁整野(係屋企好難的). 仲有個意外收镬就係第一次學人吱花, 從來都覺得好難, 覺得自己實整得好肉孫一pat pat咁的. 但點知而家整完又覺得ok喎, 雖然都係無人地整得咁靚, 但係第一次吱都ok收貨啦. 其實個decoration 可以唔駛吱晒咁多花架, 只係我反正尋日食完生果cream cake, 所以都唔prefer要生果了, 我揀左吱晒成個面都係花, 因為我想練習多d, 有咩唔識可以問人.

整完之後見到好開心呀, 因為都幾靚, 呢個蛋糕97%係我整既, 除左係有幾粒栗子吱花, 同d 生果&朱古力條既擺設之外.

亞嗲同大冰小兵見到都話靚, 但係留番今晚做消夜(8點幾食), 所以未知咩味. 今次同平時自己整既唔同, 因為今次有3層呀, 平時我只會切2層咋, 今晚食下又睇下點先.

亞嗲又發揮佢一貫白痴既作風, 佢話聽到我話3層, 以為好似人地d結婚蛋糕個d 3層法喎. 我話大佬呀, 我點整到呀, 咪白痴啦.  再過左幾個鐘後, 佢又話, 我可以試下整2層個d喎(都係結婚蛋糕個隻2層呀), 我話若我咁叻, 咩都一學就叻到咁, 點會嫁你呀. 亞嗲話: 你就係最叻呢樣囖.  我話: 你都白痴既. (跟住我cup左佢線). 對住佢真係想唔短命都幾難!!

*********************************************

食左啦(7點幾放低飯碗, 8點已經叫工人serve 蛋糕了, 跨張嗎??!! 其實只係因為今晚d 餸係魚蝦蟹, 無咩肉, 所以頂唔到肚, 一放低碗已經肚餓!), 好味道, d 栗子蓉夠滑, 但係真係膩左d, 所以我食左2件已經夠了. 可能佢2隻野麻麻地鐘意栗子蓉, 所以佢地食左一件就唔添了. 亞嗲都話好食, 但係都係叫膩, 佢食左一件.