因為上次亞姨無啦啦問我買唔買雞骨草, 上次佢幫我買左一包, 又加上亞嗲早前睇林寶怡10點半那個節目, 係講d器官既, 其中有一集係講 肝 , 咁入面介紹左一種湯, 自此.......今日呢一包已經係第3包雞骨草啦.
呢度一包睇起黎唔係好大包, 但係實物一d都唔細的, 有1/4張 4人餐檯咁大包架, 因為佢有成一斤重的.
上次買雞骨草時, 個老板已經問我要唔要埋金錢草, 好啦, 今次買埋金錢草試下啦. 因為我都聽過金錢草雞骨草用黎煲涼茶, 所以..........都不妨一試既.
呢度每包係$30 都好抵架.
測完晒驗, 今個禮拜得閒d, 所以可以整下雞食. 原本想整青咖喱雞(因為屋企有包青咖喱, 想清貨), 但係又要其他材料, 所以最後都係揀番烤雞算了. 問佢2個想食咩烤雞, 一個話檸檬香草烤雞, 而另一個又話沙薑烤雞, 永遠都係一個東一個西的, 最後, 都係揀左沙薑烤雞啦, 因為亞妹好耐之前已經話要encore的, 排左隊先.
食譜我改左少少, 因為上次唔夠重沙薑味.
材料:
1. 雞 1隻
2. 薑 5片
3. 葱 5條(切段)
醃料:
1. 沙薑粉 2 湯匙
2. 鹽 1.5 茶匙
3. 紹酒 適量
做法:
1.先用紹酒將雞塗勻, 然後將鹽和沙薑粉溝勻後平均地塗在雞的內和外.
2. 將薑片及蔥段放入雞內,最少醃 2小時.
3. 預熱光波爐, 將雞放在低架以250度烤.
4. 將油用油掃掃勻錫紙,然後以錫紙將雞包好(我將個面向上).
5. 以光波爐底和面各光11分鐘. 然後可以除去鍚紙,再每邊光約6-7分鐘. 聞到香味取出,見好就收.
6. 雞要放涼後才可以斬件.
7. 今次我唔斬雞啦, 用較剪剪開黎食.
********************************************************
食左啦, 今次個味好好多,夠咸同多番d沙薑味.呢個份量好好多.今次烤得唔夠乾,所以今次d皮唔太脆. 但係用光波爐烤雞真係好正,d肉又唔鞋又唔肥膩又唔熱氣.
收到合昌既傳單, 剛好屋企既鱷魚肉用晒, 所以就入番貨啦.
現將我煲開既鱷魚肉湯post係度, 講明呀, 係偏方黎的.但係我聽藥材舖既人講所有材料都係對咳同埋氣管好的.此湯對氣管唔好既人飲左好的. 當然氣管無事都可以飲的, 因為而家香港d空氣咁差, 都無咩人氣管會好好的. 同埋鱷魚肉係有增強免疫力既功效,所以飲左都好架.
鱷魚肉湯(偏方) (煲埋4碗水份量)
1. 鱷魚肉 2兩(4兩都可以)
2. 南杏 少許
3. 北杏 比南杏更少
4. 蜜棗 2粒
5. 果皮 一角
6. 蛤蚧 一對
7. 瘦肉 隨意
8. 百合 少許
9. 川貝 少許
10. 法半夏 一兩(係藥材舖買,舊年5蚊一兩,而家13蚊一兩)
11. 水 適量 (我無記錯大約7碗水度)
做法:
1. 將鱷魚肉洗淨後用水浸一浸佢.
2. 蛤蚧洗淨後備用;果皮浸軟後除去白色備用.
3. 將鱷魚肉出水, 瘦肉又出水,最後將蛤蚧出水(怕佢污糟, 所以我自己出一出水, 感覺乾淨d), 鱷魚肉同蛤蚧出水既次序不可倒轉.
4. 將所有材料放落煲內開火煲, 煲滾後繼續用中大火煲15分鐘. 然後轉細火煲個半鐘, 加鹽調味便可.
* 此湯一飲要連續飲10日. 停幾耐都得,但係再飲又要飲10日的.
** 我通常一次過煲埋2日份量(即4碗), 俾佢2個飲. 咁樣就係變成格日煲, 唔駛日日煲咁煩.
注意:
1. 蛤蚧買番黎扎好的一對就係一對, 唔可以求其搵2隻當一對呀.
