書展一日遊 - 足足行左8個鐘頭

又係一年一度既書展, 舊年行得好興奮, 但係今年就有少少唔想去, 因為都唔駛點買練習, 好似無咩野要買咁.  算啦, 反正一早訂左飛, 都局住要去架啦. 2隻野之前一晚已經係錢箱攞定錢去買野. 個細既居然攞成2佰幾蚊, 我唔俾, 只俾佢帶120蚊去. 個大既又係俾我減左100蚊. 費事佢兩個倒水咁用d錢. 我見到亞女仲學人叫個作者係本書度簽名………哈哈, 真係搞笑. 又見佢好慳咁買左一本5蚊既書………120蚊佢最後買剩得番5蚊…….仲要話唔夠錢買. 隻死野仲好唔滿意我要佢同工人番屋企先, 但係那時佢都已經行左6個鐘啦, 齋係兒童館mou左6粒鐘.  亞仔買那支望遠鏡好似幾抵喎, 100蚊幾大支的, 睇下佢玩左之後咩comment.亞仔又送左幾個file俾亞女, 無咩幾何喎!!

3個人買左咁多野(見第一張相, 其實漏左一個望遠鏡同3本書tim).  唯一真正買俾我自己既就係呢幾本cook book. 本3D立體蛋糕書係我買黎睇既, 佢只係有觀賞價值, 沒有教學意義, 因為我一定整唔到的. 但係我見佢D蛋糕好靚, 所以買本黎KEEP, 睇下人地D野係點樣整到出黎, 叫做見識下啦. 另一本係教整韓國野, 越南野, 泰國野及日本野的, 每樣教少少咁啦, 我係因為一碟韓國炒粉絲而買呢本書的, 因為我鐘意食. 另一本意粉, 就係買黎俾工人整午餐俾D細路帶飯, 等佢地有多D唔同既野食, 唔駛咁悶啦.再另一本係教整雞,又因為佢入面有意粉呀, 飯呀咁, 同埋係雞, 所以我買埋佢. 而那本免焗蛋糕書, 我想想地買, 係亞仔話佢想食, 所以………買左先算啦(因為買夠3本, 之後的都照計40蚊一本). 尋晚雖然好倦, 但係都忍唔住立左呢本書, 見佢又唔係太難整喎, 可能會試下整啩.

另外D書係買俾D細路, 字典呀、練習呀、英文故事書、霍金既書、電腦書, etc. 2本字典都已經成5舊水了(折左之後), 只係諗住升中學, 怕現有的大字典(都成14年前買的)可能唔夠用, 所以一次過中英都買晒佢啦. 本英文字典因為唔知佢2個邊個學校派左張coupon, 我拿去用, 可以有額外9折, 慳番差不多成40蚊呀!!

p.s. 今次書展既入場卷係亞仔俾錢的, 佢話佢請喎!!

白酒黑椒三色海鮮天使麵 – 附食譜

自從上次係灣仔那間bar 食過d 天使麵, 一路都仲好回味. 終於買齊料今日試下煮.

D 天使命係個幾2個月前係citysuper買的, 買左2包. D 蜆肉係赤柱taste 度買既. D 海鮮, 三色椒同d鮮冬菇就今日係鵝頸橋度買, d 忌廉就係二x惠買. 少少野分開係幾個地方, 幾個唔同日子先買晒!!

食譜:

1. 雜錦海鮮    適量 (我呢度一PACK約20蚊)

2. 蜆肉        適量 (我呢度一PACK 約15蚊

3. 蒜頭        8粒

4. 白酒        50g

5. 牛油        2安士 (大約得啦)

6. 黑椒        2 茶匙 (我就隨個人喜好而落)

7. 鮮忌廉      200ml

8. 天使麵      2/3 包 (原來一包麵煲完成後可以有成煲咁多…)

9. 三色椒      適量 (我呢度就每樣一個)

做法: (呢個天使麵係無咩汁架)

A: 準備

1. 將雪藏食物預早一晚放在雪櫃內解凍. 第2日將食物洗淨格水備用. 用鹽及胡椒粉(多些)醃下.

