由於就黎開學, 所以想帶 2隻野出去行下, 唔駛困係屋企. 原本想去長洲/坪洲/南"亞"島是但一個地方的, 但係佢地好晏先起身, 所以最後揀左上山頂. 因為我同事俾左幾張免費坐覽車既卷我, 11月到期, 所以用埋佢先啦, 同埋上山頂都唔係去好耐, 咁可以唔駛咁晏番屋企, 因為我仲要去買蟹然後先番屋企, 所以唔想搞到咁夜.
好彩既係今日唔係好晒, 但係就真係幾熱, 成身濕晒, 我地將卷仲可以去埋觀景臺的, 所以我地就去睇下啦, 第一次去咋, 若俾錢去睇要每日$25, 上面有2, 3張相就係係觀景臺影的, 平時去山頂又真係睇唔到呢D景. 係個度又見到D屋, 好近的, 但係...........搞到一D都唔似豪宅的, 反而似....................鬼屋多D, 因為個感覺係舊(入面亦唔覺係豪裝)又無咩人氣咁. 住山頂住到咁真係SIDE 晒間屋. 當然可能係D人超有錢唔志在.
最下面呢張相其實係貼係一幅牆度的, 我見佢有懷舊FEEL, 所以影低佢, 留番第時睇下.
去睇下呢D 遠景, 個人心情都舒服D, RELAX D, 無憂D. 今次真係多謝晒我同事俾呢D 卷我地啦!
趣聞一.
去到個溫泉泳池, 我坐係度等我老公同個女去玩滑梯, 有個韓國妹(1x歲)走埋黎同我講韓文, 我唔識聽佢講咩. 但係佢醒識得做手勢, 咁我知, 佢想我幫佢看住個水泡, 咁ok啦, 我應承佢.
到沖涼時無晒位沖啦, 我地企係度等人地沖完啦. 咁有個韓國女人(5x歲)向住我講野, 我當然唔知佢講咩啦, 但係見佢既動作係叫我地沖住先咁啦(因為佢洗緊頭). ok啦, 覺得人地好好人咁啦, 無為意.
到去樂天世界, 我地唔識路, 周圍搵野玩啦, 咁搭lift時, 中途開門有班女仔(1x歲至20歲)入左黎. 部lift 行行下, 有個女仔行埋黎我度, 向住我講野, 但係佢係講緊韓文喎, 咁我當然又唔知佢up咩啦, 我咪用英文講我唔識聽佢講野law. 咁佢地即刻say sorry. 當佢對住我講野時, 我真係好岳然架, 點解佢會係對住我講韓文而唔係英文既(因為我個晚都周圍問路, 但係我用英文問人嘛, 明知只有英文先有可能溝通到的), 成lift 人係度(我老公, 我d仔女), 點解佢淨係對住我一個人講韓文呀?? 我真係r 爆頭.
跟住先諗番起, 之前係溫泉度那個些女人都係同我講韓文喎!!! 但係我個樣..........其實都唔似韓國人的, 我又矮, 佢地都高架嘛.
趣聞二.
有一日我好似平時咁聽緊導遊既介紹, 突然間聞到一d臭味. 咁我撞下亞嗲睇下佢覺唔覺啦. 佢原來都聞到喎, 跟住仲越黎越臭添. 後來我地仲用手整住個鼻黎避左呢d臭味. 個導遊見到, 於是叫司機開抽風, 過左一陣間先叫做正常番咋. 我地認定係後面那個男人放屁. 到後來番到黎香港, 唔知點樣講番呢件事黎笑, 因為真係臭到死咁滯. 我同亞嗲係度講講下, 大兵先話個日係佢放的屁, 我話係你咩? 唔係後面那個男人咩? 大兵個樣好casual 咁答我, 唔係呀, 係我放架. 我話: 你死架, 咁當時你唔出聲, 跟住佢又係度扮傻!
趣聞三.