2. 蛤蚧叫藥材舖幫你cut頭cut腳(最低那一忽).
3. 我之前係安記買, 一次過買10對, 佢地好好咁幫我刷埋個身既鱗(個d係叫做鱗啩), cut頭cut腳.
4. 揀蛤蚧要揀條尾夠粗的為之靚.
材料:
1. 德國鹹豬手 1隻
味料:
1.八角 2粒
2.草果 1粒
3.香葉 6片
4.丁香 3粒
5.沙薑 6粒(我用沙薑粉適量代替)
6.清水 3kg
上皮料:
1.白醋 2 tb sp
2.淅醋 1/4 tsp
3.麥芽糖 1/2 tsp
4.紹酒 1/4 tsp
做法:
1. 先將豬手沖洗, 出水, 浸在冷水內.
2. 將味料煮滾後, 將#1的豬手放入, 轉中細火煲50分鐘.
3. 煲完50分鐘後, 熄火, 由佢浸多50分鐘.
4. 塗上上皮料, 風乾3小時.
5. 放入光波爐燒至夠色便可.
食左啦, 好香, 香口的, 少少鹹味, 幾好味的. 係衰在d 皮un. 同埋唔識好似人地咁切得咁靚, 可能係把刀唔夠利啩, 需要改良.
尋日諗好左煲呢個湯, 所以叫工人買齊蘋果同雪梨喇. 其實應該係用豬展的, 但係為左達成我唔駛出街既願望, 所以我就用左豬骨啦, 因為屋企有嘛.
材料:
1. 雪梨 4個
2. 蘋果 2個 (蛇果)
3. 南北杏 適量
4. 蜜棗 4粒
5. 無花果 6粒
6. 果皮 1角
7. 豬骨 隨意 (改豬展更佳)
煲左2個半鐘, 啖湯好甜好夠味.
我屋企上2個禮拜食晒d鱷魚肉. 一心等佢特價先再買啦, 點知尋晚就收到了.
今朝番到公司, 問下d fd 有無人要買啦, 因為平時都幫一個fd買開的. 又再問埋另一個fd. 由於買10斤個價錢係平好多, 所以就發散晒去問, 係不出半個鐘頭, 我地已經湊夠10斤了, 而家直頭係over 10斤 tim.
每斤可以平多成90蚊, 大家都好開心呀, c9就係咁的, 少少野都可以開心餐死的. 但係其實咁咪好囖, 易滿足易開心, 咁先至係生活係呢個世界上嘛.
希望呢d 鱷魚肉腳長買長有啦, 咁大家都可以慳番d錢.
鱷魚肉湯唔一定係有哮喘既人飲架, 佢都可以增加抵抗力(免疫力)的. 當係保健湯水無壞架.
我之前有買過安記那些, 但係覺得合昌呢d 好d, 我係網上亦見d人話合昌既好d. 加上我做過實驗, 我用2間公司既鱷魚肉煲湯俾佢2隻飲, 佢地都係一致話合昌既好飲d. 咁用家為主, 所以就一路買合昌了.
快樂指數.......... 我諗係好多香港人黎講都唔會好高. 呢個指數同你身家有幾多錢係可以完全脫鈎的. 只要你有本事, 你真係可以嬴左d超級富人.
以前好多事都不如意, 真係頭頭碰著黑, 又專係野是非(都唔知做左d咩都會有是非先勁). 所以成日都唔開心, 基本上可以講我前半生都係唔開心的.
點解話專野是非?? 係大約2年前, 有一個識左好耐既好朋友同埋一個親人, 佢地成日講野都睇唔起你咁, 又成日見到你就講講講, 我已經唔同佢地講野黎避佢地, 但係偏偏都係好似冤魂不息咁, 每次見到佢地都會令到我唔開心的.
基於我要湊同教呢2隻野, 我真係已經overload, 我無時間再去招呼呢d人, 所以我揀左一個我認為可以令我自己開心d既做法, 就係 -- 唔會去搵佢地, 唔同佢地講野, 當佢地透明, 佢同我講野都係好簡單的應付一兩句便算. 自從疏遠呢d人, 我既生活真係比以前開心左好多, 起碼我可以過番d 不受騷擾既生活, 我老公之前成日叫我唔駛理佢地講咩, 事實跟本就唔係咁. 我話, 你可以做得到唔等於我都可以. 我記性好好的, 唔係我想去記住, 而係我根本都無辦法唔記得!!