2. 蒜頭切茸.

3. 三色椒洗淨, 切條備用.

4. 先煲半煲水, 放入少少鹽, 將天使麵放入煮1分鐘然後焗一陣,唔好整到太熟, 沖水(過冷河),隔水後加些食油將天使麵撈勻(令麵條能一條一條分開)備用.

5. 鮮忌廉調味(即係加鹽但唔好咁咸,夠味便可), 混合後備用.

B: 製法

1.煮溶牛油, 將海鮮爆炒至7成熟. 

2. 煮溶牛油, 以中火炒香蒜茸, 放下冬菇同炒.後加入海鮮、蜆肉及黑椒碎, 炒一陣後加入白酒, 再炒多一陣. 加三色椒兜炒數下加入鮮忌廉同炒至海鮮熟.

3. 煮溶牛油, 以細火將天使麵加入適量的鹽或蒜鹽炒熱即可上碟. 再將#2 的餸及汁舖面即成. (d麵唔夠咸唔好食的)

TIPS:

1.   所有三椒除了入面既籽要除去之外,所有白色野都要切走(見上圖左邊的是切晒白色野的, 右邊既係未切晒). 否則,煮出黎就無爽脆的效果.

2.天使麵或意粉用油撈一撈, 效果會滑D及避免痴埋一齊.

題外話:

* 由於身痕,所以幫把陶瓷刀剪彩(唔係我真係無咩機會用呢把刀),睇佢就好輕,但係切完都少倦的,可能我慢慢整,所以切左好耐下(洗洗切切左成粒鐘). 用佢黎切冬菇,比平時切得幼身D喎(見圖), 其實可以再幼D, 但係我怕一唔小心切到手, 所以都唔敢亂黎.

** 同場一路整定d食物,一路開住譚詠麟既舊歌黎聽,真係好peaceful,無人嘈我,靜靜地一個人係度做野,呢種時光對我黎講都係幾奢侈的. 遲d連禮拜六都無得靜下了!!!

試食匯報:

1. 唔夠汁,所以我已經將忌廉加多左一倍份量.

2. 天使麵太多,食唔晒. 我已將份量減少1/3包.

3. d麵唔夠咸,所以我係食譜內已註明要夠咸先好味的.我就即刻加餐桌鹽撈勻佢便繼續食,出黎個味係2樣野.

4. 我同亞嗲都鐘意食炒天使麵.下次再encore.

mini攪拌機

呢部機都買左年幾兩年, 當時係因為部ex mini機壞左, 所以買部replacement. 搵極都搵唔番之前個部, 所以就貪平買左呢部(好似係138蚊). 但係買番黎發覺唔係幾好用既, 所以又pat左係度啦. 其實主要都係用黎整餃子的, 將d菜打爛佢, 但係..........放唔到好多菜入去的, 激鬼死我. 咁又無理由掉左佢架, 所以............而家佢既主人都差唔多變左係我工人啦, 因為佢先多 d機會用.

好似今日咁, 諗住攞佢出黎用下啦, 攞都攞左幾分鐘(因為要拿開d野先攞到出黎). 然後又關唔到機, 咁就開唔到佢黎用. 最後搞左成10分鐘先關得到. 佢好鬼難關的, 個制又衰喎, 要係咁禁住佢先會郁, 一放手又停機. 即係打幾耐要禁個制禁幾耐. 買錯野, 真係買錯野!!!

早知用empress 那部出黎打仲快靚正! 睇下呢部機幾時壞, 咁我可以清左個位出黎先.

赤柱之行

 

終於可以放監啦..............前兩個禮拜都想出去行下, 但係曬成咁又真係想, 所以又無出去啦.

今日揀左去赤柱, 天氣好好但係又唔係曬到隻狗咁. 仲有風TIM, 所以叫做行得唔辛苦.  我地去左大排檔度食LUNCH, 仲有D相BUT...........要遲D先整到出黎.