係第5日既朝早, 食完早餐, 亞嗲去左廁所, 咁全部人都走晒番番上旅游巴, 咁我地就係度等埋亞嗲啦, 又由於個間餐廳係要入商場入面再轉又要搭lift的, 所以韓國的攝影師就係度等埋我地.
佢係度同2隻野玩, 玩玩下, 佢問我野, 但係佢d 英文唔係太正, 所以我唔知佢講咩. 佢講左幾次, 我知道佢係問我, 有無人曾經講過我老公似xxx (但係就係聽唔到佢話係邊個). 咁我問佢, 係咪 "LESLIE" 佢唔識聽我講咩(我已經講緊英文喎, 可能係一句英文唔係單字, 所以佢覺得難聽啩). 後來佢係度猛講, 我都聽唔明佢講邊個(後尾先知原來佢講國語, 頂佢呀). 最後, 佢用部手提黎搵D 中文字俾我睇, 原來佢係講張國榮(咪即係LESLIE囖, 我一早講左啦, 駛咩搞咁鬼死耐呀, 聽到我隻野咁). 我話, 係呀, 佢D 朋友以前都係咁講話亞嗲似佢的. 我問攝影師點解會覺得佢似既. 亞攝影師話, 因為佢尋日幫我地個團執相, 佢話所以佢見到我老公個樣似LESLIE喎.
最後一日係韓國啦, 諗起呢幾日唔駛聽電話, 唔駛簽手冊, 唔駛煩呢樣個樣, 真係好唔想走.
今日既行程第一站係去水晶城, 完全無興趣買啦. 個導遊話個電話手繩港幣60蚊一個,佢話但係睇起黎唔似值60蚊的, 所以佢推介呢個叫我地可以考慮下. 佢話其他既就真係人人對同一件水晶既定價都唔同, 所以就唔建議我地買啦. 我地入到去, 個個團友都係搵呢d電話繩, 見都真係幾靚所以買左一個俾個女. 買2個100蚊, 咁就同d團友夾份買, 即係用左50蚊買到一個(佢仲送埋d錬, 可以將錬咀變成頸錬咁帶, 一物兩用).
最後一站啦, 跟住就開車去咩護肝寶專門店, 睇佢做示範就好似幾勁, 但係佢個價錢仲勁, 成2xxx蚊一盒4樽, 又唔知係咪有效, 所以全團都無人買. 反而係個領導就買左一盒俾佢女友.
跟住就上車去機場啦, 我地搭3點幾班機(即係香港2點幾), 所以12點幾就去到機場啦, 午餐自己搞掂, 我地都係食蛋糕算了, 因為都唔係幾肚餓. 又加上係飛機又有野食的, 所以食少少野頂肚算了. 係機場入面都買唔到野, 所以係找換店唱番晒d won俾佢, 可以換番7xx蚊港幣(因好多時買野都簽卡, 成日怕唔夠錢買野).
係入閘時見到德國女排, 成班人都高到好跨張的. 上機後仲發現佢地就坐正係我地前一行. 好笑,我前面的那個德野女排企起身時, 我特登企埋起身度下, 嘩, 佢高我成個頭有多, 真係跨張. 我見到佢地係機上用notebook睇番一d球場既play back, 可能係爭取時間, 睇下人地強弱, 知己知彼, 才可百戰百勝嘛. 又見到一個德國女排, 佢坐係度時, 可以將隻腳 “洞直”舉起的, 好鬼勁, 亦好鬼 “岳然”, 因為從無試過係飛機上面既 “鄧”無啦啦會突左隻腳出黎的, 平時見親既都係突左個頭出黎, 但係今次見到既係隻腳, 佢d根係可以鬆到咁, 真係佩服!!
今次坐既國泰機係新機黎的, 好正, 闊d, 新d, 個remote放係前面張 鄧 既鄧背, 方便好多. 張 鄧 亦有個位突出黎係for 條腰可以挨的, 咁條腰有野撐住就無咁倦.