有人話, 你唔同呢個親人聯絡將來可能會後悔. 我覺得有時d野係雙向的, 我唔可以為左他人而活. 人地可以肆無忌憚咁鐘意點樣話人都得, 咁點解我唔可以選擇遠離呢d人呢? 佢係長輩就大晒嗎? 呢樣野我係最反感的. 佢唔會明白人地點樣因為佢既說話而唔開心囖, 其實人地係無做錯任何事, 無得罪佢的.
另一個朋友......... 我覺得既然呢個朋友都可以咁樣講野, 我又駛咩珍惜呢個 "朋友"呢? 每次聽到要gathering知佢係到, 我都覺得好大壓力. 想唔去, 因為好怕聽到佢又自動波咁樣搵野黎講(當然係暗箭啦). 當我make up my mind之後, 我見到佢, 佢同我講野我都係一句起2句止. 我唔會主動同佢講野. 答佢, 係呀, 係咩? 哦, 咁就算.
到呢1年, 我發覺雖然我搵錢唔夠身邊既朋友多, 無佢地咁好既事業. 但係原來我既快樂指數比佢地高好多的. 有個 fd長期要對住一個好 q 煩既99加埋一個幾火爆既老公, 有個 fd 係幾有錢, 但係家宅同公司都總係好多事幹的(係真係好多事幹架, 咁多年黎真係不停咁有唔同既野發生的, 見到佢都鄧佢辛苦). 另一個識得最耐既fd, 佢就真係.........陰功. 我地好耐見一次面的, 以前見佢, 覺得佢幾好彩, 搵到個幾好既老公, 對佢好好, 又細心, 成日都車出車入, 管接管送, 對佢既朋友又好的, 環境又好左好多. 最後才知道, 佢老公有第2個女人, 仲要做左d好離譜既事(玩女人都算, 但係佢做既野係真係當我個fd 唔係人咁, 一d都唔尊重佢的) . 我聽到時覺得好嬲, 因為佢有無搞錯呀, 佢真係好過份. 我fd講俾我聽時仲處處維護佢老公, 我就鬧佢啦, 我話, 佢咁樣對你, 你自己都要爭氣d啦, 點解仲要幫佢, 為佢面子著想呀? 我朋友無言(佢不嬲都係林pat pat的). 見住佢喊, 我真係好想問下佢老公, 我fd 做錯d咩事佢要咁對佢!!
我聽埋聽埋, 我諗番我自己, 我覺得雖然我無佢地咁有錢, 但係我既生活真係隨心所慾好多, 我想做咩就做咩, 亞嗲通常都肯同我去的. 我又有自己既興趣 - 煮野食, 煮得黎又唔駛日日煮咁有壓力, 鐘意先煮. 2隻野開始大, 無細個時湊佢地咁辛苦. 亞仔亦比以前生性, 勞少左氣. 同亞嗲既關係亦ok幾好, 大家有相同既嗜好, 同佢一齊成日都係不停咁玩, 笑的. 所以我都好感恩, 做人最緊要開心, 若唔開心既話, 你有再多既錢都係徙然!!
我想生活係呢個世界上而唔係生存係呢個世界上, 所以我只得行我想行既路!!
仍然想烤雞, 所以又買隻雞番黎啦, 今朝7點幾醒左訓唔番, 所以開電腦睇食譜, 見到呢個好多人話好食既檸檬烤雞, 好, 就試一試先.
我去完商務(最後一日減價有8折)同outdoor(買定羽絨俾個仔番學著, 有半價)番到屋企已經3點頭, 所以就拿拿林即刻yip高衫袖入廚房準備材料. 由於我用光波爐加上我懶, 所以我將個食譜改左有d野唔要的, 想睇原食譜就睇最底既網址.