上面第一及第二張相係突然間亞女見到個天夠雲有彩虹, 咁我地望下啦, 真係有D不同既顏色喎, 真係第一次見. 跟住亞仔話.........之前四川大地震都出現過呀.........................真係大吉利是咩!! 但係呢個畫面真係幾少見, 所以放埋上黎啦.

我地又見到我舊年想搵那部汽水機, 終於都可以買支黎玩下. 一飲落去, 嘩..............凍到我要DUP 地..........因為又凍又拿喉的, 大熱天時真係好正!!

仲有另一奇景係.................. 係下午2點50分, 我地係個天度見到月亮呀, 仲要係好清楚見到2/3大既月亮, 我地都以為眼花仲睇下個錶幾多點TIM, 真係2點50分, 3點都未夠................

DIY - LONG書架

圖一 - 呢個係我叫亞嗲整既LONG書架, 個SIZE係根據我既要求黎整的. SO FIT!!!

圖二 - 呢個係亞嗲同事俾我地的, 原本係用黎放琴譜的, 但係我嚴佢大得滯.

由於有一日我見亞仔睇一本厚過字典既書, 我覺得佢渣本書渣到好倦, 所以我上網問人D LONG書既架係邊度有得賣, 想買個俾亞仔. 同時我又問亞嗲佢識唔識整. 亞嗲話要睇過係點樣先知道整唔整到.

OK, 咁算啦, 諗住去跟據人地既通知, 去D舖頭度買啦, 因為好平, 幾十蚊一個ONLY.  但係當我諗住放假去買時, 亞嗲話佢同事俾左個佢, 好快就收到圖二那一個黑色LONG書架了. 亞嗲攞左番黎後, 亞仔&亞女好開心, 仲即刻搵書黎試用TIM............ 都好正喎, 但係就稍嚴佢大左D & 重左D.

亞嗲睇完呢個現成之後, 佢話佢識得整了, 咁亞嗲就問我想要幾大, THEN 前兩日亞嗲LING左呢個銀色既LONG書架番黎了, 呢個俾亞女用的. 亞女當然好開心啦, 因為佢又有一個.

我好鐘意D野係自己整的, 真係唔同係街買番黎的, 因為係自己獨一無二 & 按自己要求度身訂做的.  BUT 呢個未係完美, 我要亞嗲加多條邊, 等D書唔可以飛起, 唔駛用手禁住本書. 亞嗲呢個禮拜會整埋番黎...........咁就PERFECT啦!!

蓮香樓 - 嘆茶記

呢次其實係第2次黎呢度飲茶, 原本諗住成家黎的, 但係...........因為要去行街所以無帶亞妹出黎. 又因為叫左工人煮午餐俾亞仔, 所以又叫亞仔番屋企食飯, 最後只得我同亞嗲飲茶.

一上到去, 見唔係多人到好跨張(因上次多好多人), 好快亞嗲搵到位啦. 佢d茶真係幾好飲的, d潽理濃味得黎唔苦的. 所以臨走亞嗲都買左一包茶葉拿番公司飲, 佢話好鐘意飲.

係呢度飲茶我只適合冬天去, 因為我地揀呢種茶壺, 夏天我隻手真係頂唔住, 因為佢太熱, 我熱到只jump到少少茶就掉都掉唔切, 我隻手指已經紅晒啦. 但係亞嗲除左面皮夠厚, 手皮一樣咁厚, 所以佢jump到無大問題.

佢呢度有d 細個時食既點心, 如 x 春蛋燒賣, 豬肚燒賣, 大飽 都有. 我最鐘意食佢既雞扎, 因為d魚肚好好味, 夠味又唔會林pat pat的.

下次再去過先!