番到香港出閘後, 見到有香港fans 係機場等緊接德國女排既機, 我地去萬寧買水飲之後行過, 突然聽到好大聲哎及拍手, 原來係德國女排出黎, d fans 係度歡迎佢地.
好啦, 又要番番黎現實既世界啦!!
呢度就係人蓼專門店入面介紹的地方.
我地只係買左好少紫菜咋, 因為覺得香港買可能差唔多甚至平d, 同埋都無咩好買.
呢度係食午餐的餐廳, 佢巴閉到要等成10-15分鐘先有位, 佢專做團餐的, 真跨張, 未試過跟團要等位. 佢個所謂既竹筒飯, 唔知佢有咩特別, 那夠鮑魚食無咩特別(最簡單既鮮味都唔係好覺), 反而個火鍋就ok的, 火鍋入面既魷魚最好食. 汽水任飲最正.呢度既泡菜都ok, 我都差唔多一個人食得晒.
我食左夠鮑魚先記得影相.
呢度就係樂天百貨9樓既雪花秀counter, 好多人, 呢度只係成個場既冰山一角, 入面仲有好多其他唔同牌子既化妝品counter, 有成8成人係度的, 無人帶你去都真係要花d時間先搵到雪花秀的counter呀!! 女人錢易賺就係咁解啦!!
呢度係明洞/南大門(唔知邊個打邊個啦, 趕時間呀)既街頭小食, 佢地都真係幾乾淨的, 有d小食都幾似香港那些中式食品.我地買左一包呢d魷魚, 5000won一包, 約港幣35蚊. d魷魚條都幾好味, 無香港那些咁乾身, 所以無咁un.
呢個就係我之前睇電視見到好長好長既雪糕啦(唔知係咪同一間), 我地係見到人食, 問人去搵架. 呢頭買完企係度影2, 3張相就已經溶緊, 真跨張. 味道就普通啦, 只係貪得意試下.
第2次黎樂天世界, 聽講話裝修過喎, 今次都係得3個鐘頭度, 所以又係要以9秒9既部度去玩, 好多野都好多人排隊, 所以後來見到呢d 低能野無人排, 叫佢地去玩啦, 否則, 玩唔到幾多樣野的. 但係佢2隻野都玩得好開心喎, 真係低能仔!!
兒童碰碰車
夜晚又肚餓, 所以又去便利店買野食, 我同亞女買杯麵食. 但係d杯麵唔好食既. 呢隻奶就好飲.
進入第四日行程啦, 食完早餐(一般既豆漿, 粉麵飯, 小菜, yes 早餐有小菜, 係自助形式的, 但係……….見到都唔想食, 因為覺得好肥膩, 又好似唔好食咁).
食完早餐, 開車去人蔘專賣廳, 亞嗲一早諗住買人蔘粉的, 佢話佢同事話飲左好喎, 咁聽完個職員豬up之後,問下d人蔘粉既價錢, 見賃錢ok(約港幣660蚊)就買左一樽. 貪佢方便d, 放湯, 沖茶幾時都可以放少少入去的, 咁樣應該可以食得晒成樽啩(因為通常去旅行四番黎既野最後都係淨番晒係度掉的, 真浪費). 黎韓國之前, 我諗好買韓國粉絲同韓國豉油黎炒粉絲的. 但係死得佢, 係呢間野得番一包粉絲(5000WON一包,約港幣35蚊), 咁唯有去超市搵下啦.