材料：(我將原食譜修改並減少左d野)
1. 雞 1隻
2. 檸檬 1個 (將佢不停壓扁,務求變得多汁)
調味：
1. 海鹽 1 tb sp
2. 即磨黑椒碎 1 tb sp (張相係少左黑椒的, 我又來加番)
3. 香草 (隨個人喜好, 所有香草合共最少要有1 tb sp)
a) Rosemary 1 tsp
b) Parsley flakes 1 tsp
c) Oregano 1 tsp
d) Majoram 1 tsp
e) Thyme 1 tsp
f) Basil leaves 1 tsp
(因為我屋企有好多樽香草,所以就黎一個香草大晒冷全部用晒佢, 你可以按個人喜好用1,2種香草都得架)
做法： 2.烤之前將海鹽和黑椒塗勻雞腔內及雞的表面. 4.將香草塗勻雞腔入面, 然後將整個已插lone既檸檬放入去. 5.用針將雞的尾部封住, 切記唔好密封晒佢, 要番番d 空位俾佢散熱.
1.雞内外洗淨，用廚房用紙巾抹乾
3.用叉在檸檬刺好多個lone.
6. 烤前約4分鐘將光波爐以250度預熱.
7. 在鍚紙上塗少許牛油, 用鍚紙將雞包好.(另一邊預熱個爐)
8. 放入光波爐以 250度火將雞的底部,面, 左, 右都光到佢熟.
9.然後除去鍚紙, 再將雞的底及面光到夠色就食得.
10.我就趁熱用手套將雞扯開黎食.
*******************************************************
食完啦, 三個字黎形容, 好西呀!
好西式既烤雞(鬼咩尋日食左泰式烤雞嘛), 我地個個都鐘意食喎, 其實佢又唔係真係超好食, 但係就有新鮮感囖(因為我地成日食中式雞嘛, 我又好憎kfc的(因為好死油的), 出親街食飯我都係食牛多.)
我今次焗到d色幾好呀, 幾滿意, 個皮初頭仲有少少脆架(後尾又被d汁浸林左個皮).
p.s. 之前3隻雞都係百佳買的,今次轉番用唐順興,真係好味d的.
食譜出處:
http://www.jamieoliver.com/recipes/chicken-recipes/perfect-roast-chicken
舊年見佢特價買左一盒黎試, 幾好味喎. 但係就幾spicy 下, 所以後來又買佢隻鮑汁味試啦, 但係就唔夠spicy味咁好食. 成樽最好味就係d 辣汁. 亞女好鐘意食, 一路叫好辣, 一路係咁食.
上個月定9月佢已經又特價$10 一盒, yes 係$10一盒有2樽呀, 我那次買左7盒, 送晒俾人自己得1盒. 想再去買時已經無晒spicy 味了.
終於等到佢今個月再特價, 都係$10, 所以我就一口氣買左20盒番黎, 放係度鐘意就送盒俾人囖! (其實已經已經送左4盒俾人, 自己又食左一盒, 所以都唔係淨番好多咋!)
又想烤雞, 但係又唔想咁快repeat沙薑雞(雖然亞女叫encore), 所以係網上搵左一輪食譜, 對呢個泰式烤雞最感興趣,所以就決定一試. 因為要醃過夜, 所以而家已經醃好左, d醃料個味一撈埋之後就好香好香, 我地3個都話好香(除左亞女話臭之外). 我變態到整好晒隻雞放番入雪櫃之後都依然成日聞d手指(因為我用手黎撈勻d醃料嘛), 因為好鐘意那隻"泰"香味.
材料:
1. 冰鮮雞 一隻
醃料:
1. 魚露 2湯匙
2. 黑胡椒碎 1茶匙
3. 咖哩粉 1茶匙
4. 老抽 適量(少許便可)
5. 糖 1湯匙
6. 蜜糖 1.5湯匙
7. 五香粉 1茶匙
8. 紅椒粉(或指天椒少許)1茶匙 (我無紅椒粉,改用2粒仔指天椒)
9. 乾蔥茸 1茶匙
10.薑茸 1茶匙
11. 蒜茸 1茶匙
12. 香茅 1枝 (拍扁切茸)
13. 芫茜 $1 (切碎)
做法:
1.將雞落醃料內外卒勻醃1日. 第2朝再撈勻d醃料查勻成隻雞, 然後就反轉另一邊再入雪櫃(等佢再入味d).
2.烤之前將所有醃料都用匙更掃番晒出黎備用.
3. 將雞一開二, 雞脾位或厚肉的地方插幾個”隆”得佢易d熟. 用鍚紙包好, 放入已預熱的光波爐, 以250度火黎光佢. 覺得佢光到夠熟.
4. 除去鍚紙, 再放回雞入光波爐, 光到夠色便可. 待涼後才好斬雞. 若用手食可以微暖時即食.