慶功宴 - 大喜屋(日本放題)

今日升中放榜, 派到第一志願, 所以去左呢度試下. 其實係3個禮拜前已經訂左位, 但係一路都唔知道可唔可以去慶功, 所以呢餐真係好難得架!

d 食物ok架, 一d都唔差, 當然唔係頂班啦. 係中上啦.  但係佢既價錢黎比較既話, 就係好抵食law, 佢唔止咁少野食, 只係有d我無影到相. 魚生, 我地總共叫左3盤(呢盤係最多的, 其他2盤係少d). 另外又叫左蝦天婦羅, 蕃薯天婦羅, 又有青酒煮蜆, etc. 真係唔知佢點有錢賺呢?

好食:

海鮮粥

天婦羅

魚生

焗廣島蠔(咁上下名)

燒雞軟骨

蟹肉沙律/蟹子沙律

 

唔好食:

東風縲 (完全無味, 係咩味都無)

青酒煮蜆 (有沙又無味)

 

大人星期一至四, 每位夜晚係218蚊, 小童係$148 (以高度計架, 8歲度已經好敏水計小童), 另加一.

lunch 就$178大人.

職員serve得幾好既, 係有一個好特別既waiter................. 真係想話佢又唔係, 唔話佢又覺得佢好有問題.  佢幫我地換碟, 成日都叫我地遞隻碟俾佢的. even 佢見到我食緊西瓜, 佢都可以要我係台中間ling隻吉碟俾佢收. 我都唔知佢係幫我, 定我先係幫佢呀!! 鬧佢唔落係, 佢好勤力的, 成日黎換碟, 但同樣, 佢我地亦成日都要幫佢遞隻碟俾佢. 佢好高大, 一定唔會唔夠手長, 只係佢一隻手托住個盤, 好似驚佢一郁個盤會跌咁. 但係其實個盤唔算好滿, 同埋, why佢唔放低d野先再幫我地換碟收碟呢??!!

全場最掃興就係呢位咁特別既waiter啦. 但係佢唔係無禮貌or 粗魯的, but就係成日都要你幫佢遞碟law.

 

 

 

 

kenwood KM020 Titanium專業廚用機 - 又被我out左啦

今日買呢部機有額外9折呀. 仲有下面呢個攪肉配件送埋(原價530蚊), 仲有一本食譜送.

個攪肉配件係連埋可以整香腸既野架(見上面黑色那一個), 好似好正呀.

廚師示範點樣壓麵團呀.

壓完之後就係將麵團切成麵條啦, 有片睇.

今日去開吉豬島, 又心思思想去睇呢部機. 所以就駛走亞嗲自己去睇, 費事睇唔夠一陣又話叫走.

我企係度睇左成粒鐘, 今次終於睇到個廚師(其實係咪應該咁叫呢?)由麵粉開始整成麵條, 仲試食埋tim, 都幾好食喎. 佢個麵團只係用左澳州中筋麵粉100g 同43g定47g既水, 只係得呢2樣野整個麵團咋, 但係出黎又真係ok喎, 當然佢係用左d 甜豉油同少少 "立"椒 油黎做個汁, 佢今次係整冷麵既食法. 出黎真係都ok好食的喎.

全程睇住佢整, 真係唔駛點整架, 係用部機整, 一d都唔辛苦.

個廚師好好人的, 唔會話你齋睇唔買就黑面, 佢好nice架, 整完麵又教我整麵包tim, 由於我趕住買餸, 所以睇唔晒就走左啦. 我睇到部機打出黎既麵團真係可以有好等既膜架, 好勁. 我上次搓到斷手咁滯都整唔到佢1/10既效果.

若有人想買呢部機而家可以去太古豐澤, 呢位先生而家係度做緊示範, 幫襯下佢啦, 佢咁好人.

另佢有facebook可以有片睇喎, 我寫埋呢篇野就去睇.

facebook: sammystation@hotmail.com

*****************************************************

因為一個mummy既分析, 所以我都係決定唔買呢部機啦. 因為我而家屋企既工具只係做唔到麵包同麵條, 其他既野我全部都做到, 咁無胃又買多部大牛龜番黎啦. 等遲d 舊年買既玩具打柴, 我先再睇下咩機啱我多d.