花型腸仔包 - 附食譜

以下呢2幅圗就係小冰要求 encore時所整既 8個睇仔包 for 聽日早餐的.

尋日買左幾本書番黎, 新痕王既我梗係即刻攞黎玩啦.  揀左呢個花型腸仔包, 點解會揀佢?? 因為小冰話鐘意呢個囖, 所以就由佢發版啦.

一路睇一路整, 最初都好擔心個造型好難整, 點知又好彩喎, 整落都ok, 只係當然無人地整得咁靚, 但係第一次整我都收貨的(哈哈哈, 我既要求就係咁低架啦, 無計啦, 太高要求既話, 無滿足感, 我下次唔玩架啦.). 由於而家無用個焗爐, 所以就用光波爐頂上, 咁我又唔知呢個爐既火係會唔會好似我個焗爐咁大過正常dd既, 所以又唔敢較細佢, 唯有先試下跟食譜既度數啦, 較好timer(已經較早左2分鐘諗住去睇下), 點知, timer仲有幾分鐘工人己經叫我話……d 麵包既面燶啦, 我即刻飛入廚房睇啦, 真係喎, 好彩只係剛剛開始有少少燶, 咁我就用多張鍚紙come住佢”樓” 細d個火繼續焗啦. 焗完出黎小冰好緊張, 係度係咁叫好想食, 但係怕熱氣, 所以我用個風扇吹左超過5分鐘先俾佢2個食d包咋.

佢2個好鐘意呀, 係咁話好味, 我問大乒係點樣好味, 同平時買既腸仔包有咩分別(當時我未食的想睇下有咩問題嘛), 點知大乒答我: “唔知呀, 唔識講呀, 總之就好好食啦.” 頂……… 講完等於無講, 我咩意見都收集唔到. (我後來自己食過就覺得係因為佢多左好多表面, 所以脆既效果多左好多, 所以好食在呢度.)

因為每轉只能焗到2個包, 所以我要等下一轉先有得食. 第2轉包都未出爐, 2隻野食晒d包仲話要再食, 我話, 吓, 無啦喎, 整得4個咋, 我諗住一人一個剛剛好啦(我地3個+工人). 跟住小冰死都唔肯, 係都話要再食, 咁為有只俾半個工人啦, 我就食半個既小半, 留番個d俾亞嗲試下啦. 另外個一個就俾佢2隻野分左lu, 好快又食晒, 小冰仲問我有無.  我話: 無啦, 食晒啦. 小冰係度死lur……… 咁唯有就再整多次啦, 今次一整就整8個, 用黎做聽日既早餐啦(每人2個包).

以下食譜因為係由手搓粉改做麵包機搓粉, 所以我係將我既做法寫出來, 但聲明可能有內容未必是正統正確的, 所以如有疑問, 最好問人或自行修改, 錯左唔好鬧我.

食譜: 4個包既份量

1. 水                   65g

2. 高粉                 130g

3. Yeast                2g

4. 糖                   15g

5. 牛油                 8g

6. 蛋漿                 適量(查包面用)

7. 腸仔                 4條

做法:

1. 將上述#1 - #4的材料倒入麵包機.

2. 禁select, 選soft, 禁start.

3. 當部機開始搓粉後, 搓左一陣就將d牛油落埋落去.

4. 見部機搓完晒粉停左, 取出麵團.

5. 將油查勻一隻大湯碗, 然後將麵團放入大湯碗內, 以保鮮紙包好等發酵.

6. 經過一段時間後(今天是經過83分鐘)見麵團發大2倍後, 將手指沾上乾粉後duk入麵團中間, 見無即刻縮回, 即表示麵團發酵成功.

7. 以手搥打個麵團幾下, 令到入面既氣排出.

8. 然後將麵團放到檯面, 分割為4等份.

9. 以滾圓法將每份麵團滾圓後蓋上保鮮紙讓麵團鬆馳10分鐘.

10.      10分鐘後, 將麵團look平, 包好腸仔, 個口要黏緊收好個口.

11.      用刀仔將麵團切開十段, 切記唔好將麵團切斷.

12.      將已切的麵團一中中左右的拉出, 放入焗盤內蓋上保鮮紙.

13.      將焗爐較至180度預熱.

14.      待發酵至2倍大時, 便可塗上蛋漿.

15.      再唧上沙律醬(或加埋蕃茄醬也可).

16.      放入焗爐內焗12 – 15分鐘便可.