跟住就去左韓國品牌化妝城, 佢主力係sell那隻UGBANG既牌子, 我地成團人睇佢講介, 試下, 成團好多人都奶晒野. 佢俾我地試那隻PEELING, 都OK的. 又俾我地試那隻水珠霜, 查係手背上面好普通的, 但係你卒得幾野, 就開始見到有D水珠出黎的, 越卒越多(當然會停啦), 個SALES話多水珠即係表示你D皮膚水份夠, 所以細路仔試既話係比大人更多水珠的. 咁我見到又真係細路仔隻手多D手珠喎. 所以覺得佢幾好玩. 佢差不多所有野都係劃一價錢, 約港幣195蚊一支, 買5送1, 送那一樣可以揀佢地原價港幣7XX蚊(職員話咋)既眼XXX(唔記得左, 好似係收緊眼袋家FOR 黑眼圈咁上下的). 買5件為之一SET, 買3SET又送多2盒MASK(共10片). 咁我地4個女人夾埋買夠3 SET就可以LAW到呢個贈品(其實可以揀要個手拖喼的, 但係一黎唔靚, 二黎點分呢??), 我自己其實買左一SET野的, 見另外2個女人淨一樣夠1 SET又差呢一SET大數夠3 SEST, 所以我即刻話買多盒MASK啦, 費事煩, 咁就搞掂啦. 同人夾個SET 揀左一盒MASK (8片的)做贈品, 我可以分到3片(因有個媽咪話佢要2片便OK). 另外大數買3 SET又有10片, 咁我又分到3片, 所以TOTAL 我有6片贈品, 若買要差唔多港幣140蚊啦. 咁樣, 無啦啦我係一樣無諗過黎韓國買既野身上用左約港幣1200蚊.
跟住上車去南大門/明洞, 只係得好似2個零鐘頭. 咁一放監就跟導遊殺上去樂天百貨9樓買左雪花秀先, 因為呢度係最平了. 用左20 – 25分鐘買完即走, 沖番落去大街行, 亞嗲買左個袋. 我同亞女買魷魚食. 行兩行, 亞嗲又買皮帶, 再行兩行, 我地買左幾對襪, 1000WON一對, 即係約7蚊港幣, 平呀.我質地都幾好的. (後來番到黎之後仲要追ORDER, 叫同事幫我買多6對番黎TIM).
行行下見D 車仔檔賣既野都類似, 突然見到人食好長好長既軟雪糕, 所以問D韓國人係邊度買, 跟住去搵, 行左好耐, 終於搵到. 排隊買完梗係渣住黎影下相先食啦, 點知影左個2, 3張相就溶啦, 整到隻手都有, 所以又要好快咁食晒佢. 好彩我話買一杯先, 若一人一杯就大镬啦, 佢溶一定快過我地食LAW. 而家3個人食都叫做緊緊追得到咋. 買完軟雪糕就要掉頭走啦, 因為只淨番半粒鐘要上車(架車仲要係樂天百貨既停車場, 即係又要捐番落地底再爬上停車場, 你話個度駛唔駛預15分鐘呢, 講緊係成街都係人喎). 我想係韓國買水鞋的, 可惜見到都好貴(我只係有時間見到一間舖頭有得賣咋), 所以唔買啦.
上番旅遊巴之後就開車去seven luck賭場, 其實都無人想去, 但為了導遊可以交差, 落去行一個round算了(20分鐘). 我真係無mood賭錢, 所以無唱錢玩, 亞嗲就唱左30000won, 因為咁樣就有個籌碼樣既鎖匙扣做紀念品. 最後當然係輸晒30000won啦(好似寧左好多個零咁, 其實都係約港幣210蚊啫). 落番黎見佢有汽水飲, 當然整番杯先啦, 咁死熱.