5.醃料落鑊煮滾，用作點雞醬汁
*************************************************
食左啦, 我就覺得唔似泰式(除非你點d汁), 個味係好味的, 只係唔係我expect咁有意外既味道. 因為真係似中式雞黎的,若以中式雞黎講,個味就真係有d新鮮感的,好搞野的,d雞又有d咖哩粉味架. 隻雞好滑, 係嚴個皮烤得唔夠乾身, 唔夠烤雞feel. 亞嗲就好鐘意食呢隻雞呀.
* 唔知係咪把刀老啦, 今次磨完又係唔夠利, 好過上次啦, 但係都好難一刀斬得分開晒.
食譜是參考呢個BLOG的 http://blog.yam.com/seebi00/article/7135156
1. 泰式烤雞
2. 煎餃子
3. 焯菜心
湯: 雪梨雪耳無花果豬骨湯
由於又唔知煮咩好, 所以係星期五只係叫工人買左隻冰鮮雞同菜心咋. 好彩我屋企多存貨, 所以叫起身煲湯都只係欠雪梨啫. 但係仲爭一樣餸諗極都諗唔到煮咩, 又懶落街, 所以係冰箱搵到包餃子就處決埋佢啦, 一黎清倉, 二黎........我真係唔想落街呀!!
剛放晒D材料時影的.
好快又一個禮拜, 又到我開工既時候, 又係突然先醒起今日無湯飲喎, 所以又上網隨機抽樣咁睇下想煲咩湯啦, 好快睇到呢個湯, 基於大多材料我都有齊, 所以就煲佢.
特別嗚謝亞仔幫我去超市買雪梨, 因為我唔想換衫落街,所以唯有叫亞仔去買啦,買5個番黎, 有一個個頂有少少爛的, 我指住俾佢聽叫佢下次唔好要呢D. 呢D係咪叫通識教學呀??
雪梨無花果豬骨湯 – 附食譜
LC 煲精選
材料﹕
1. 雪梨 5個
2. 南北杏 適量
3. 豬骨/豬展 約25蚊(因為我雪櫃只係得豬骨)
4. 蜜棗 2粒
5. 無花果 5 - 6粒
6. 雪耳 適量
7. 適量果皮 1角
做法：
1. 豬骨洗淨出水備用.
2. 雪梨切開去心，切關8份(4份都可以)備後.
3. 雪耳浸透剪去 “底部”備用.
4. 密早浸軟, 頂及底剪開十字備用.
5. 果皮浸軟, 除去白色部份連其他材料洗乾淨，全部放入煲，以大火煲滾10分鐘(1000W)後轉慢火(800W)煲 2小時即可。
呢抽係3個禮拜前買既, 而家係深色D的.
呢抽係上個禮拜日買既, 仲係好清楚見到綠色的.
慢慢再POST係度, 睇下個進展比較下. 呢次唔係我第一次曬果皮啦, 應該係第3次, 由於見樽果皮都食得幾快(差唔多煲親湯都用一角的), 所以今年又曬番D啦.
第一抽賣38蚊, 第二抽賣40蚊(同一檔買喎, 過左2WK加左價).
係上星期六個舊光波爐蓋已經離開佢既肉身走左出黎, 我叫亞嗲睇下整唔整到, 佢係咁意睇下就話整唔到呀. 跟住我自己唔忿氣, 自己攞個羅絲批黎試下扮大佬啦, 搞左15分鐘都係唔識整, 完全都唔明佢個頂同玻璃係點樣痴埋的. 想整番佢係因為個爐係用得的, 無壞架, 但整唔到咁為有死心啦, 買個新架啦.
係星期日亞女已經話想encore 烤雞, 但係個爐打左柴, 咁無辦法整啦. 所以係星期日我已經行左3間惠康睇下有無得賣, 但係都無. 又叫工人去另一間睇, 都係無. 到星期一打去憶x通同惠康問, 佢地都話惠康無得賣啦, 剛剛換左另一批貨, 退晒番去啦. 真係激死人, 差幾日都唔等埋我!!!