跟住又要去那個xxx mall行一個鐘, 入面有個海洋館的, 但係入場費都要港幣1xx蚊, 見佢規模都唔大, 所以唔入了, 去海洋公園好過啦(若唔係咁死多大陸人去既話). 咁唯有係呢個mall度行啦, 都無咩好睇, 入到間精品店見到d 叉同匙更好cute的, 所以買左每樣一隻俾2隻野番學食lunch用, 諗住佢地個樣cute 咁佢2隻野食飯時見到都開心d食得多d啦. 不過都唔平呀, 一叉一匙更都過100蚊港幣.(5/9/2010: 事實証明亞仔話佢食飯見到d叉同匙更好開心)
跟住又上番旅遊巴開車去樂天世界, 晚上6點零鐘去到9點半集合, 只係大約得3個鐘頭度可以玩. 雖然拿左張地圖, 但係都好難搵. 問2隻野想玩咩, 亞仔話xxx (唔記得左啦), 咁去搵啦, 搵到死死下都搵唔到, 問d職員, 都唔係次次掂. 排個好似海洋公園既 "滑浪飛船"既野排左45分鐘啦, 雖然好玩, 但係排咁耐真係咩都玩唔到啦. 後來又去搵另一樣野, 誤打誤撞搵左另一個亞仔想玩既,排隊時問前面既韓國人係咪我地要搵既野, 指埋地圖俾佢睇(有韓文架), 佢地都唔知我想搵咩, 唉.........見呢度少人排隊都唔理啦, 照排啦, 入左去先算啦, 總之唔係鬼屋個d就得啦(因為亞女一定驚的).點知...............奶野, 呢個好似香港水上樂園個d激流旅程咁的, 當然個人唔駛落水, 只係坐係隻船度撞黎撞去咁, 但係............入面好黑的, 又有d野叫, 又打燈, 又有動物郁,嚇到我女死死, 講真, 我都覺得幾恐怖的. 因為當時本身係夜晚, 再加埋入面真係好黑, 最後我叫亞嗲攪住亞女等佢無咁驚咋, 唔係我就頭痕啦, 佢實嚇到喊唔敢訓.
玩完呢個即刻又衝去下一個, 都唔再問亞仔想玩咩, 一路行, 見到d低能野都問佢地玩唔玩, 亞仔唔想玩的, 我話, 無時間啦, 若你唔玩, 又唔知搵幾耐排幾耐先有得玩架啦. 跟住佢基於怕蝕底, 所以即刻同亞女一齊去玩, 玩完呢樣又玩個樣, 佢雖然升中, 但係............佢依然玩到四萬咁口, 真係攞命. 跟住又俾我發現原來大人碰碰車係格離, 所以就叫亞女企係入口度等我地, 我地3個入去玩啦, 因為都好耐無玩過啦. 最後, 我地都玩左幾多野下, 叫做.......可以做到爭分奪秒咁啦. 今晚係唔包晚餐的, 我地都係玩完第一樣野時, 求其買d熱狗食咋, 頂肚算了, 要趕住去玩.
玩完番酒店, 當然肚餓啦, 原本想搵間炸雞店的, 但係搵極都搵唔到, 加上又ling住d野好重, 所以最後又係便利店買杯麵搞掂算了. 免煩. d杯麵唔好食的, 個封面明明唔係辣既, 點知煮完都係辣的, 搵笨既.
今日太夜啦, 更加去唔到東大門買野!! 今日既行程好緊密........
呢盒係#4 既SET 裝, 右手邊的係SET 裝內的FREE GIFT.
下面呢盒係買全部野送既贈品.
贈品
上面全部的雪花秀都是幫我妹買的. 之前佢已經搵晒料, 知道係樂天 9樓買有discount, 所以都尚算容易買.
因為係樂天百貨30周年(我無記錯應該係樂天), 所以做緊discount, 另外用visa 卡俾錢又有5% discount, 再另外以白金卡俾錢又有10% discount. 由於我係以白金於俾錢, 所以我即係可以有5% + 10%, so 以下付款的價錢全是15 % discount後的價錢.
|
| 原價(每支) | 付款價 |
1. | Moisture Liquid Cleansing Foam (200ml) (買了2支) | US$20 | US$17 |
2. | Overnight Vitalizing Treatment (120ml) | US$34 | US$29 |
3. | First Care Serum (60ml) | US$55 | US$47 |
4. | Snowise Whitening Fluid + Snowise Balancing Water | US$85 | US$72 |
5. | Clear Mask (150ml) | US$27 | US$23 |
#4 係set 裝, 入面仲有free gift 送, 我開埋佢黎影相. 上面全部野合共US$205, 即係唔駛HK1600 (7支).
係樂天 9樓我估(因為我只係去左雪花秀呢個COUNTER) 全層都係賣化妝品的, 成層都好多人, 無導遊帶我去, 要搵呢個COUNTER都要起碼10分鐘, D人好似唔駛錢咁, 我地個團人好多人都有買雪花秀.
**呢個係我係2010年8月15日買既價錢.
呢個OUTLET 我地只得45分鐘可以行, 仲要落狗屎咁衝入去. 跟住又要搵亞嗲, 又要上車搵番2隻野(因為太大雨, 導遊又話D野唔係真係太平, 所以叫佢地留係車上面). 最後係呢度我地只行到2間舖頭, ADIDAS 同NIKE, 亞女好彩, 買到對波鞋港幣19X蚊, 我就買到件好抵既TEE, 只係港幣70蚊咋.
呢間就係教我地整泡菜既學校. 整泡菜...........玩一次便可, 第2次都嚴無聊. 整完既泡菜若d團友唔拿走既話, 全部都會捐去d老人院及孤兒園的, 咁樣都幾好, 唔好浪費食物.
呢間就係我地食lunch既餐廳(佢個LOGO 好CUTE的), 導遊話呢度唔係食團餐既餐廳黎的, 只係egl既團先至會黎呢度食喎. 導遊話韓國人鐘意食燒豬皮的(多骨膠元喎)(下圖長方形個2舊), 叫我地試下, 我試左, 唔鐘意個口感, 但係亞嗲就覺得ok. 但係佢d 豬肉就幾好食, 同埋佢d 醬就幾好味, 後來問導遊, 佢話係用韓國既x椒醬+黃豆醬(每樽$4x 港幣)溝埋一齊的喎, 但係我就唔想買2樽醬咁多(因為都幾大樽的), 尤其是我都唔食得spicy的, 所以最後係手信舖都無買到.
就係呢度, 報團當晚就係佢令到我好唔開心, 好唔想去呢個團的. 因為我地原本係想報3樂園那個團的, 後來見呢個成到團, 所以就轉報呢個. 我番屋企搭車時先發覺原來要去呢個戰爭紀念館. 因為我真係好好記性的, 我10年前同亞嗲去韓國, 已經黎過呢度. 我仲記得呢個紀念館個畫面, 所以我好唔想再去. 我第一次去都覺得悶, 仲要再黎真係想死.
好彩, 第2日番到公司, 個同事話呢個紀念館整過黎, 咁我先叫做可以笑番下, 因為我真係好怕睇完又睇的............ 因為我都記得晒, 又睇會悶爆的. 而家整完之後, 多左好多綠色既草, 個樣係靚左的, 起碼多左d顏色呀, 以前全部都係灰色的(飛機, 大炮, 軍艦同埋個地下).
以話係韓國團必食既野, 人參雞湯, 呢個團仲加埋長壽麵(即係麵LAW), 無味的, 有野食就算. 中間俾個膠袋笠住既那個兜係用黎裝雞骨的. 左邊白色細細杯既3杯野係人參酒黎的, 我地唔飲酒, 所以我將全部倒晒入D人參雞湯入面, 唔好SIDE. 右邊那碟白色野就係長壽麵啦, 將佢加埋入人參雞湯入面就食得了.