個憶x通客務中心係旺角..............個爐又咁死重, 真係超唔想去咁遠買. 但係又真係問勻晒都無地方有得賣, 咁局住去啦. 但星期二同三都唔得閒, 所以plan 左今日星期四買. 亞嗲話星期六幫我去買, 基於我自己做到既野唔想靠人, 同埋亦唔想等人(我真係連死都想快快趣趣唔好拖的), 所以我今日番工已經著住套運動衫番去, 放工就可以全副武裝出動去搬呢舊重野番黎. 好彩, 比我想像中輕, 同埋佢個客務中心近我番屋企既巴士站, 咁先叫做好d. 個天好似嚴我未死, 佢再送多我一程, 落埋少少雨黎贈興, 好彩真係近巴士站, 唔係我又要拿"姐", 又要ling呢舊咁重既野, 真係死得.
係個度試機時, 我摸過部, 覺得個玻璃兜簿左無舊那一個咁舊. 番到黎屋企工人摸完都話係. 同埋新呢一部機比舊既嘈d. 但係算了, 唔係太離譜就費事ling番去旺角咁死遠換.
新舊兩部機一齊黎個大合照.................. 我都唔捨得部舊的, 因為真係經常用佢黎整餸(雖然大部份時間都係工人用佢), 佢真係好幫得手呀. 加上佢又無壞既, 咁樣掉好似好浪費咁. 但係我真係整唔到咁無計啦.
買完呢個爐番黎, 更加覺得個熱狗機$498超唔抵, 因為一定無光波爐整到咁多野食呀!!
原本係幾個月前同埋係買左呢個牌子既光波爐幾個禮拜後, 一心諗住呢個壞左就換德國佬那一個光波爐的, 貪佢靚d 同埋多功能d, 最緊要既係憶x通呢個我係bk見幾多人買左番黎就跳fuse 要去退番錢. 我好彩, 我那一部無事. 咁諗住貴d但係功能又多d又無咁易壞, 所以都一心打算下一個目標係德國佬的. 點知係幾個月前, 我係bk 見人地個德國佬光波爐壞左/定爛左d野, 問係邊度整, 佢那部用左唔係好耐, 咁我問人, 其他媽咪話德國佬都好易壞的(加埋我而家屋企那部死人德國佬煮食爐就更加之信佢d出品唔係好野啦). 又係前日問左個friend, 佢買左部德國佬咁耐, 除左普通烤野外用咩function多, 佢話無呀, 通常都係烤咋. 咁我諗, 可能我買左番黎都係會咁, 既然2個牌子都係咁易壞, 咁無需要side多900蚊去買德國佬啦. 反正都係膽博膽, 睇你好唔好彩. 於是我尋晚係憶x通度叫佢插埋插蘇試一試俾我睇, 若跳fuse既, 都可以即刻換第2部, 唔駛又再搬左番屋企又搬番番去換. 而家好期待星期六, 因為我plan好整泰式烤雞(雖然亞女極力想encore 沙薑烤雞, 但係我想試新野), 希望好味啦!
祝新爐開張大吉, 事事順利!
* 而家除左個蓋係新之外, 其他野都係用番舊機的, 如玻璃兜,白色架等等. 借屍還魂記!!
今日係報紙見到呢個機, 覺得好玩(因為咁橋尋日先叫工人整完熱狗做早餐, 亦咁橋覺得有需要做得更好既地方). 而家心大心細, 唔知買唔買好!!!!!!!!!!!
我係網上又search到有另一部熱狗機喎, 另一部就pro 好多, 但係同樣又貴好多啦. 我見之前八達通有得換過.............but too late啦, 過晒期了, 而家無啦. 但係買又要4xx蚊, 我一定唔會買, 因為我都唔知會玩幾耐. 所以放係呢度等下先啦.
若有人見到cusintec 那部再有得換, 唔該單聲我知呀, 感激感激! (但係亞嗲就一定多得你唔少了, hahahaha).
*********************************************************************
經過一日既考慮, 我決定唔會買憶世通那一部, 原因係...... 我覺得清洗會麻煩d同埋好似下面那部pro d 咁.
而cuisntec 呢部我只係遇到佢超平價換先買啦, 即係100蚊or幾十蚊可以換那種先買啦, 因為我睇睇下覺得佢下面係一部多士爐黎的, 只係個多士爐上面再加多少少野之嘛, 唔值貴價的. 同埋.........我屋企都有焗爐/光波爐, 所以無呢d機都一樣整到, 只係貪佢得意先想買. 所以真係當玩具咁買黎玩, 所以要平先買啦.