呢個一定要大力推介, 初頭報完名, 睇個行程, 見到佢寫住咩DRAWING SHOW(中文叫 "新奇彩繒秀"), 我同亞嗲講, DRAWING SHOW?? 畫畫有咩好睇呀? (因為我好怕D 好藝術既野的, 又係悶爆, 佢識我我唔識佢). 成個SHOW 個半鐘, 初頭真係諗過唔去睇, 改去行街架, 後來........好彩最後都入左去睇. 成場係D 人成日畫畫的, 但係佢地係用超短時間去畫一幅畫出黎的, 同埋唔係正正經經咁樣畫的, 又有D搞笑野, 呢幅畫我諗大約都係畫左15至20分鐘度, 佢地應該唔係用畫筆畫架, 聽聲好似D 剷咁既野黎的. 你一路睇佢畫, 你一路覺得佢地超勁, 又快又靚喎, 當然最勁就係仲要好搞笑TIM. 導遊話場內係唔俾影相的, 佢咁耐只係見過一次台上既人俾人影相(仲擺埋POST叫人影TIM), 導遊話應該係當晚現場氣氛好, 咁台上既人心情自然好, 就任人影啦. 我地個晚既氣氛都真係幾好架, 台上台下互動都好多搞笑位, 可能係咁, 佢地又擺POST俾我地任影啦, 唔係都好難話俾人知佢地D畫係畫得點靚法.
導遊話呢個SHOW係韓國都好受歡迎的, 電視都訪問過佢地. 呢個係TOP 2既SHOW, 最好睇既係 "亂打", 佢話仲好睇. 聽完佢講, 真係好想下次去韓國時睇埋個亂打, 希望仲有得做啦.
今日因為要出番首爾, 所以行程緊密好多要早D MORNING CALL. 所以一上車就當然Zzzzzzzzz (基本上我好多時都可以上車就訓得著的)係渡假城同首爾中間係其中一個行程, 就係驪州 PREMIUM OUTLETS, 導遊過D野都唔係真係好平, 又加上落狗屎咁, 所以叫2隻野留係架車上面算了. 我同亞嗲抱住……… 遊下既心態去睇下, 因為只得45分鐘, 所以只行了2間舖頭, 其實入面都幾多舖頭的, 但係每間舖都幾大間, 又要尋寶, 所以就花時間啦. 亞女買到一對NIKE波鞋, 港幣200蚊有找, 我就超好彩, 搵到件TEE, 港幣70蚊有找, 夜晚再睇下先覺得死蠢, 早知買多件啦, 咁鬼平.
跟住就去整泡菜, 入面好鬼死多人, 所以……… 都幾嘈. 入到我地自己個團個間課室, 教我地整泡菜, 完來都用左好多鬼多種料黎整的, 同埋泡菜既種類原來都有好多種架. 好快就整完泡菜了(因為連細路都識整既, 你話有幾難呢, 淨在整得靚唔靚之嘛). 整好既泡菜若團友唔要既話, 泡菜學校將會送去俾老人院同孤兒園的, 咁樣就可以唔駛浪費d食物啦, 真係幾好.
整完泡菜就去另一邊換韓服影相, 都幾搞野既, 好彩我地快趣整完泡菜, 所以係最早去換衫的, 唔駛等咁耐. 影完相亞嗲買左d銀筷子話買番香港用喎.
好啦, 下一站就係我地期待既梨泰院,亞嗲想睇 EVISU牛仔褲專門店(M字那一個牌子), 導遊話佢上星期去就做緊7折, 但係我地去到已經做完啦, 係有d指定既女裝tee 有7折, 同埋指定既牛仔褲有8折, 但係一係無碼, 一係d款唔啱, 最後買到既都係正價. 我都試左條牛仔褲, 都好睇的, 但係買啱啱好的, 又怕自己再肥就唔啱著. 若買大一個碼又唔好睇, 最後唔鬼買啦, 最憎要我煩的.
買完牛仔褲即刻衝落樓下, 因為時間無多, 趕去睇下其他舖頭有無野啱買. 因為一早打算買波鞋俾個仔的, 見到NIKE即刻衝入去睇啦, 睇得啱既又無佢SIZE, 最後, 又係亞妹有斬獲, 俾佢買到對涼鞋, 唔駛港幣200蚊, 啱晒去游水著. 係呢個時候, 亞仔當然就黑面鬧亞妹啦, 所以又再以9秒9既速度去第2間賣波鞋既舖頭啦, 又見到對面街有另一間NIKE又再入去, 都係搵唔到亞仔鐘意既波鞋. 咁都無計啦, 幫到佢盡了. 我自己呢個ROUND一樣野都買唔到.
買完野就去戰爭紀念館, 我真係無咩興趣, 因為10年前已經睇過一次啦, 而家只係整靚左, 多左綠化. D細路就有興趣睇既. 係呢度要影團體相, 但係..........係5分鐘之耐由無落雨變成落好大雨, 大家都要企係度等D雨細少少影啦, 因為要俾攝影師交差喎(之前係雪嶽山又係因為落雨而無影到啦, 今次又係咁). 導遊就問我地可唔可以頂1, 2分鐘唔開姐俾攝影師快快趣趣影左相交差, 咁我地成團人都好合作, 個個都SAY YES. 於是大家快快趣趣企好, 數一, 二, 三, 一齊收姐俾個攝影師影左張團體相. 交完功課就解散, 有40分鐘度可以睇野, 解散無耐又停左雨喎, 真係好. 2隻野走上D 車入面搞下人D野, 跟住又走去戰機, 軍艦影下相咁, 夠鐘就上車去食飯啦.
好啦, 搞掂左我最唔想睇既野啦, 上車去食晚飯, 呢餐晚飯係香港時間4點半食(韓國快香港1個鐘), 因為個DRAWING SHOW係7點半開始, 為免遲到, 所以要預早少少去到, 因為遲左係唔俾入的, 要等到某一個時候先放人再入去的. 呢餐食人參雞湯, 我初頭諗住都OK的, 因為上次黎韓國時最好味就係呢餐. 但係點知呢間野D雞同湯都無咩味的, 求其將D麵掉埋入D湯內, 快快趣趣食晒D野就算了. D人參酒因為無人飲的, 我將全部4杯倒晒入去雞湯內, 一D都無SIDE. 反而呢度既泡菜我覺得好味, 我成碟食晒呀, 每日食泡菜都有少少進步, 一日比一日可以食到多少少(因為我好怕SPICY的).
食完飯又落雨, 快趣走上車, 之後去睇SHOW, 好彩落車又無雨喎. 個度導遊話係類似香港既蘭桂芳咁的, 好多BAR, 餐廳同埋好多大學生行的, 即係賣既都係D比較IN同潮既野. 咁我地所見都真係五光十色的, 好似好多舖頭咁. 原本想唔去睇個DRAWING SHOW自己係呢度行街買野的, 但係望極都好似係餐廳多, 所以最後都跟隊去睇SHOW啦.
個SHOW真係好好睇, 個故事都好緊湊的, 無冷場, 好多笑位的, 個半鐘好快過, 佢地畫既畫真係好靚, 仲要咁短時間內即場畫出黎都咁靚真係勁. 佢地唔同既人都畫左唔同既畫, 呢度POST出黎只係最後畫個一幅(因為中間無開燈太黑影唔到, 亦唔俾影). 導遊話呢個SHOW當地都幾出名的, 我地個晚應該係FULL HOUSE, 全場既反應亦都好好, 掌聲同埋笑聲都不絕於耳. 好似每日只做一場咋.
睇完SHOW就番酒店啦, 由於太早食晚飯, 加上食完都唔飽, 所以去左便利店買野食, 我同亞女買左杯麵, 亞嗲就食埋係香港帶過去既唔知係杯麵定蛋糕.亞仔就買左件CAKE, 每人再買盒奶飲最後都唔再肚餓了.
我地分到2間房, 但係因為唔係連住既房, 所以我地都係4個人迫係一間房度訓. 朝早就用埋另一間房既WASHROOM, 唔係唔夠時間洗面刷牙落去集合(而家都係緊緊唔駛遲到咋).
呢一日行程多番啦, 最後睇個SHOW睇完呢一DAY都好完美.
